tamién en castellano

Izquierda Asturiana (IAS) refuga’l llabor de Cultura al respective del tratamientu del asturianu nel conceyu

L’agrupación asturianista camiéntase que la supuesta
normalización llingüística n’Avilés ye una farsa

Izquierda Asturiana (IAS) quier condergar d’esta miente’l llabor de la conceyalía encabezada por Juan José Fernández no que pescancia, en palabres del so portavoz Xosé Nel Comba, como “un refileru d’actos hipócrites que tenten de mantener tapada la boca de los que reivindiquen l’asturianu, mientres que les principales actividaes culturales del Conceyu siguen presentándose en castellano como única llingua vehicular”.

L’apaición de la cartelería y la documentación referente al Antroxu, l’Abiertu y les Aules Populares fo l’últimu despropósitu nel qu’incurre’l Conceyu al presentar too ello únicamente en castellano y amosando que “por cada pasu que s’anda desándense dos” y que los pocos actos que se presenten n’asturianu nun perpasen la marxinalidá por nun cuntar cola difusión nin l’aceptación que podría esperase.

Mentanto, señala IAS, se sigue a la espera de la presentación de la Oficina de Política Llingüística, publicitada por Fernández y D’Andrés col únicu envís de prorrogar l’incumplimientu d’una promesa electoral y de gobiernu fecha dende les files d’IU va yá más d’añu y mediu, y que namás vien a corroborar el desinterés del gobiernu municipal pola llingua propia d’Asturies.

Por too ello, Izquierda Asturiana:

1. Pide responsabilidaes a la Corporación local y sobremanera a la Conceyalía de Cultura, a la que considera principal responsable de les midíes de normalización llingüística nel Conceyu.

2. Solicita la inmediata puesta en marcha de la Oficina de Normalización Llingüística d’Avilés.

3. Expresa la necesidá de llevar la “llingua” a les principales actividaes culturales d’Avilés y non namás a aquelles de calter minoritariu o yá venceyaes d’antemano a lo tradicionalmente asturiano, recalcando nes que van dirixíes a los más mozos o a los sectores culturalmente más activos.

4. Esixe claridá na planificación llingüística y pide’l cese d’unes polítiques hipócrites que nun han continuar por más tiempu, tratando de “cubrir l’expediente” mentanto que l’idioma pierde puxu ente los avilesinos y avilesines por mor de la irresponsabilidá de los diferentes gobiernos, que como ésti, nun tienen nin tuvieren a bien trabayar en pro de la llingua asturiana.