también en castellano

¡¡Non a la contrarreforma llaboral!!

IAS y MIAS participen na convocatoria unitaria de la esquierda sindical y política

Esti martes 20 de xunu va haber en Xixón una manifestación entamada polos sindicatos CSI, SUATEA, CGT y sector críticu de CC.OO., les organizaciones polítiques Izquierda Asturiana (IAS), Andecha Astur, PCPE y Bloque por Asturies y les organizaciones xuveniles Mocedá d’Izquierda Asturiana (MIAS), Darréu, CJC-CMC, UJCE y Sindicatu d’Estudiantes, asina como’l FUSOA y El Militante. Toes estes organizaciones coincidimos na denuncia de la nueva contrarreforma llaboral, antroxada d’”alcuerdu pa meyorar la competitividá y l’empléu” y amagostada pol gobiernu central, la patronal CEOE y los sindicatos mayoritarios CC.OO. y UGT.

Esta contrarreforma ye inaceptable tanto pola forma como pol so conteníu. Pola so forma, pol secretismu de les negociaciones, que dexa bien clara la mala conciencia d’estos cabezaleros sindicales ganaos dafechu pa la causa lliberal. Pol so conteníu, porque ye xusto lo contrario de lo que los sos defensores afirmen: nun val pa torgar la precariedá llaboral, yá que permite bien de falcatrúes llegales pa siguir col modelu de rotación nel empléu. Pero a cambiu d’esa falsa virtú, abarata’l despidu (baxa de 45 díis por añu y un másimu de 42 mesualidaes a 33 y 24 respectivamente), sigue financiando a la patronal por cumplir la llegalidá, en forma de bonificaciones en cuotes a la Seguridá Social, aumenta’l númberu d’años computables pal cálculu de la pensión y endurez les condiciones d’accesu a la jubilación anticipada.

Too ello supón un nuevu procesu de trasferencia de rentes del trabayu a rentes del capital, col preste, eso sí, de la mayoría sindical y de la “esquierda plural” que gobierna n’Asturies y configura la mayoría parlamentaria en Madrid, polo que supuestamente tenemos que tar contentos y felices de que la explotación seya agora “progresista”.

Dende Izquierda Asturiana (IAS) valoramos mui positivamente la esistencia d’una plataforma unitaria (esta vez sí) pa denunciar esta nueva agresión a los derechos sociales. Les direcciones sindicales y polítiques qu’articularon a les clases populares asturianes de forma hexemónica dende la II Restauración yá amosaron que nun son una ferramienta amañosa. Faen falta nueves organizaciones y nueves direcciones, que partan de la independencia de clase y de la independencia orgánica respecto del modelu sucursalista sindical y políticu que permitió la voladura del sistema productivu asturianu a cambiu d’una enorme rede clientelar que conderga a la mocedá asturiana al paru, la precariedá o la emigración.

más: [Manifiestu unitariu]