también n'asturianu

Manifiestu: [Llamamiento por una semana europea de movilización educativa] (PDF)

IAS participa na Selmana Europea contra'l neolliberalismu na escuela y llama l'atención sobre les agresiones de l'Alministración asturiana a la mesma

Les actividaes van desendolcase ente'l 8 y el 15 de mayu en toda Europa

Izquierda Asturiana (IAS), como una de les organizaciones polítiques que sofiten a la Selmana Europea escontra’l Neolliberalismu na Escuela, que se va cellebrar en Xixón del 8 al 15 de mayu, quier facer llegar a la opinión pública asturiana les siguientes reflexones:

Consideramos que tanto la sanidá, como la educación, son dos servicios públicos a la ciudadanía, qu’enxamás se puen catalogar como negocios. Sicasí, nos caberos tiempos, vemos unes tendencies neolliberales que nagüen pola so privatización. Los empresarios deseyen facese colos abondos beneficios qu’estos servicios-yos daríen, escaeciendo en tou momentu’l so calter de serviciu, y quitándo-yos los sos principios d’igualdá y gratuidá. IAS, estudiaes les consecuencies qu’eso ta llevando nos estaos que tán poniendo en práutica estes polítiques, xulga negativos y nocivos tolos intentos de llevales alantre nel Estáu Español, asina como n'Asturies. Supondríen una pérdida ensin precedentes pa los drechos de la clase trabayador, asina como una situación gravísima pa la salú y la educación de les clases menos favorecíes.
Anguañu, na educación, ta en funcionamientu un sistema privatizador encubiertu, los conciertos educativos, que dexen ver a les clares les graves consecuencies de la privatización d’un serviciu públicu. Les patronales privaes nun aseguren en nengún momentu la escolarización de tola población, asitiándose namái que naquellos conceyos onde los beneficios son claros y abondosos; dexando al restu la población en manes del serviciu públicu d’enseñanza, que ye l’únicu que de verdá-yos asegura una educación de calidá, igualitaria y gratuita. Pero nos mesmos núcleos onde s’atopen, discriminen a la so población al traviés d’unos cobros encubiertos ya illegales qu’impiden que tolos/les escolinos accedan a los sos puestos escolares n’igualdá d’oportunidaes. Les patronales privaes de la educación n’Asturies exercen una discriminación por mor del poder adquisitivu, asina como de la so clase social, ensin que nengún gobiernu exerza un control de los mesmos. IAS valora cuando menos ablucante, que l’Alministración gaste dineru públicu n’empreses privaes que practiquen sistematicamente un racismu claru, y qu’amás nun seya a controlar el funcionamientu d’aquellos centros a los qu’aporta dineru de tolos contribuyentes (ricos y probes).
IAS quier denunciar la política educativa que lleva alantre esti gobiernu, col so presidente Tini Areces, y el so conseyeru d’educación Riopedre a la cabeza. Dende hai bien pocu, sabemos lo que l’aumentu de los conciertos na zona centru va suponer pa la escuela rural. Ta falándose d’una reconversión na escuela rural, non una reconversión na que se-y dote de más medios a una zona desfavorecida, sinón d’una reconversión con peslle d’unidaes y concentración de los rapazos en centros más grandes, alloñando’l serviciu educativu de los pueblos onde viven, y esfarrapando asina l’entretexíu cultural de los pueblos. Estes midíes, escuenden la intención de mantener unidaes de privilexu nos centros privaos concertaos de la zona centru, asina como la concertación de la infantil. Pa que unos ciudadanos yá favorecíos económicamente reciban tovía más prevendes, el gobiernu de Tini Areces quier esgonciar un serviciu públicu na zona rural d’Asturies, yá abondo atacada dende otros llugares d’esta alministración autonómica.
Les declaraciones de Riopedre al rodiu d’entamar conversaciones cola patronal católica de la enseñanza privada concertada, pa nun-yos pesllar unidaes, asina como l’anuncia de la desapaición abondosa d’unidaes na enseñanza pública, abúltanos significativu de l’apueste claro de l’Alministración asturiana pola privatización. La dexadez que tuvo l’Alministración asturiana delantre les demandes xudiciales de la privada concertada, truxo como consecuencia sentencies desfavorables, sofitaes en principios a lo menos sospechosos, que d’amosar l’Alministración un mínimu de preocupación traeríen como consecuencia sentencies favorables a la enseñanza pública. Les declaraciones d’anguañu, xunto a la dexadez xudicial de l’Alministración, amuesen a les clares la intención dende un entamu d’esta Alministración de sofitar la enseñanza católico-privada concertada a la escontra de la pública.