MIAS Y IAS REIVINDICARON LA REVOLUCIÓN
DE XÉNERU NEL DÍA DE LA MUYER

Nos actos qu’ocuparon la tarde del miércoles 8, dambes organizaciones fixeron un apueste por continuar nuna llucha pola igualdá real basada nel desmonte del modelu patriarcal

Delles decenes de persones tuvieron a les cinco la tarde nel salón d’actos del edificiu polivalente del Campus del Milán, na Universidá d’Uviéu, p’asistir al actu entamáu por Mocedá d’Izquierda Asturiana y Izquierda Asturiana: “Rellaciones patriarcales n’estremaos ámbitos”. Esi fo’l títulu de la mesa redonda qu’ellí tuvo llugar y que s’allargó per más de dos hores. Nella, cinco muyeres procedentes d’estayes diferentes fixeron la so aportación especializada y debatieron coles demás y col públicu asistente, entrando amás n’otros temes comunes y d’interés xeneral pa la reivindicación feminista.

Abrió la mesa redonda Yolanda Huergo, abogada y perteneciente al Grupu de Moces y Muyeres d’Izquierda Asturiana, desplicando la composición de la mesa y sorrayando la necesidá d’afondar nesti tipu d’actos nos que la muyer tenga la pallabra y nos que dende les estremaes estayes de la sociedá podamos arriquecer un discursu feminista que mos empobine na llucha por una igualdá real.

Continuando como presentadora de la mesa, Huergo dio pasu a Cristina Pardilla del grupu de llesbianes Tríbadas, enxertu nel colectivu pola defensa de los derechos de los gais, les llesbianes y les y los transexuales, Xente Gai Astur (XEGA). Cristina fixo un averamientu a la realidá cotidiana de la muyer llesbiana na nuesa sociedá, repasando toles estorbises coles que topen al tentar d’exercer los sos derechos: “la muyer llesbiana ha lluchar por esbarrumbar una doble discriminación, la que vien del fechu de ser muyer, y la que surde de la condición homosexual d’ésta”. Atentamente, la portavoz de Tríbadas respondió a les entrugues que-y fixeron dende’l públicu y les mesmes compañeres de mesa, recalcando’l fechu de les especiales dificultaes coles que vive güei la muyer llesbiana, arrecostinando quiciabes más que naide con pesaos prexuicios, “productu d’estereotipos qu’hemos baltar”.

La siguiente participante foi la sah.araui Fatima Ahmed-Shalem, psicóloga y doctoranda na Universidá d’Uviéu, que centró la so esposición nel papel de la muyer tanto nel Islam como nel casu particular del Sáh.ara. Entamando con una contestualización sobre lo que ye l’Islam y una desplicación de la Historia reciente del Sáh.ara, criticó la imaxe que, por imposición mediática, tiense del mundu árabe n’Europa, lo que ye ensin duldes ún de los tópicos más recurrentes na actualidá. Contra esti tipu d’estereotipos, Fatima apostó por conocer más y meyor la so relixón, faciendo una llectura fiel d’El Corán. Según Ahmed-Shalem, la muyer sah.araui cunta con mayor llibertá que lo que suel ser normal n’otros países árabes, anque, polo que señaló la psicóloga, la tresformación de los roles de xéneru n’aquel país ye entá un procesu a mediu camín. Delles entrugues y munches referencies a la so intervención fixeron que’l debate s’abriera a una sala encantada de tar sintiendo en boca de Fatima Ahmed-Shalem la bayurosa información que sobre la muyer islámica y sah.araui ufrió.

De siguío, intervieno la estudiante de Maxisteriu na Universidá d’Uviéu y componente del grupu de pandereteres Dulcamara, Paula Cristóbal. La so aportación basóse nel papel de la muyer na música tradicional asturiana, un tema mui ampliu y del que pudo facer un interesante resume pal auditoriu. Cristóbal recordó que la muyer tien sío y ye l’eslabón fundamental pa tola tresmisión de la tradición oral del nuesu país, de fechu, anguaño, los más de los testimonios que se tán recoyendo son de muyeres. D’otra, fixo referencia al cambiu de roles: si enantes la gaita yera un instrumentu únicamente masculín, agora mui bien de muyeres tóquenla, del mesmu mou qu’hai años yera motivu de risión ver a un paisanu tocar el panderu y agora entama a vese como una posibilidá más. El machismu esistente na industria musical o nos mesmos circuitos del folc asturianu foron otros temes que Paula Cristóbal revisó xunto a les aportaciones de les demás convidaes y el restu de persones que taben nel salón d’actos.

