|
L'agua
constitúi ún de los recursos naturales más esenciales
pal desenrrollu de la vida y les sociedaes humanes; un recursu natural,
que como toos, ye victima d'un modelu productivista que lu consume
de forma irracional y irresponsable, imponiéndose una lóxica
na que los intereses de mui pocos impónense a los de la mayoría
y la necesidá de la so preservación y usu sostenible.
Un modelu que fomenta o nun torga actuaciones de sobreexplotación
y despilfarru, contaminación y envelenamiento de les agües,
o infraestructures con enormes impactos qu'amenacen claramente'l futuru
de los recursos hídricos y el so valir ambiental y social.
Delantre
esta rialidá y el Proyectu de Plan Hidrolóxicu Nacional
(PHN) aprobáu el pasáu martes  30
de xineru del 2001 pol Conseyu Nacional del Agua y en víes
de discutiniu pol Parlamentu pa la so aprobación como Llei,
los abaxo firmantes decidimos organizanos nuna Plataforma qu'actuando
nel marcu xeográficu d'Asturies defenda l'apertura d'un ampliu
debate social con participación de tolos sectores afectaos
pa la ellaboración d'un PHN y una política del agua
qu'asegure:
-
Una
planificación del usu sostenible de los recursos de les distintes
cuenques, basada nel conocimientu absolutu de los consumos riales
de cada actividá y na xestión conxunta de los recursos
superficiales y subterránios, asina como'l cumplimientu efectivu
de la llegalidá qu'esanicie los vertíos incontrolaos
y les actuaciones en zones protexíes.
-
Una
nueva política más hidrolóxica qu'hidráulica,
una política que ponga l'acentu na contención de la
demanda, na meyora de la xestión, en el aforru, na reducción
de les perdes nes redes de distribución, na instalación
de tecnoloxíes industriales y doméstiques que reduzan
el consumu d'agua, nel estudiu de les agües de les mines abandonaes
que güei constitúin auténticos embalses subterráneos,
na depuración y reutilización d'agües residuales,
na conservación y rexeneración de les viesques.
-
La
recuperación de los nuestros ecosistemas hídricos,
que depués d'años d'agresión y desidia tópense
enforma esfandangaos, asegurando la protección efectiva del
dominiu públicu hidráulicu, la restauración
hidrolóxico forestal, la conservación de los ríos,
humedales, acuíferos, y los sos valores ambientales como
sofitu de vida, asina como la reducción de la contaminación.
-
La
xestión democrática y tresparente d'estos recursos,
y el replantegamiento de los diferentes usos del agua, incluyendo
los industriales, enerxéticos y agrarios, valorando la so
dimensión ambiental, económica y social. Tamién
son públicos los recursos biolóxicos asociaos a los
ecosistemes acuáticos, y la xestión qu'asegure la
so conservación y aprovechamientu sostenible ha ser pública
y tresparente.
En
definitiva reclamamos una política y xestión del agua
que parta d'una visión integral d'esti recursu, de la so consideración
como un bien escasu a utilizar de forma sostenible y responsable.
Desiximos
una fonda modificación del PHN aprobáu pol Conseyu Nacional
del Agua (colos votos en contra de los representantes ecoloxistes
y cuatro de los cinco espertos, asina como Comunidaes Autónomes
como Aragón y Asturies, si bien por razones muy distintes),
tovía reconociendo l'avance medioambiental que se produxo cola
eliminación de la presa de Caleao, nel Parque Nacional de REDES,
prevista nos proyectos anteriores o la fuerte inversión pa
rexeneración d'enclaves naturales (26.000 millones).
La
nuestra postura ye d'oposición a:
-
Una
política basada nel crecimientu contínuu de la ufierta
d'agua, que tien como consecuencia una sobreesplotación d'esti
recurso afalada por intereses especulativos que se mueven impunemente
na illegalidad, y que siguen teniendo como oxetivu cimeru la construcción
de grandes obres hidráuliques: Embalses nel Altu Ayer ( "Regulación
del altu Ayer" con 6.400 mill.), trasvases y depósitos
nunca xustificaos, asina como una insignificante partida (1.105
mill.) pal estudiu de les agües subterránies.
-
La
necia actitú del gobiernu asturianu y la so obsesión
poles infraestructures, que s'enfota na construcción del
macrodepósitu de Celles (Siero) incluyíu nel PHN,
con graves perxuicios pa los vecinos de la zona que dende hai más
de dos años vienen manteniendo una fuerte oposición
a la so construcción, con argumentos basaos na necesidá
d'entamar una nueva política del agua na llínia de
lo qu'equí plantegamos, y con propuestes alternatives que
nunca foron valoraes pola Alministración Rexonal.
-
Fomentar
n'áries con una grave escasez d'agua una demanda imposible
de fartucar, criando asina graves problemes socioambientales a mediu
y llargu plazu. Resulten inaceptables tales demandes que son espresión
d'una solidariedá interesada, por rializase dende intereses
especulativos (constructores, eléctriques, campos de golf,
parques temáticos y sector hosteleru) y desixir sacrificios
a los más desfavorecíos.
-
Afondar
nel deterioru ambiental de ríos, llagos, deltes, humedales,
viesques de ribera, montes... ensin tener en cuenta que l'agua ye
la base de la vida de tolos ecosistemes y un elementu esencial de
la nuestra salú y bienestar.
-
Al
mercadeu del agua: El agua ye y ha siguir siendo un recursu supuestamente
escedentariu, infravalorando la so creciente reducción a
consecuencia del cambeu climáticu.
-
Que'l
coste del Plan supere'l beneficiu esperable, franciendo la lóxica
económica defendida pola Directiva Marco Europea en porgüeyu,
otra vuelta, de les empreses constructores, les eléctriques
y les multinacionales de xestión del agua.
-
A
l'ampliación de les diferencies económiques y sociales
ente les distintes zones del estáu, afitando una ordenación
del territoriu ca vez más desequilibrada y inxusta ente l'interior
y el llitoral, ente'l monte y el llanu, entre la ciudá y
el mediu rural.
Hai
de cambiar esta vieya política del agua que tien unos resultaos
que conocemos y padecemos, pa ello proponémonos desenrrollar
un fuerte movimientu que discuta, cuestione y proponga alternatives
a la xestión del agua n'Asturias, al tiempu que mos coordinemos
col restu de Plataformes esistentes a nivel Estatal y que como oxetivu
común plantéguense la convocatoria d'una manifestación
en Madrid pal día 11 de Marzo que, oponiéndose al PHN,
plantegue un usu racional del agua.
|
