En rellación al procesu
de negociación d’aliances electorales
nes que s’alcuentra Izquierda Asturiana
de cara a les próximes elecciones n’Asturies,
y col envís de qu’ésti seya
un procesu abiertu a la sociedá, la Dirección
Nacional d’Izquierda Asturiana quier facer
esta declaración en rellación al
momentu y conteníu nel que s’alcuentren
les negociaciones:
a) Que como ya se fizo publicu existe un procesu
negociador a trés bandes, ente Izquierda
Asturiana, Los Verdes y Andecha Astur. Nesti
procesu negociador les fuerces coinciden en
que ye interesante y necesario iguar un alcuerdu
políticu que supere los escenarios de
cites electorales anteriores, y qu’ufierte
a la sociedá un proyectu d’izquierda,
verde y asturianista realmente atractivu.
b) Dende Izquierda vese d’una manera
mui positiva esti procesu negociador, ya que
la unidá de la izquierda nacionalista
asturiana, venceyada a una fuerza de corte ecoloxísta
ye una propuesta política de futuru pernecesaria
que taría llamada a francer cola desgastada,
inoperante y antiasturiana política de
los trés partíos de la Xunta Xeneral.
c) Que nesti momentu los trés partíos
tienen un entamu d’alcuerdu en que los
dos principales puntos son, per un llau pautar
un programa electoral basáu nes aportaciones
de los trés partíos con un claru
calter d’izquierdes verde y d’identidá
nacional; per otru, presentase a les elecciones
del 2007 baxo un nome común y con un
candidatu consensuáu poles trés
fuerces polítiques.
d) Dende la Dirección Nacional d’Izquierda
Asturiana tamién quier facese un llamáu
a la responsibilidá y a la madurez política
de les otres partes negociadores, nestos momentos
en qu’otres fuerces polítiques
como IU ufierten aliances electorales que nun
son otro que allargar la llaceriosa situación
d’anguaño, como se demostró
na llexislatura que a ta a piques d’acabar.
Asina Izquierda Asturiana quier animar, tanto
a la xente de los partíos que tán
negociando esti posible alcuerdu electoral,
como a tolos asturianos independientes y enfotaos
en sacar al país d’esta llaceria,
pa que trabayen en dar l’últimu
pasu pa facer posible esta alternativa, que
seya y construya una solución y nun seya
parte del problema. Ye dicir, una alternativa
realmente seria, ambiciosa, verde y asturiana.
