también en castellano
IAS conviértese
na primer organización asturiana n’axuntase
a la campaña europea contra la directiva
Bolkestein
Más de 100.000
persones y 100 organizaciones europees participen
nesta campaña contra una directiva que
diba poner en peligru elementos fundamentales
pa la cohesión social como la sanidá,
la educación, les pensiones, etc.
Izquierda Asturiana (IAS)
axuntóse esta selmana a les voces qu’en
toa Europa tenten de detener la directiva del
anterior comisariu européu, el lliberal
holandés Frits Bolkestein,
que pretende lliberalizar la circulación
de los servicios nos estaos de la Unión
Europea. Colectivos ciudadanos como ATTAC
y OXFAM, sindicatos como la CGT francesa o partíos
políticos como el Partíu Socialista
de Bélxica, o el Partíu Comunista
de Francia tamién faen parte d’esta
campaña europea. IAS conviértese
d’esta manera na primer organización
d’ámbitu asturianu n’axuntase
a esta campaña.
D’adoptase esta midida, tolos servicios
suministraos na Unión Europea diben considerase
como cualquier mercancía.
La directiva Bolkestein punxo en guardia a bien
d’organizaciones sociales, polítiques
y sindicales de toa Europa que, dende’l
pasáu mes de marzu, llevantanon la voz
pa lluchar contra esta auténtica agresión
a elementos fundamentales pal bienvivir
social como son los sistemes públicos
de pensiones, les polítiques
d’integración, el
sistema sanitariu, o los derechos
de les y los trabayadores consagraos
poles distintes lleis nacionales. Per otru llau
otru elementu clave que diba carecer de los efectos
d’esta lliberalización
sería’l sistema educativu
de los diferentes estaos, o les polítiques
de discriminación positiva y excepción
cultural. Esto supondría una agresión
a elementos fundamentales pa la cohesión
social como la educación, la cultura, la
sanidá o cualquier otru serviciu arreyáu
a la protección social que pasaríen
a tar suxetos a les formes de llibre competencia
económica.
Dende Izquierda Asturiana (IAS) camentámonos,
al igual que’l restu d’organizaciones
adheríes a la campaña, qu’una
directiva sobre los servicios nel mercáu
internu européu tien que reflectir los
condicionantes que vienen darréu:
-
El
campu de campu d’aplicación de
la directiva tien que ser llimitáu
y facer la estremancia ente los servicios
d’interés públicu (SIX)
y otres clases de servicios. Esto
“blindaría” a aquellos
servicios que garanticen la cohesión
social nos distintos estaos. La sanidá,
la educación, les pensiones o les distintes
polítiques dirixíes a les minoríes
nun pueden entrar na rueda de la llibre competencia,
nun pueden convertise, en nengún casu,
en simples mercancíes.
-
Los
diferentes Estaos han de tener potestá
pa regular y controlar la prestación
de ciertos servicios sobre’l so territoriu.
Tal y como venimos denunciando dende Izquierda
Asturiana (IAS) va cuantayá (foi una
de les exes de la nuestra petición
de votu negativu a la Constitución
Europea), l’ausencia d’un auténticu
Estándar Social Européu abre
la puerta a posteriores desregulaciones de
los Servicios d’Interés Público
(SIG). Énte la propuesta de la directiva
Bolkestein los estaos tienen que ser a establecer
un marcu particular que protexa’l bienvivir
de los sos ciudadanos y ciudadanes.
-
Tien
qu’imponer a los prestatarios de servicios
sometese al regulamientu del Estáu
miembru en que presten los sos servicios.
La directiva Bolkestein prevé l’aplicación
del principiu del país d’orixe
lo que significa que’l prestatariu namái
está sometíu a la llei del estáu
nel que ta establecíu. Esto implica
un peligru grave enforma al permitir a les
empreses prestataries de los servicios afincase
naquellos estaos con un nivel social que seya
más baxu, evitando asina sometese a
les reglamentaciones más restrictives
vixentes n’otros estaos. Esto diba xenerar
amás una dinámica que llevaría
a los distintos gobiernos de los estaos a
entrar nuna “carrera” por conseguir
el réxime menos estrictu pa evitar
la pantasma de la deslocalización.
L’aplicación de la directiva
va facer imposible’l control de les
condiciones llaborales de los trabayadores
desplazaos.
A pesar de los puxos de la sociedá civil,
una gran mayoría d’Estaos miembros
muéstrase anguaño favorable a l’adopción
inmediata d’este proyectu de Directiva.
Trátase d’una decisión que
nun rique d’unanimidá
polo que nengún gobiernu, y menos entá
un partíu políticu, puede impedir
por sí solu l’adopción d’esta
Directiva.
Dende Izquierda Asturiana (IAS)
camentámonos que namái una fuerte
movilización de la sociedá civil
dientro de la Unión diba ser a torgar l’aplicación
d’esta directiva que supón un recule
brutal nel bienvivir de la ciudadanía y
que diba valir pa derromper el camín a
futures midíes internacionales de corte
neolliberal como l’Acuerdu
Xeneral de Comerciu de Servicios (AXCS)
de la Organización Mundial de Comerciu
(OMC).
Izquierda Asturiana(IAS)
Estaya de Comunicación
Uviéu a 10 d'avientu de 2005
más información
en la web oficial de la campaña:
http://www.stopbolkestein.org
|
