también en castellano
IAS denuncia que'l
Gobiernu Español va proceder al expoliu
del caladeru d'El Cabu Vidíu
La formación
d'esquierda nacionalista conderga l'expoliu del
recursu natural y l'actitú dictatorial
del gobiernu socialista ordenando'l zarru del
caladeru a la navegación
Énte l'anuncia
de Costes d'empecipiu de les obres d'extracción
de sable nel caladeru d'El Cabu Vidíu contra
la voluntá de los pescadores que lleven
xeneraciones mandando del caladeru, la formación
d'esquierda nacionalista quier condergar l'actitú
totalitaria, unilateral y despótica del
Ministeriu de Fomentu, que va estrozar un importante
recursu de pesca asturianu por nun perder una
mísere subvención de la UE por importe
de 9 millones d'euros. Pal nuesu partíu,
esos millones son perfectamente prescindibles,
darréu que van invertise nel expoliu d'un
recursu natural. Naide sanu y acordies acepta
dineru empara d'amputase un miembru, que ye xustamente
lo que cuenta facese en Vidíu.
IAS quier manifestar
d'igual miente la so más enérxica
repulsa y conderga contra la burlla y escarniu
que Costas fixo de los pescadores asturianos,
a los que tentó de comprar, como si se
tratare de señores coloniales negociando
con ignorantes nativos, ofreciéndo-yos
miserables contraprestaciones económiques
empara de la perda d'un de los sos meyores caladeros.
Énte la
negativa de los pescadores, Fomento escoyó
una salida propia de gobiernos dictatoriales,
decidiendo unilateralmente la extracción
del sable y zarrando'l caladeru por orde ministerial
col únicu envís d'evitar la protesta
de los pescadores mentres la draga y la chupona
faen el so llabor baxo vixilancia militar si fore
preciso.
Izquierda Asturiana
amuesa'l so noxu y refugu por estos fechos y nun
quier dexar pasar la ocasión de recordar
que'l mesmu gobiernu socialista qu'agora actúa
d'esta traza tan incalificable, clamaba dende
la oposición contra l'actitú secretista
y proceder totalitariu d'Álvarez Cascos
nel casu del petroleru Prestige, un socesu qu'igualmente
contribuyó a la degradación del
nuesu mediu marítimu y nel que'l daquella
gobiernu del PP procedió de manera escandalosamente
asemeyada a como agora fai'l PSOE.
IAS entiende
que nun hai estudiu d'impactu ambiental que garantice
la inocuidá de la extracción de
los más de 500.000 metros cúbicos
de sable que se pretenden. Que nun hai tampoco
contraprestación económica posible
ente la perda del caladeru, y muncho menos afayamos
xustificable que'l sable de Vidíu vaya
a “rexenerar” una playa con intereses
turísticos evidentes, primando l'actividá
terciaria sobre l'expoliu d'un sector primariu
tradicional y respetuosu pa col mediu ambiente.
Estaya
de Comunicación d’Izquierda Asturiana
(IAS)
Uviéu a 13 de payares de 2004
|
