1. El contestu políticu del Plan

Ye preciso asitiar esti Plan nun contestu determináu, el del Pautu de Gobiernu remanecíu de la negociación ente PSOE y IU-BA. Esti alcuerdu de gobiernu, robráu nel branu de 2003, supunxo una gran decepción ente los defensores de la llingua asturiana darréu qu'en momentu nengún se plantea nel mesmu, nin siquiera como horizonte deseyable, la oficialidá de la llingua asturiana, un deséu que munchos esperaben ver cumplíu al ser un puntu importante del programa d’IU-BA.

La decepción ametió cuando s’anunciare que la Conseyería de Cultura diba dexase en manes del PSOE, lo que facía prever tolos pilancos del mundu pa llevar a cuelmu cualquier aición de normalización de la llingua, magar de que nel Pautu s’establecíen un refileru de midíes al respective, ente elles l’aprobación d’un Plan de Normalización.

Si analizamos el conteníu del pautu de gobiernu en materia llingüística, lo que paez l’únicu avance sustancial ye precisamente l'aceptación per parte del PSOE del términu “normalización”, que suponía un pasu alantre en rellación coles polítiques anteriores d’anteriores gobiernos que se llimitaben a la pura promoción de la llingua. Efectivamente la introducción d’esti conceptu ye un avance importante darréu que la normalización llingüística foi dende siempre l’oxetivu del movimientu de recuperación llingüística, que pretende que l’asturianu volvia a recuperar o ganar ámbitos d’usu en toles esferes sociales, que la conviertan nuna llingua normal, afitando’l derechu al so emplegu. Inclusive, nos últimos años el movimientu de reivindicación llingüística recalcó en que l’oxetivu del mesmu nun ye la oficialidá sinon la normalización llingüística, polo que la oficialidá nun ye un fin, sinon el puntu de partida dende’l que se pue avanzar camín de la normalización.

Ciertamente, el términu normalización nun ye un términu inocuu y d’aende les fuertes resistencies del PSOE a almitilu, darréu que presupón un conceptu de cambéu radical na situación d’una llingua minorizada y conlleva una serie de polítiques actives d’aición afirmativa pa dar la vuelta a una situación y a una inercia histórica que contribúi a la postergación d’una llingua, nesti casu l’asturiana. La normalización supón un pasu más allá de la pura promoción porque presupón que la situación anguaño de la llingua ye anormal y los derechos de los sos falantes son conculcaos. Promocionar y normalizar nun son términos excluyentes, toa normalización requier una promoción, pero non toa promoción conlleva una normalización. Promocionar consiste simplemente en tomar una serie de midíes a favor de la llingua, normalizar conlleva una planificación de futuru qu’afecta a tola sociedá, per aciu de la cual se quier facer de la llingua minorizada una llingua con plenitú d’usos sociales n’ámbitos públicos y privaos.
En definitiva, con una predisposición del PSOE como la que conocemos, y col pocu enfotu en defender la so opción llingüística per parte d’IU-BA la maniobra distractoria del PSOE taba cantada. Como los fechos tán demostrando, el PSOE en momentu nengún tuvo intención de dir más lloñe de lo que yá foren gobiernos anteriores del PSOE como’l de Pedro de Silva y IU-BA nun taben dispuestos a dexar más plumes nel camín por esta cuestión cuando nel gobiernu hai milenta frentes de conflictu.

Desgraciadamente, como yá denunció IAS nel so momentu, la introducción del términu normalización, nun contestu como’l descritu, nun foi otro qu’una solución de compromisu, un xuegu de palabres tramposu nel que’l PSOE almite’l términu, por más qu’asume’l conceptu, y IU-BA asume que les polítiques “posibles” son les de la mera promoción, endolcada en propaganda y en terminoloxía pseudollegal y pseudocientífica.

Por tanto, al nun se contemplar nin la posibilidá d’un cambéu en marcu llegal, nin siquiera la posibilidá de cumplimientu de la Llei d’Usu esistente, simplemente “normalizar” ye’l nuevo nome que n’Asturies se da a lo que siempre se llamó “promocionar”.

De nun ser asina l’alcuerdu de gobiernu taría planteando una cuadratura del círculu; la supuesta posibilidá de la normalización llingüística ensin la oficialidá de la llingua, ello ye, la posibilidá de qu’una llingua algame un estatus de normalidá social ensin que tea n’igualdá de derechos llegales.

2. El procesu d’ellaboración del Plan

Tuvo que pasar la metá de la llexislatura pa que’l Conseyu de Gobiernu apruebe un Plan de Normalización Social que permaneció nos caxones de la Conseyería per meses. En tou esti tiempu asistiemos a dellos fechos sobre manera llamaderos. Como yera de prever, la presencia de sectores defensores de la oficialidá y de la llingua asturiana en Gobiernu creó importantes tensiones dientro de los defensores de la normalización llingüística. Ye más, dende dalgunos sectores tentóse con especial vehemencia y de forma absolutamente inxusta y fuina, responsabilizar a sectores defensores de la oficialidá que siempre demostraren facer análisis coherentes y responsables y que nun tienen capacidá nenguna d’influyencia na ellaboración de la política llingüística, de la imposibilidá d’avances sustanciales pol so “negativismo frustrante”, en palabres de la conseyera Migoya.

Esta boutade argumental nun merecería nin siquiera una mención darréu que resulta absolutamente vergonzante pa cualquier persona familiarizada col desenvolvimientu y planificación de polítiques llingüístiques, pero ye preciso desamazcarala esplícitamente porque ye defendida como dogma por sectores de defensores del asturianu afines al gobiernu, especialmente pol “Observatoriu de Política Llingüística”, ente que tien como función operar como un lobby pretendidamente independiente d’apoyu a la Oficina de Política Llingüística y que magar de presentase como un organismu independiente cuenta con una mayoría de miembros vinculaos d’una o otra manera al gobiernu de PSOE/ IU-BA.

Al traviés de persones venceyaes a esti Observatoriu y otres persones afines tamos asistiendo nos últimos tiempos a un baille terminolóxicu y conceptual en que se xuega cola ignorancia, la desconocencia y la mala fe a partes iguales. Ello ye, empecípiase a entrar nuna ceremonia de la confusión na que partiendo d’una premisa falsa; la de que ye posible la normalización ensin igualdá d’estatus llegal, acaba llegándose a l’aberrante conclusión de que quien niega esa posibilidá (que ye de por sí una contradicción nos términos) ye un axente que trabaya en contra de la propia normalización.

Esti debate sobre la normalización y el pautu de gobiernu dexó de pasu nun segundu planu otra realidá sangrina, l’incumplimientu flagrante de la Llei d’Usu y promoción del Bable/ Asturiano que’l Gobierno del PSOE decidió nun aplicar y que paez perder virtualidá al aprobase un Plan, que vendría a ser un sustitutu o aplicación d’aquella.

Nesti contestu y depués de múltiples postergamientos, apruébase un plan nel que se detallen 68 aiciones pa “normalizar” (llamémoslo asina, inda ente comines, pa estremar la normalización tal como la entiende'l conxuntu de la sociollingüística de la “normalización” tal como la entiende’l nuesu gobiernu).

3. Esto nun ye plan

Desgraciadamente dende Izquierda Asturiana (IAS) hemos dicir que nos allegraremos de cualquier avance por mínimu que seya en materia llingüística pero que nun tamos dispuestos a que se nos faiga pasar poxa por tamu con un documentu que: