A siguir dando pasos

Depués del éxitu de les Marches de la Dignidá:  A siguir dando pasos

Depués del éxitu de les Marches de la Dignidá: A siguir dando pasos

L’inmensu éxitu de les Marches de la Dignidá, que remataron l’otru sábadu 22 en Madrid con una manifestación pergrande, posiblemente la más multitudinaria de la Historia d’España, apurre abondes llecciones y plantega retos enforma a les fuercies de la esquierda que tán dispuestes a encarar la revesosa situación histórica na que mos topamos.

Como yá diximos nel so momentu, había dos elementos fundamentales qu’estremaben esta convocatoria de tantes otres anteriores: la primera qu’avanzaba yá una propuesta política, anque tovía probe, que diba acuyá de la simple protesta, y la segunda que taba fecha al marxe de la tutela de les grandes centrales sindicales, CCOO y UGT, que vienen faciendo’l papel de bomberos del réxime cuantayá. Qu’una movilización que plantega abiertamente nun pagar la delda impagable, y que quier espresamente baltar los gobiernos de la Troika, tanto’l central como los autonómicos; que se fai con una precariedá de medios evidente, dada la debilidá orgánica de los sectores que la propiciaron, y que, al marxe de los tradicionales marcos de protesta sindical, seya a xuntar una movilización de proporciones descomanaes, ye una siñal de que la paciencia popular y l’estáu d’emerxencia social en que tán los pueblos del Reinu d’España llega a tales niveles que perpasa les llendes del réxime. Lo que se pidió en Madrid, y dende tolos pueblos del estáu, yá ye abiertamente un cambiu de daqué más que’l gobiernu, y eso supón un reblagu perimportante nel nivel de conciencia d’un sector perimportante de la población. El réxime nacíu en 1978 al traviés del pautu ente les élites franquistes y les cúpules de la oposición ta entrando nuna crisis terminal, lo que nun quier dicir que tea a piques de desapaecer, sinón que posiblemente teamos nuna situación na qu’a les élites económiques yá nun-yos seya posible perpetuar la so dominación col mesmu marcu políticu-institucional que nació cola muerte de Franco. Vese ca vez más imprescindible cambiar a otru, y la cuestión ta en facer qu’esti seya pilotáu pol campu popular o pola oligarquía, y en porgüeyu de quién.

La gran debilidá del campu popular, n’Asturies pero tamién na mayor parte de los pueblos del Reinu, ye la debilidá tanto de la propuesta como de les organizaciones que deberíen espresar esa necesidá del cambiu. Les propies marches son una amuesa d’ello. N’Asturies poques, perpoques organizaciones s’implicaron rialmente n’apostar pola convocatoria. Y incluso asina, neses condiciones tan precaries, un cientu d’asturianos participó na marcha que salió’l 1 de marzu a Madrid, otros 2.000 fueron a la manifestación y munchos más espresaron el so apoyu al traviés de la compra de bonos o de la implicación nes diferentes movilizaciones y actividaes que la precedieron. Eso amuesa qu’hai espaciu social pa una alternativa, y qu’esa alternativa tovía nun esiste.

Ye prioritario da-y continuidá a les marches, implicar a más sectores y afondar na crítica y nel análisis de la situación. Siñalar claramente la necesidá de rotura colos marcos de dominación: la UE y el réxime del 78, y apostar abiertamente polos procesos constituyentes de los pueblos del estáu. N’Asturies pasa per marcar una axenda política qu’incluya la desixencia de dimisión del gobiernu asturianu, el boicot masivu a les empreses que pretenden zarrar nel país, la desixencia de depuración de responsabilidaes pol lladrociniu institucional y empresarial que lleva viviendo Asturies a cuenta de los fondos europeos, la insubmisión a la delda odiosa y l’apertura d’un procesu constituyente que redefina’l marcu institucional asturianu dende la so soberanía.

Nun ye xera fácil. Persabemos el pesu históricu de les organizaciones polítiques y sindicales que vertebraron el nuestru país per décades. Pero cuantayá que dexaron de ser ferramientes útiles. Ye’l tiempu de construyir otres. Va llevar tiempu, y ye un llabor llenu d’estorbises. Pero güei ye más necesario que nunca.

Los comentarios están cerrados.