también en castellano

Izquierda Asturiana (IAS) acusa a Graciano Torre de facer por confundir a los asturianos sobre los datos del paru n’Asturies

El portavoz nacional d’Izquierda Asturiana, Ignaciu Llope, manifestó lal so indignación énte les declaraciones del Conseyeru d’Industria y Emplegu, Graciano Torrre, nes que tenta dar una esplicación de los últimos datos de paru n’Asturies. Pa Ignaciu Llope éstes “son inalmisibles, porque, nuna muestra de cinismu increyible, prácticamente echa la culpa de la xuba del paru a los propios paraos”.

Ignaciu Llope fixo estes declaraciones n’escuchando a Graciano Torre dar la versión del gobiernu del Principáu d’Asturies sobre la xuba de 21,08 % na taxa de paru. Nestes esplicaciones el conseyeru d’emplegu comentó que l’aumentu del paru na EPA yera daqué «esperable» y «previsible», depués de que’l númberu de desocupaos rexistrare un «llixeru» incrementu ente xunetu y setiembre. Nesti sen Llope ironizó declarando que “n’Izquierda Asturiana (IAS) tamos percontentos de tener un conseyeru d’emplegu que ye quien a dicinos que’l paru xube porque ye previsible y esperable, y que yá lo veníen diciendo los datos”, pa nun tonu más críticu señalar que “un análisis d’esta clas dexa n’evidencia a un responsable políticu del que namái podemos aguardar una crónica de muerte anunciada del emplegu n’Asturies”. Pa Ignaciu Llope tamién son especialmente esmoledores les declaraciones del Conseyeru onde tenta d’esplicar la xuba dende’l puntu de vista de que "en tiempos de crisis los paraos salen del INEM y en tiempos de bonanza salen de casa". “La imaxinación de los dirixentes asturianos nun tien tasa” –apuntó Llope- “y ye ridículo echar la culpa de la xuba del paru a los propios paraos por apuntase a les interminables files del paru d’Asturies. Preguntámos-y al señor Graciano Torre si lo qu’han de facer los paraos asturianos ye nun s’apuntar al paru pa nun estropiar les sos cifres, o simplemente sumise, como yá faen miles d’asturianos y asturianes tolos años al siguir el camín de la emigración en cata de les oportunidaes d’emplegu que nun atopen n’Asturies”.

Pa Ignaciu Llope el conseyeru comete un grave error porque “la sociedá asturiana yá cansó de mentires d’esta mena y d’inxenería dialéctica pa tentar d’esplicar la mala evolución de la economía asturiana. La realidá que viven a diario los asturianos y los datos borren darréu tou esi tapagüeyos que ye la versión sobre’l desemplegu del gobiernu del Principáu”. Nesti sen Ignaciu Llope apuntó que “por exemplu esta mesma selmana pudimos saber que’l 32% de los paraos d’Asturies inscritos nes oficines del Serviciu Públicu d’Emplegu (SPE), en total de 18.115 desemplegaos, cuenten con serios problemes pa volver a trabayar, y que 12.406 tienen «bien escases» posibilidaes pa la reinserción llaboral acordies col informe tituláu 'La ocupabilidá de los paraos rexistraos', presentáu pol Ministeriu de Trabayu”.

El portavoz d’Izquierda Asturiana acusó a Graciano Torre de querer confundir a la opinión pública asturiana “espardiendo nos medios de comunicación teoríes estrañes sobre los más que preocupantes datos del paru n’Asturies, nuna clara falta de respetu pa tolos asturianos. Dende Izquierda Asturiana namái pidimos qu’asuma les sos responsabilidaes y que pelo menos acepte lo nefasto de la política d’emplegu del gobiernu de Vicente Álvarez Areces, nun exerciciu de sinceridá y respetu pa colos asturianos”.