Pa rematar, Pilar Fernández, profesora d’institutu y doctora en Filoloxía con una tesis sobre la lliteratura femenina, averónos a esti ámbitu de creación artística dende la perspectiva de la muyer, dándonos delles de les claves pa entender qué ye la lliteratura femenina. Tamién faló la profesora Pilar Fernández sobre la importancia que tien que les muyeres escriban y la manera en que lo faen: “El fechu mesmu de qu’una muyer decida escribir, ye dalgo subversivo”. Dende la intencionalidá cola que cada escritora trabaya la so lliteratura podemos topanos con mui bien de matices qu’informen de lo más fondo del sentir ideolóxicu y creativu de l’autora. Asina, fixo referencia tamién a la necesidá de francer la idea de que les muyeres heban vistise d’un determináu modelu de muyer (tan de moda agora) en cuentes d’escoyer llibremente aquello que de los modelos-y preste a caúna. La doctora Fernández zarró la so intervención comparando la lliteratura escrita por homes y muyeres al traviés de los rasgos que se dan con más frecuencia nun sexu que n’otru.

Depués d’un nuevu turnu de preguntes y un espaciu pal debate abiertu, púnxose’l piesllu a esta mesa cola actuación del grupu de pandereteres Dulcamara, que metieron al públicu en bolsu dende’l primer güelpe de pandereta. Dulcamara ye un grupu de cinco moces que surdió de la idea de recuperar la figura de les pandereteres (perespardida per tol país antaño) llevándola, amás, más alló del ámbitu del baille y les agrupaciones d’estudiu folclóricu. La puesta n’escena de vieyos sones y lletres al traviés de la enerxía d’estes manes moces allegra l’ánimu y respinga les coraes.

En trancando les puertes del actu, un cortexu de militantes y simpatizantes de MIAS y IAS empobinóse a la puerta’l Teatru Campoamor onde a les ocho la tarde entamó una concentración unitaria promovida pola Plataforma 8 de marzu, na que participa’l Grupu de Moces y Muyeres d’IAS y MIAS. Ellí siguió espardiéndose bien del material diseñao pa la ocasión, el cartafueyu d’información de Mocedá d’Izquierda Asturiana “Na cai”, asina como la nueva chapa reivindicativa d’esta organización: “Llucha pola igualdá”.

La mesma Yolanda Huergo intervieno na concentración lleendo unes breves pallabres sobre la posición feminista d’IAS/MIAS:

"Otra vegada énte'l 8 de marzu, Día de la Muyer, IAS y mias>> quieren afitar la so llucha por algamar una sociedá llibre de prexuicios, una sociedá que refugue los patrones culturales patriarcales y que promueva una igualdá real."

"Poro, facemos un apueste por una fonda revolución de xéneru basada na discriminación positiva dirixida a algamar la plena igualdá d’oportunidaes en tolos ámbitos, desixendo la necesidá de dir muncho más alló de les cosmétiques campañes institucionales a les que tamos avezaes. Desgraciadamente los malos tratos a la muyer siguen impidiendo qu’esti día seya una celebración, faciendo precisu un plan de choque contra la violencia de xéneru que desendolque midíes dures y disuasories contra los agresores y que fomente la coeducación imprescindible tamién fuera de la escuela. Una coeducación qu’había tar siendo yá ún de los pegollos colos que construyir una verdadera escuela pa la ciudadanía, inclusiva y igualitaria en tolos aspectos. "

"L’establecimientu d’auditoríes sobre la discriminación de xéneru en toles estayes y organismos públicos y privaos ye yá una vieya reivindicación d’esta casa. Dende Izquierda Asturiana y Mocedá d’Izquierda Asturiana vamos siguir trabayando por esparder la llucha, por un nuevu modelu de rellación ente homes y muyeres, afalando a les y los qu’agora tán en gobiernu pa que diseñen y apliquen estratexes empobinaes a consiguir la igualdá salarial… y de toa índole dafechu ente muyeres y homes y d’una vez yá."

"¡Puxa la revolución de xéneru!
¡Llucha pola igualdá!"