Un guión de terror... basáu en fechos reales

En 2007 IU-BA va volver pidite'l votu col argumentu de que la oficialidá ye irrenunciable mientres da por seguru'l pautu de Gobiernu col PSOE, un partíu que sigue diciendo que nun va haber oficialidá. Pel otru llau, PSOE, PP y UAS (los trés tuvieren responsabilidaes de gobiernu) van falar d'una promoción que yá sabemos lo que ye: menos llingua asturiana y más aculturación.

Sicasí, la visión que dende IAS queremos tresmitir ye como siempre una visión positiva, porque la mayoría de la sociedá asturiana sigue apostando pola oficialidá y pola sobrevivencia de la nuestra identidá. Pero la normalización llingüística nun naz de les bones palabres sinón d'apostar por ferramientes polítiques d'obediencia asturiana, que son les úniques que puen condicionar de verdá un amparu llegal pa que'l nuestru idioma llegue a ser normal na sociedá y podamos, nós y los que vengan detrás, siguir viviendo n'asturianu.

La pelicula suénanos d’estos cuatro años

2003 IU-BA promete que nun va entrar en gobiernu si l'asturianu nun ye oficial y nun s'entama un verdaderu procesu de normalización de la llingua asturiana, colo que consigue movilizar un bon puñáu de votu asturianista. En pasando les elecciones IU-BA escaez la so promesa y firma un pautu de gobiernu col PSOE que dexa en palabres valeres lo dicho primero y que nun compromete realmente una política llingüística medianamente afayadiza.

2004 Fórmase'l CAO como un elementu unitariu y ampliu de diálogu qu'aspira a llevar a PSOE y PP al debate de la oficialidá. El PSOE refuga'l diálogu dende'l gobiernu y el PP combaya con postures ambiguamente calculaes entrando al discursu falaz de la “obligatoriedá”.

IU-BA niégase nun principiu a la creación d'esta plataforma reivindicativa pola oficialidá frutu de la sociedá civil y que nun ye a remanar, anque finalmente nun tien más remediu que tar. Al empar créase l'Observatoriu de Política Llingüística, una entidá destinada a llavar la cara a la inexistente política del gobiernu y a entamar una ofensiva sangrina contra los que s'atreven a falar de la situación real de la llingua asturiana, acusándolos de ser un frenu pa la normalización.

2005 Apruébase un Plan de Normalización que nin ye Plan nin val pa normalizar la llingua asturiana. Viéndese como un llogru daqué que ye técnicamente impresentable y aberrante dende un puntu de vista normalizador. El cacarexáu Plan, el gran llogru de la lexislatura, como IAS dixo nel momentu y como se vien demostrando, nun ye otro que fumu y un xuegu de trileros que nun supón nengún avance con respectu a les polítiques de gobiernos anteriores. Nin siquiera los presupuestos dedicaos a “promoción” de la llingua algamen les cifres d'otres lexislatures.

2006 la TPA entama a emitir convirtiéndose nun nuevu mecanismu d'aculturación, la llingua ta prohibida na Universidá d'Uviéu, la normalización de la topominia sigue aparada, la represión contra los defensores de la llingua ye más grande que nunca y la escolarización sigue siendo probe y precaria.

En 2007 el guión ESCRÍBESLU TU

más: [panfletu de la manifestación]