Día de les Lletres Asturianes

L’añu pasáu nesta mesma manifestación, Izquierda Asturiana (IAS) repartía un folletu analizando’l llamáu “Plan de Normalización” aprobáu pola Xunta Xeneral nel que se facía una valoración mui crítica del Plan y de la política en materia llingüística del Gobiernu asturianu. En dellos sectores afines al Gobiernu acusóse inxustamente a Izquierda Asturiana (IAS) de facer parte d’un supuestu bandu de los duros o de los del “cuanto peor meyor”, cuando dicíemos que'l Plan de Normalización, non solo nun diba iguar los problemes de la llingua asturiana sinon que yera una cortina de fumu pa tapecer la inexistencia de política llingüística asturiana.

Esti añu, por desgracia, tenemos que dicir que’l tiempu dionos la razón puntu a puntu y que la situación ye inda peor que l'añu pasáu:

- L’ente públicu de comunicación que diba ser, según el pautu de Gobiernu, ún de los pegollos de la normalización llingüística, despreció la llingua asturiana nel so procesu de selección de personal y nun tien nengún plan específicu d’usu del asturianu
- La toponimia, l’únicu campu nel que se podía dicir que taba habiendo un avance bultable ta secuestrada por un gobiernu que nun apreba los espedientes daos de pasu polos conceyos y pon milenta torgues pal trabayu de la Xunta de Toponimia.
- Los Servicios de Normalización de los conceyos tán allancaos, dellos paraos dafechu y otros trabayando en precario pa sacar alantre unes polítiques pa les que nun tienen apoyos nin medios.
- Siguimos teniendo una llingua prohibida, que se marxina na presentación de tesis na Universidá, en Congresos d’organismos oficiales por nun ser oficial.
- L’asturianu na enseñanza sigue siendo materia de segunda que miles d’escolinos y escolines nun tienen la opción d’escoyer.

Esto ye amazcarar la mesma realidá con bones pallabres y con fumu, que cuando escampla dexa ver lo de siempre: un apueste por desaniciar la llingua d’Asturies.

Dicir qu’ente esta política etnocida del PSOE la meyor defensa del asturianu posible ye la que ta faciendo IU-BA, que condiciona un gobiernu, ye rise de los falantes y los defensores de la llingua asturiana y un insultu a la intelixencia de cualquier persona. Y ye especialmente triste cuando se fai dende les posiciones inmorales y utilitaristes de dellos sectores marxinales que con vocación revisionista intenten tapecer l’argayu de fracasos y el probe balance de la so opción política, IU-BA, con un discursu que califiquen de renovador y nun ye otro qu’un puru disolvente col que quieren convencenos de que la defensa de la llingua nun ye importante.

Sicasí, la visión que dende IAS queremos tresmitir esti Día de les Lletres, ye como siempre una visión positiva, porque la mayoría de la sociedá asturiana sigue apostando pola oficialidá y pola sobrevivencia de la nuestra identidá. Nesi sen tenemos como exemplu el trabayu del CAO, que ta llevando la reivindicación a delles zones del país con una respuesta inmeyorable. Trabayando toos y toes na mesma dirección, colos oxetivos claros y la flexibilidá precisa, podemos facer de la cuestión de la Oficialidá l’asuntu clave na próxima reforma y dexar bien claro qu’esti problema nunca nun se va zarrar si nun ye reconociendo los derechos que yá tienen otros ciudadanos y ciudadanes del Estáu. Pero tamién ye verdá que la voluntá política nun naz de les bones palabres y solo va dase cuando apostemos por ferramientes polítiques d’obediencia asturiana que son les úniques que puen condicionar de verdá un amparu llegal pa que’l nuestru idioma puea ser normal na sociedá y podamos, nós y los que vengan detrás siguir viviendo n’asturianu. Ye hora de dexar de creyer nos atayos y nos milagros, de dexar de vender motos. Ye hora de trabayar.