también en castellano
A
75 años de la II República
Cúmplense güei 75 años de
la proclamación de la II República
Española. Poques feches de la Historia
española y asturiana tienen tanta sonadía
como esta, que ye celebrada por bona parte de
la esquierda, especialmente d’unos años
p’acá.
La II República llegó nun contestu
internacional abondo revesosu pa un proyectu
democratizador como esi. En medio de
la crisis económica internacional de 1929,
con cásique toles democracies lliberales
europees achuquinaes o en procesu d’ello
pol facismu y sucedáneos, que nel Reinu
d’España se proclamare la república
democrática como salida a la dictadura
de 1923 yera un procesu a contracorriente
que necesariamente llenaba d’estorbises
el camín del nuevu réxime.
Pero la república llegó, y llegó
encima d’una fola inmensa de gayola
popular. Sicasí, nunos años
el masivu consensu ciudadanu en sofitu del nuevu
réxime yá sufriere argayos abondos:
los propios errores de los gobiernos d’esquierda
sirvieron pa enanchar la base social de la derecha
reaccionaria qu’en 1936 entamó
l’asaltu del poder con un apoyu popular,
minoritariu pero importante, que nun tenía
en 1931. N’Asturies, la mitificada Asturies
revolucionaria, tamién.
Munchos fueron los errores de la República
de 1931, por acción y por omisión:
el so centralismu, mazcaráu
d’autonomismu asimétricu
que foi base d’agravios territoriales; lo
apocao de les reformes sociales, que-y restaron
apoyu ente unes clases populares qu’esperaben
too de la República y nun recibieron cásique
nada; el revanchismu anticlerical, que nun valió
namás pa quita-y poder a la Ilesia, cosa
mui necesaria, sinón tamién pa humildar
en munchos casos a mases creyentes non necesariamente
reaccionaries. Pero la República tamién
fexo muncho por modernizar una Asturies y unes
Españes atrasaes y alienaes: la reforma
educativa, la Constitución
de 1931, que con tolos sos fallos yera de les
más avanzaes d’Europa, el laicismu,
el votu de la muyer, etc. La
República de 1931 yera tamién la
de 1934, que reprimió
xabazmente la revolución asturiana. Les
sos contradicciones son tamién les nuestres:
l’actual esquierda asturiana ye la heriede,
biolóxica y/o ideolóxica, d’aquella
qu’en 1934 quería achuquinar la República
burguesa y en 1936 defendíala frente a
unos militares qu’en 1934 ayudaren a defendela
de la esquierda…
Güei, en 2006, el republicanismu
asturianista que representa Izquierda
Asturiana (IAS) ve’l 14 d’abril
como una bona ocasión pa rindi-y homenax
sinceru a tolos homes y muyeres qu’en 1931,
1934 y 1936 defendieron, colos votos y coles armes,
la democracia y la xusticia
social, y como un bon momentu pa reflesionar
sobre los errores cometíos, les oportunidaes
perdíes y les idees qu’han d’empobinar
un proyectu d’emancipación social
y nacional del nuestru pueblu, el pueblu asturianu.
La nuestra república nun ye nin la I nin
la II, sinón la que ta por facer, la República
Asturiana, la República social, la que
traduza al asturianu los valores de la llibertá,
la igualdá y la fraternidá. Vaiga
dende equí el nuestru homenax a tolos antifacistes,
d’Asturies y de tolos demás pueblos
del Estáu, y el nuestru saludu a tolos
republicanos que lluchen escontra esti réxime
de la II restauración.
Salú y República
Faustino Zapico
ye miembru de la Dirección Nacional d'IAS
N'Uviéu, a 14 d'abril de 2006
|
