también en castellano

Izquierda Asturiana (IAS) de Piloña califica de verdadera insensatez les declaraciones apaecíes en prensa en rellación col amontonar de tonelaes de neumáticos nel Polígonu Industrial de Lleu

Según IAS de Piloña, les declaraciones feches agora poco na prensa tanto por D Juan Roberto Pérez, alcalde de Piloña, como pol Sr. Juan Fernández Camblor a propósitu de l’amontonamientu de tonelaes de neumáticos nel Polígonu Industrial de Lleu “tán cargaes d’una insensatez absoluta per parte de quien les faen”.

L’Alcalde, el Sr. Juan Roberto Pérez, afirma que l’acumulación d’esti material, altamente inflamable y polo tanto actividád que tien que ser calificada cuanto menos de peligrosa, dispón de llicencia municipal, mentanto que simultáneamente’l Sr. Juan Fernández Camblor, titular aparentemente de la llicencia concedida, reconoz abiertamente’l so incumplimientu, darréu qu’eso ye lo que significa’l fechu de que “tea pendiente de cumplir un requisitu implícitu en dicha licencia”.

Ye paradoxal que’l propiu Alcalde avale públicamente la llegalidá de l’actuación cuando’l propiu interesáu reconoz l’incumplimientu de les condiciones de la llicencia que’l Conceyu-y concede. El Sr. Alcalde ha de ser ensin dulda conocedor de que l’actividá del Conceyu nun ha de limitase a la concesión de la llicencia, sinon a la comprobación si ello fore necesario, de que l’actividá s’axusta a la llicencia concedida, implicando la so actitú, a xuiciu d’Izquierda Asturiana, una grave irresponsabilidá pela so parte, máxime cuando l’incumplimientu afecta a una cuestión tan relevante como ye la seguranza.

Habría que se preguntar quién ta faciéndose cargu del gastu que supón la presencia de “guardies de seguridá “ nel llugar, que poco o nada diben ser a facer si se presenta de veres una situación de riesgu, y desde luego, ha de calificase como inaceptable la explicación dada pola propiedá pa xustificar esta situación cuando la mesma vien arrastrándose a lo llargo de meses.

Pa IAS de Piloña “el fechu de qu’esta actividá vaya lligada a la futura implantación d’una nueva empresa nel Polígonu de Lleu, nun pue nin ha d’utilizase como escusa pa mazcarar un fechu ciertu: qu’hai una acumulación de tonelaes de neumáticos, que se diz bien, ensin nenguna clas de control nin garantía, nuna zona na qu’ensin duda puen ocasionar un peligru pergrave pa terceros”.

Dende Izquierda Asturiana esíxese que per parte del Conceyu s’adopten ensin más muera les midíes llegales amañoses pa dar fin a esta situación, “procediendo si ello fore preciso, a ordenar inclusive la retirada de los neumáticos por incumplimientu de les condiciones de la llicencia”.

Pero al empar tamién s’esixe a la Conseyería competente que conocedora de la situación, nun tomó nenguna midida al respective, que subsane la situación d’illegalidá y de gran peligru qu’apareya.