también en castellano

IAS denuncia la maniobra del executivu PSOE – IX al eliminar el requisitu de los 2.000 metros

IAS denuncia que l’executivu asturianu del PSOE, col preste de los sos palanganeros d’IX-BA, quier derogar una dimposición llegal qu’obliga a separar les industries contaminantes de los llugares poblaos un mínimu de 200 metros

Pa Ignaciu Llope, portavoz d’Izquierda Asturiana, la noticia apaecida ayeri sobre la intención del executivu asturianu PSOE- IX de dexar ensin efectu la esixencia de que les instalaciones fabriles insalubres o peligroses se separten dos mil metros del núcleu más allegáu de población constitúi “una amuesa más d’absolutu desprecio pa cola intelixencia de los ciudadanos y un verdaderu escándalu, al desaniciar d’una tacada una norma que resguarda’l bienestar de los ciudadanos énte proyectos del gobiernu d’Álvarez Areces, y máxime cuando la modificación quier facese al traviés d’una llei tan poco amañosa pa una modificación llexislativa d’esta importancia como ye la Llei d’Acompañamientu del Presupuestu Asturianu del 2007”.

Derogaríase d’esta miente la previsión inxerta nel artículu 4 del Reglamentu d’Actividaes Molestes Insalubres Nocives y Peligroses, reglamentu estatal del añu 1964 qu’entovía se caltién y que lliteralmente apauta “qu’esti tipu d’instalaciones namás puen asitiase, como regla xeneral, a una distancia de 2.000 metros a contar del núcleo más allegáu de población agrupao”

Ignaciu Llope alvierte que, casu d’aceptase la derogación d’esta norma “instalaciones como la célebre Plantona de Xixón, o como la regasificadora que pretende asitiase n’El Musel, veríen como se desanicia una seria torga pa la so implantación, convirtiéndose la primera nuna instalación llegalizable y afalando que l’allugamientu escoyíu pa la segunda apaeza como’l más afechiscu de los posibles”. Nesti sentíu, Ignaciu Llope amestó que “Izquierda Asturiana yá alvirtió qu’una de les cuestiones qu’entovía nun se resolvieron en rellación cola regasificadora ye precisamente l’incumplimierntu d’este artículu que convertiría a esta planta nuna segunda plantona y que diba abrir ensin dulda una nueva riestra de pleitos contra l’Alministración”

Pa Izquierda Asturiana esta maniobra del que se fai llamar “gobiernu de la izquierda plural” ye claramente condenable en cuantes que supón valtar una norma importante de manera tapecida y polo tanto alloñada del debate públicu y del “diálogu y consensu” de los que tanto cacarexen les fuerces del executivu asturianu, el peor en 25 años de autonomía asturiana.

Pero amás d’ello tamién ye una manera de quitar del mediu mandaos llegales qu’estorben, y muncho, a proyectos altamente contaminantes y insalubres del executivu Areces qu’aplauden los sos palanganeros d’Izquierda Xunida –Bloque por Asturies, ensin valorar na so xusta midida les consecuencies negatives que pue tener pal bienestar de los ciudadanos el desaniciar el requisitu de los 2.000 metros ente núcleos de población y instalaciones de calter insalubre o peligrosu como ye’l casu de la regasificadora del Musel, pero tamién d’otros munchos proyectos industriales d’altu impactu ambiental que veríen d’esta miente “abierta la veda”.