también en castellano

Izquierda Asturiana denuncia posible atentáu al padremuñu en Piloña

Inaciu Llope, portavoz d’Izquierda Asturiana, alertó sobre la posibilidá de que la pasividá del Conceyu y la incompetencia de la Conseyería de Cultura pongan en peligru verdá la existencia del castru El Cierrón, en Castiellu, Valle.

El portavoz d’Izquierda Asturiana, Ignaciu Llope denuncia que “too parez indicar qu’un importante xacimientu castreñu de la Edá del Fierro ta en peligru verdá de destrucción como consecuencia d’un error na Carta Arqueolóxica de la que se manda’l Conceyu de Piloña”.

El Xacimientu taría na Carta Arqueolóxica nun emplazamientu equivocáu, mentanto que’l so emplazamientu real figuraría calificáu nada más y nada menos que como Suelu Urbanizable. Evidentemente les espectatives urbanístiques d’esta clas de suelu agraven entá más les posibles consecuencies d’esti error, “porque puede causar un dañu irreparable nesti Xacimientu conocíu yá y amentáu n’estudios fechos sobre la materia nos primeros años 70” como declaró Inaciu Llope.

L’error na carta constatóse cuando un vecín alertó al Serviciu d’Arqueoloxía de la Conseyería de Cultura de que taben faciéndose movimientos de tierra na devandicha finca.

Izquierda Asturiana señala que la situación ye si cabe más rocambolesca, porque esti fechu púnxose en conocencia de la Conseyería de Cultura, con competencies sobre la materia, que non solo nun adoptó midíes siquiera cautelares pa evitar la so destrucción, sinon que, seique por simple descoordinación ente entrambe dos alministraciones, local y autonómica, asemeya llimitase a comprobar que, efectivamente nel llugar onde se señala’l Castro na actualidá, ello ye, nel llugar equivocáu, nun se produció alteración nenguna sobre’l terrén.

Mentanto, la situación perpetúase y naide intervien pa evitar la desaparición d’esti importante elementu arqueolóxicu, paradoxalmente amentáu nel propiu catálogu de la Conseyería de Cultura, nos folletos turísticos del Conceyu, na Asociación de Cases Rurales de Piloña o inclusive na páxina web del Conceyu, que habría ser en bona lóxica conocedor de la ubicación correcta.

Ignaciu LLope señala que la formación política a la que representa “solicitó espresamente al Conceyu de Piloña que s’adopten cuantes midíes seyan precises pa evitar daños al Xacimientu”. Ello lleva ensin dulda l’adopción de midíes inmediates pa evitar que posibles actuaciones urbanístiques conviertan la situación no qu’Inaciu Llope calificó de “auténticu atentáu contra’l Padremuñu”. D’igual miente solicitó que “s’evalúen los daños que se pudieren producir yá, depurando responsabilidaes y s’entamen los trámites oportunos pa que, a traviés del procedimientu alministrativu que resulte preciso, se rectifique la Carta Arqueolóxica antes mentada”.

Nun fai falta recordar les consecuencies, quiciabes irreparables, qu’un error d’esta mena podría causar non solo nel propiu Xacimientu sinon en terceros intervinientes que pudieren llegar a vese afectaos por un error achacable plenamente a l’alministración y tan fácilmente comprobable. Nesti sen Inaciu Llope pidió que “tanto la corporación municipal como l’autonómica asuman la so responsabilidá y protexa’l padremuñu de los piloñeses y asturianos”.