también en castellano

IAS espresa la so solidariedá colos sindicalistes Morala y Cándido González Carnero y arremete contra’l gobiernu municipal xixonés

Pablo Rodríguez espresa la so indignación énte l’actitú del PSOE y califica d’"esquizoide" la postura d’IU, con Jesús Montes “Churruca” a la cabeza

L’agrupación xixonesa d’Izquierda Asturiana quier mostrar la so solidariedá colos sindicalistes de la CSI (Corriente Sindical d'Izquierda) Cándido González Carnero y Juan Manuel Martínez Morala tres la petición per parte de la Fiscalía d’una pena de cuatro años de prisión y de 5.624 euros de multa pa indemnizar al Conceyu de Xixón.

El portavoz de l’agrupación xixonesa d’IAS, Pablo Rodríguez, afirmó que "tamos énte un casu de represión brutal contra dos persones conocíes por tolos vecinos y vecines de Xixón pola so defensa de la industria local, nuna ciudá que sufrió y sufre continues reconversiones qu’afecten a miles de families y que contrasten col triunfalismu que dende les instituciones municipales y autonómiques quier tresmitise a la ciudadanía".

P’Alonso ta claro que "cualquier persona medianamente informada nesta ciudá sabe que gracies a persones como Cándido o Morala, industries clave pal conceyu como Naval Xixón siguen funcionando y dando trabayu a muches persones. Y too ello en contra de la voluntá del conceyu y dalgunes empreses que dende va tiempu planificaren unes urbanizaciones de luxu nos terrenos del astilleru".

Dende Izquierda Asturiana se valora la petición de la fiscalía como "un pasu más na dinámica represiva de los gobiernos socialistes, que yá demostraren n’otres ocasiones el so verdaderu 'talante', poco avezaos a que la ciudadanía respuenda a les sos nefastes polítiques". Pablo Rodríguez resaltó’l fechu de que "seyan Morala y Cándido los escoyíos pa pagar los 'platos rotos' d’unes movilizaciones que faen que güei sigamos contando na nuestra ciudá col estelleru Naval Xixón. Escoyéren-yos a ellos como ‘chivos espiatorios' demostrando l’absoluta falta de vergüenza del gobiernu municipal qu’en cuenta d’apoyar la llucha de los trabayadores pol caltenimientu de los sos puestos de trabayu se afana en reprimir a aquellos qu’impiden cola so actitu íntegra y responsable que Xixón se convierta nun auténticu ermu socioeconómicu."

Per último el portavoz xixonés destacó l’"actitú esquizoide" d’IU en toa esta situación. "Nun ye de recibu que’l portavoz d’IU en Xixón (y excompañeru de los dos sindicalistes en Naval Xixón), Jesús Montes “Churruca”, venga agora a falanos d’un ‘ataque a la clas obrera’ cuando fai parte del mesmu gobiernu municipal que se persona como acusación contra los dos sindicalistes. De toes maneres tamos énte una muestra más del patéticu rol d’IU nos gobiernos xixonés y asturianu cola so política de ‘dir colos de la feria y volver colos del mercáu'. Exemplos abonden como’l casu del panfletu 'Contruyendo Asturias', la nula política llingüística (con represión a los colectivos asturianistes incluída) , les reformes de la laboral, etc.".