Dientro unos meses, nel mes de mayu de 2007, van volver celebrase, n'Asturies y en Xixón, unes elecciones onde les fuerces de “izquierda plural”, PSOE y IU, van pidite'l votu. Dirán (como siempre), qu'ellos son la garantía de la defensa de los intereses de Xixón y d'Asturies, que les sos polítiques avanzarán, dende la izquierda, pela sienda de la xusticia social, que defenderán l'empleu estable, l'urbanismu sustentable, la cultura, los servicios públicos…

Izquierda Asturiana (IAS), ta esta tarde equí, xunto con miles de vecinos y vecines, pa defender la llibertá d'espresión, el derechu que toles persones tenemos, yá sea individualmente, o sumándose a un colectivu, a espresar les nuestres preocupaciones públicamente y, si ye menester, a criticar abiertamente'l llabor de los nuestros gobernantes.

La pelicula suénanos d’estos cuatro años

Pues tal paez que defender el puestu trabayu, desixir una ciudá habitable, la oficialidá del asturianu o, mesmamente, que Xixón nun sea pastu de los especuladores YE UN DELITU. MORALA Y CÁNDIDO SON RESPONSABLES. Responsables de qu'una industria xixonesa que crea cientos de puestos de trabayu siga funcionando. Responsables, ye verdá, de que la bahía xixonesa nun sea namás una zona residencial con pisos a los que la inmensa mayoría de la población nun puede acceder. Responsables de que Xixón nun pierda la so identidá trabayadora.

Pero a los gobiernos xixonés y asturianu tanto-yos da, por muncho qu'IU xuegue a tar “al platu y a les tayaes”. Ambos lleven tiempu yá REPRIMIENDO a tolos y toles que nun quieren tragar con carros y carretes. La llibertá d'espresión y el derechu a la protesta vienen recibiendo como única respuesta REPRESIÓN, exemplos hai munchos, citamos namás dellos:

• REPRESIÓN A los representantes vecinales que nun quieren un PGOU vergonzosu y humillante.
• REPRESIÓN A los militantes del movimientu de reivindicación llingüistica por protestar pacíficamente frente al KAISER TINI ARECES.
• REPRESIÓN A los trabayadores, que como nel casu de los astilleros d'Izar, alcuentren palos en cuenta de les soluciones que ZP prometiera.
• REPRESIÓN Al movimientu ecoloxista que participó n'acampada contra l'embalse de Caliao.

Y represión tamién nel casu de Morala y Cándido, dos sindicalistes que tol mal que ficieron ye NUN VENDESE, nun vender el futuru industrial de Xixón.

L'Ayuntamientu de Xixón, en cuenta de defender los intereses de los ciudadanos, ye partícipe nuna denuncia cola que se quier meter na cárcel a los que defenden l'empleu estable y con derechos. Esta “izquierda plural” que nos gobierna en Xixón (col PSOE y con IU nel so vergonzante papel de gobiernu-oposición) lo que nos trai ye pisos pa ricos y denuncies pa meter a los representantes de los trabayadores na cárcel.

Por ello dende Izquierda Asturiana (IAS) pidimos la retirada de la denuncia contra Cándido y Morala por parte del equipu de gobiernu local, y la DIMISIÓN del Delegáu de Gobiernu ANTONIO TREVÍN, como máximu responsable de les midíes represives d'estos últimos años.

más: [panfletu de la manifestación]