también en castellano

IAS muestra la so oposición al banzáu de Caliao nuna Asturies que "nun precisa más agua”

Izquierda Asturiana denuncia l’actitú hipócrita d’IU énte’l banzáu de Caliao

Izquierda Asturiana (IAS) como formación política que dende un principiu participa na plataforma contra’l banzáu de Caliao, cuida que nun se precisa la construcción d’esta infraestructura d’altísimu costu económicu y medioambiental. La formación política asturianista d'izquierdes cree firmemente nuna nueva cultura del agua que prime’l raciociniu na xestión d’esti recursu preciáu y opónse a obres que, como’l banzáu de Caliao, suponen una vuelta a la política de grandes infraestructures propies del franquismu que suponen, en tou casu, un intentu de matar mosques a cañonazos.El portavoz d’Izquierda Asturiana (IAS), Ignacio Llope recordó que “el mesmu director de Recursos naturales na pasada lexislatura Víctor Vázquez declaróse contrariu a la construcción de Caliao.”

Llope recordó que “el proyectu de Caliao descartóse pol anterior gobiernu del PP y pol so ministru de Fomentu y Obres Públiques Francisco Álvarez Cascos, que lo proscribieren del PHN. Namái el gobiernu actual del PSOE s’atrevió a resucitalu”.

Dende’l puntu de vista d’Izquierda Asturiana, Asturies nun precisa más agua. Pese a ser un país gran consumidor d’agua, por mor principalmente de la presencia ente nós d’Aceralia y Asturiana de cinc, grandes consumidores d’esti recursu, n’Asturies sigue sobrando agua. Lo que falta ye una xestión amañosa d’ello, daqué que se decide sistemáticamente nun abordar.

Pa la organización nacionalista nun ye casual que seya precisamente’l PSOE quien lleve alantre esta resurrección d’un proyectu yá periclitáu. Ye evidente que la construcción de Caliao namái ye a atalantase dende’l prisma de porgüeyos especulativos y espúrios de grandes consumidores y marafundiadores d’agua ansiosos d’esti recursu que correspuenden col modelu de desenvolvimientu p’Asturies que s’afala dende’l PSOE. La masiva construcción de residencies y xalés na costa y la fiebre de los campos de golf son parte de la horda de vampiros del agua atechaos baxo les ales del PSOE a los q’hai qu’axuntar al sector elléctricu.

Llope afirmó que “Izquierda Unida – Bloque por Asturies, fuerza qu’aprovecha toa ocasión pa declarase contraria al banzáu y pa resgase en públicu les vestimentes, sigue tando “al platu y a les tayaes”, presa del so sustanciosu pautu de gobiernu col PSOE, a quien sirve de palanganeru nesti asuntu como en tantos otros empara de la so cuota de poder. Los dirixentes d’IU llimítense a actuar como si ellos nun foren parte del gobiernu, cuando ye’l gobiernu qu’ellos caltienen el que solicitó la inclusión de Caliao nel PHN y cuando la mesma IU votó a favor del Plan d’usu y xestion del parque nel que s’inxería, contra toa llegalidá, la obra de Caliao”.