también en castellano

Izquierda Asturiana (IAS) alvierte que'l despropósitu de la plantona pue repetise cola regasificadora

El portavoz de IAS en Xixón, Pablo Rodríguez, afirma que “L'argumentu pol que se dictó sentencia contra la plantona fáise muncho más evidente nel casu de la regasificadora"

Pa Pablo Rodriguez Alonso, portavoz d’Izquierda Asturiana en Xixón “l’últimu fallu emitíu pol Tribunal Constitucional en rellación al tema de la Plantona, nun supón namái una prueba de la descuidada y nada eficiente xestión del Conceyu de Xixón, sinon qu’ensin dulda supón un seriu encamentar, y nun va ser la postrera, pal futuru d’otres instalaciones como la Regasificadora del Puertu d’El Musel”.

El portavoz d’Izquierda Asturiana en Xixón esplicó que l’incumplimientu de lo dispuesto nel artículu 4 del Reglamentu d’Actividaes Molestes, Insalubres, Nocives y Peligroses, que literalmente establez qu’esta mena d’instalaciones namái van poder asitiase, como riegla xeneral, a una distancia de 2.000 metros a cuntar del nucliu más próximu de población agrupao, cuerre’l riesgu de repetise n’otra instalación qu’ensin dulda va dar bien que falar ; la regasificadora d’El Musel.

Pablo Rodriguez Alonso afirma que “ente los criterios, aceptaos pol Conceyu, que determinen la escoyeta del asitiamientu nel Puertu d’El Musel pa esta nueva instalación, ta’l fechu de que la instalación va situase “abondo alllongada de los nucleos de población”, ensin que s’apurran datos qu’efectivamente xustifiquen esta afirmación, basicamente porque nun ye cierto, cuestión ésta que se pue comprobar con namás facer visita a la zona y observar claramente la existencia de núcleos de población a una distancia claramente inferior a la señalada”. L’área urbana La Calzada - Xove -Natahoyo, Xivares y Candás alcuéntrense nesi radiu de 2.000 metros y sumen en xunto más de 70.000 habitantes. L’argumentu pol que se dictó sentencia contra la plantona faise entós muncho más evidente nel casu de la regasificadora, una instalación claramente espuesta a graves accidentes.

El portavoz d’Izquierda Asturiana, apiella a la tantes vegaes inexistente responsabilidá de los representantes políticos pa que nun se produza una situación neta a la qu’agora se produz cola Planta de Pretratamientu d’El Pisón, que causó cuantiosos gastos al Conceyu en pleitos, hasta esti momento 22, qu’ún a ún, van perdiéndose y pide “que nun se continúe con un proyectu, como ye’l de la regasificadora, qu’empecipiando pola insuficente xustificación de la propia instalación, la falta de xustificación de lo amañoso del emplazamientu escoyíu y acabando pola falta d’un análisis rigorosu y completu de les consecuencies perxudiciales que va conllevar la so instalación, amenaza con convertise n’otru llargu refileru de pleitos énte l’alministración de xusticia, pleitos que la nuestra organización política estudia presentar”

Izquierda Asturiana solicita igualmente del Conceyu qu’asuma’l so error, evalúe seriamente los cuantiosos y innecesarios gastos qu’esti asuntu traxo pal erariu público, y escomiencen a trabayar pa estudiar seriamente n’otres alternatives d’emplazamientu y pongan fín a esta irresponsable y insostenible situación.