Crónica de los actos del 25 de mayu

La selmana del 22 al 28 de mayu tuvo estrada d’actos entamaos por Izquierda Asturiana (IAS) pa conmemorar el 198 aniversariu de la revolución de mayu de 1808. Col envís de recuperar esa fecha tan importante pal nuestru pasáu colectivu, IAS quixo facer un exerciciu de recuperación de la memoria histórica, y por eso’l miércoles 24 de mayu dábase nel Conceyu Abiertu del Llar Solidariu d’Uviéu la conferencia La revolución de mayu de 1808 (o l’aniciu de la Historia Contemporánea d’Asturies) a cargu de Faustino Zapico, historiador y miembru de la Dirección Nacional d’IAS. Zapico fexo un repasu de la sociedá asturiana a lo primero del sieglu XIX, asina como de los acontecimientos que dieron orixe a les xornaes de mayu de 1808, la proclamación de soberanía, el golpe militar de mayu de 1809, les llectures posteriores que se fexeron d’aquellos acontecimientos dende estremaes corrientes polítiques y les razones poles que’l procesu de mayu debe entendese como una revolución, un actu soberanista y un elementu de memoria compartida ente tolos asturianos y asturianes. La conferencia, que ye un estractu de los primeros capítulos del trabayu d’investigación que lleó Zapico en 2004 na Universidá d’Uviéu, va ser editáu esti branu como númberu 1 de la colección Biblioteca d’Izquierda Asturiana.

El 25 de mayu, a les 12:30 de la mañana, militantes y simpatizantes d’IAS y MIAS fexeron una ofrenda de lloréu cola lleenda Izquierda Asturiana (IAS) a los revolucionarios de 1808 énte la sala capitular de la catedral d’Uviéu, que yera’l llugar onde aconceyaba la Xunta Xeneral y onde se fexo la histórica proclamación de la soberanía asturiana aquella mañana de 1808. Una breve intervención de Zapico volvió a sorrayar los acontecimientos más importantes d’aquelles xornaes y hubo amás un pequeñu intercambiu d’opiniones ente les persones asistentes al actu, onde rescampló la necesidá de proyectar el 25 de mayu non únicamente como fecha d’alcordanza, sinón como exemplu de futuru.

Precisamente eso foi lo que se fexo’l día 26, cola cena de militantes y simpatizantes d’IAS y MIAS celebrada n’Uviéu y zarrada cola entrega del I Premiu 25 de mayu. Esti premiu, qu’IAS institúi como forma de premiar aquellos colectivos que destaquen pola defensa de los intereses colectivos asturianos dende’l principiu de l’autoorganización ciudadana, cayó nesta primer edición na Coordinadora Ecoloxista d’Asturies, pola so defensa insobornable del mediu ambiente. Fructuoso Pontigo, en nome de la Coordinadora, fexo una breve intervención onde destacó la necesidá de siguir lluchando escontra’l modelu productivista y xabaz entamáu dende’l gobiernu asturianu y munchos conceyos y garró’l premiu, consistente nuna reproducción de la bandera asturiana de 1808.

Pa rematar, zarró l’actu Inaciu Llope, portavoz de la Dirección Nacional d’Izquierda Asturiana, con una intervención política onde destacó’l trabayu fechu por IAS esti añu, espeyáu na medría d’actividá y militancia, y repasó’l llabor llaceriosu del gobiernu asturianu, encamentando al partíu a trabayar na construcción d’una ferramienta política alternativa a esi estáu de coses.

Como acabu d’esta crónica d’un aniversariu que foi escaecíu y ignoráu dafechu pola clase política asturiana, hai que dicir que l’otru sábadu 27, nun actu políticu del PSOE de Mieres, el presidente Areces fexo referencia a qu’esa selmana tábemos los asturianos y asturianes “acabantes de celebrar la declaración de soberanía del 25 de mayu de 1808”. ¿Celebración de quién?