también en castellano

Izquierda Asturiana (IAS) de Xixón pide cambeos sustanciales na Gaceta Municipal

Pablo Rodríguez defende les propuestes d’IAS como forma de facer de la Gaceta una “ferramienta de participación ciudadana y de pluralismu”

Izquierda Asturiana pide un refileru de “cambeos sustanciales” na “Gaceta de Gijón” de cara a que se convierta nun verdaderu mediu d’espresión ciudadana y reflexe los estremaos puntos de vista que los ciudadanos y colectivos de la nuestra ciudá tienen sobre’l presente y el futuru de Xixón, situándose “lloñe de lo que ye agora, un mediu d’autobombu del gobiernu municipal pagu por toos pa publicitar los supuestos llogros del PSOE y el so subordináu, Izquierda Unida”. Estos cambeos propuestos por IAS garren especial relevancia y actualidá depués de la reciente edición del desgraciadamente célebre llibru anónimu de propaganda ‘Construyendo Asturias en Gijon’, un exemplo delirante de agitprop partidariu costeáu por tolos habitantes de la ciudá.

El portavoz en Xixón d’Izquierda Asturiana, Pablo Rodríguez, detalló los cambeos propuestos pola formación asturianista. Per un llau “trátase d’abrir les páxines de la Gaceta a la participación de colectivos políticos, sindicales, sociales, culturales o de cualquier otra mena que puean aportar los sos puntos de vista y dalo a conocer a la ciudadanía. Pa ello tien que s’acutar un espaciu col oxetivu de que puean aparecer tribunes d’estos colectivos”. D’igual miente tamién “tien que s’abrir a la collaboración ciudadana, a traviés de la creación d’una Tribuna Ciudadana onde tengan cabida les quexes y suxerencies de les y los xixoneses”.

Na mesma llinia Izquierda Asturiana cuida necesario que se faiga “una edición dixital de la Gaceta abierta a la participación de los xixoneses per mediu de la tarxeta ciudadana como manera d’acceder a los espacios na web que deberían reservarse a les opiniones de los habitantes del nuestru conceyu en forma de foros y grupos de debate”.
Pa Pablo Rodríguez ye tamién fundamental que la “Federación d’Asociaciones de Vecinos (FAV) tea presente nel conseyu de redacción de la Gaceta como mediu de garantizar la pluralidá y l’averamientu a los problemes reales de los vecinos de Xixón”. Con ello Izquierda Asturiana recueye una de les últimes demandes de la federación vecinal de cara al Reglamentu de Participación Ciudadana que prepara la corporación municipal. Éstes y otres propuestes tán xenerando la refuga frontal del equipu de gobiernu de PSOE-IU, lo que demuestra, en palabres del portavoz local d’IAS, que “los mesmos que s’empapicen con expresiones como participación ciudadana, democracia participativa, etc… son los primeros en caer presa del pánicu y el nerviosismu cuando son los propios vecinos los qu’a traviés de les sos propuestes tenten d’avanzar nesti sen. Esti ye, al cabu y la postre, el verdaderu talante democráticu de l’autodenominada esquierda plural nel gobiernu xixonés”.

El portavoz local d’Izquierda Asturiana (IAS) recalcó que con estes midíes “diba abrise un espaciu de verdaderu pluralismu y crease un mediu abiertu a la participación ciudadana, una forma de comunicaron mutua ente’l gobiernu municipal, los colectivos políticos y sociales y los ciudadanos en xeneral que repercutiría nuna busca fructífera de soluciones pa los importantes problemes d’esta ciudá”.

Per último Pablo Rodríguez apostilló afirmando que “tamos énte una cuestión d’auténtica hixene democrática. Nun ye de llei qu’una publicación municipal nos vienda un Xixón idílicu (el que nos vienden los nuestros gobernantes) ensin que la ciudadanía tenga derechu a saber qu’hai otru Xixón que dende la crítica tamién fai la so aportación al bienvivir colectivu”. El portavoz d’IAS recordó que foi’l propiu Tini Areces el queva diez años defendió la puesta en marcha de la Gaceta Municipal con un artículu tituláu “Derecho a saber”. Pa Rodríguez la ciudadanía xixonesa “tien efectivamente derechu a saber, pero derechu a sabelo todo, y esi habría ser el fin últimu d’una Gaceta Municipal nun Conceyu democráticu”.