también en castellano

Izquierda Asturiana (IAS) condena la instalación d’un parque eólicu na Serra de Carondio

El portavoz d’IAS Ignaciu Llope afirma que’l parque va afarar restos arqueolóxicos cola connivencia de Cultura y llamenta que la rentabilidá del “kilowatio verde” y Kyoto lleven a les ellétriques a asaltar los montes.

Izquierda Asturiana condena l’autorización concedida a una filial d’Hidrocantábrico a la instalación d’un parque eólicu con 51 molinos xeneradores que va afarar la Serra de Carondio, enclave d’especial importancia arqueolóxica ente los conceyos d’Eilao, Ayande y Villayón nel que s’afayen calzaes romanes, castros y dólmenes funerarios.

El portavoz del partíu, Ignaciu Llope, llamentó qu’ “Hidrocantábrico, que tien dalgunes de les centrales térmiques más contaminantes d’Europa, pretenda potenciar el so negociu de renovables esfarrapando un llugar históricu na tierra asturiana a la que s’enorguyez de representar”. Pa Llope, el que la filial d’HC venga a Carondio ye “una manifestación especialmente doliosa d’una mala planificación enerxética que lleva a la saturación de parques eólicos nel occidente asturianu”.

Les causes de’esta invasión de parques eólicos sitúense pal portavoz d’IAS per una parte na necesidá de cumplir col protocolu de Kyoto y el Plan d’Enerxíes Renovables, que se marquen l’oxetivu de llegar al 12% de lletricidá xenerao al traviés de renovables n’añu 2010. Per otra parte, tamién en relación colo anterior, l’altísima rentabilidá de les enerxíes renovables, que gocien de cuantioses subvenciones y con unos quilovatios qu’algamen precios más altos nel mercáu d’enerxía, bien fore otru factor a considerar na folada de parques eólicos, énte la que’l Gobiernu asturianu interpunxo daquella una breve “moratoria eólica” que namai supunxo un aplazamientu del problema deriváu de la proliferación de parques eólicos, pero non la solución.

Llope condenó d’igual miente la ineptitú del Gobiernu asturianu, que caltién la Serra de Carondio nun llimbu llegal nel que, inda que se reconoza la so relevancia, nun gocia de categoría nenguna de protección que torgue la instalación de los xeneradores”. Llope esixió saber si Cultura informó a favor de la instalación del parque eólicu, y qu’en casu de ser asina s’aclare “baxo qué presupuestos científicos ye posible que s’avale la instalación del parque” conminando a Cultura a intervenir d’oficiu en casu de nun lo facer pa evitar daños irreparables nun padremuñu de tan considerable valía arqueolóxica.