también en castellano

IAS denuncia que los datos económicos muestren una Asturies al debalu no económico

La organización nacionalista Izquierda Asturiana (IAS), a traviés del so portavoz nacional Ignaciu Llope, denuncia que “los datos fiscales y de desenvolvimientu económico vuelven a mostrar qu’Asturies ye un país ensin política económica de futuru, descompensao y que n’absoluto respuende al modelu idílicu y oníricu que nos presenta’l gobiernu asturianu nes sos bien conocíes campañes institucionales”.

Inaciu Llope fixo estes declaraciones desque se conocieren los últimos datos sobre la estructura fiscal y de desenvolvimientu económico n’Asturies. Estos datos aparecen nel Anuario de La Caixa, informe que se fai acordies cola cuota tributaria de les distintes actividaes empresariales y profesionales. Nel informe amentáu ye pa comprobase que namái siete conceyos del Principáu enantaren la so actividá empresarial nos últimos seis años, Carreño, Castriyón, Llanera, Noreña y Sotu’l Barcu y Tinéu ente 1999 y 2005. Amás, nel informe tamién se puede comprobar que Xixón, Uviéu Avilés y Siero sumen el 54% del total de los impuestos que recalda’l Principáu, vía IAE (Impuestu d’Actividaes Económiques). Esti informe tamién alvierte que los seis municipios más importantes d’Asturies (Uviéu, Xixón, Avilés, Siero, Llangréu y Mieres) y el propiu conxuntu de la economía asturiana perdieren pesu relativo nel conxuntu económicu estatal ente 2003 y 2004

Pa Inaciu Llope, “estos datos déxennos ver una Asturies qu’apenes medra n’actividá empresarial y profesional, y que si medra, failo con menos dinamismu qu’otres partes de Estáu Español. Amás esta medría concéntrase na zona centro, afondando nel desequilibriu económicu d’Asturies, aumentando una vegada más la distancia en desenvolvimientu económico ente’l centru y les ales d’Asturies”. Pal portavoz d’Izquierda Asturiana tamién son de molición los datos que falen de que n’otros 39 conceyos asturianos se redució l’actividá empresarial, y qu’Asturies perdió 0,1 puntos porcentuales nel so índiz d’actividá económica ente 2003 y 2004, pasando de representar el 2,2 por cientu de la economía española a suponer el 2,1 por cientu. Pa Inaciu Llope estos datos muestren a les clares que “Asturies nun va p’alantre, y que de manera nenguna ta “Construyendo Asturies pal sieglu XXI, por mucho que les campañes publicitaries d’esti gobiernu quieran facénoslo creer”.

Llope cuida que “los piores badagüeyos de la evolución de la economía asturiana tán cumpliéndose, al mostrar un país que nun ye quien a garrar ritmu nel so desenvolvimientu, amás de centrar ésti n’actividaes económiques que nun aseguren un futuru sustentable, como muestren los datos que falen de que los ingresos fiscales de l’Alministración asturiana crecen un 10%, principalmente por mor de la mayor recaudación d’impuestos lligaos a la compravienta de viviendes”. Pal portavoz d’Izquierda Asturiana el gobiernu de Vicente Álvarez Areces “nun ye a dirixir la economía asturiana, y encomiéndase a les soluciones fáciles de sectores económicos como’l lladriyu y les térmiques, dexando marchar otres formes de desenvolvimientu más interesantes y de futuru como foi’l casu de la fábrica de la empresa del grupu Haulotte, qu’implicaba 800 puestos de trabayu directos y que finalmente se llevó Cantabria”.

Inaciu Llope acabó pidiendo al gobiernu de PSOE y IX-BPA “que nun tenten engañar a los asturianos con campañes y declaraciones engañoses, porque la realidá los dexa en ridículu una y otra vuelta, abochornando a una sociedá asturiana que rique un gobiernu que vaya acullá de xestionar un crisis económica, si non que la supere y que la plantee en términos de desenvolvimientu sustentable y de futuru, campu nel que trabayamos n’Izquierda Asturiana.".