también en castellano

Izquierda Asturiana (IAS) califica’l conceyu del alcalde de Mieres con Ramón d’Andrés y Xuan Bello de tomadura de pelo y llaváu de cara énte les próximes elecciones

Faustino Zapico recordó la situación del Serviciu de Normalización en Mieres y l’ausencia d’una política llingüística normalizadora n’Asturies

L’agrupación de Mieres d’Izquierda Asturiana (IAS) criticó ayeri duramente l’anuncia del conceyu del alcalde de Mieres con Ramón d’Andrés y Xuan Bello pa tratar la posibilidá de que’l nuestru conceyu seya la sé d’un “foru” pa la potenciación de la lliteratura asturiana al consideralo parte de la campaña electoral tanto del gobiernu asturianu como del consistoriu mierense.

Faustino Zapico siñaló que la presencia de Ramón d’Andrés y Xuan Bello en Mieres pa presentar esta idea a Luis María García respuende a “una operación cosmética consistente en tomadura de pelo a la ciudadanía y llaváu de cara mutúu, que fai por tapar con fueos d’artificiu la inesistente política llingüística del consistoriu mierense y la clamorosa falta d’un procesu de normalización de la llingua asturiana n’Asturies”.

Zapico siñaló nesi sen que “resulta paradóxico y especialmente sangrante que precisamente a los pocos díes de que los trabayadores de los servicios de normalización criticaren la nefasta xestión del serviciu de normalización llingüística en Mieres –que se creó tarde, mal y nunca y que cesó la so actividá por nun disponer de medios- aterricen en Mieres d’Andrés y Bello pa emponderar el ‘compromisu’ col asturianu del conceyu mierense”.

Según Zapico, a pesar de les promeses realizaes al entamu de la lexislatura en materia de normalización llingüística, el gobiernu de PSOE-IU lleva a cabu una política llingüística de ‘espicha y autobombu’ que tien el principal oxetivu de tapecer la inesistencia de midíes efectives. El representante de la formación d’izquierda asturianista añedió que “esta iniciativa probablemente tea destinada a cayer nel escaezu” nel mesmu cuartu escuru nel que quedó el serviciu de normalización en Mieres que se anunció nel so día con bombu y platillu como’l gran llogru de la política llingüística local”.

Zapico remembró que “en Mieres nun se tan tomando midíes normalizadores reales y l’asturianu nun se ta normalizando; no ye una llingua normal, que s’alcuentre n’igualdá de condiciones col castellanu y l’alcalde tien de saber que nengún foru nin premiu lliterariu ye a tapecer esa cruda realidá”.

Con too y con ello el portavoz d’IAS en Mieres quiso dexar claro que “dende Izquierda Asturiana (IAS) siempre s’apoyará cualquier iniciativa que suponga una potenciación de la lliteratura asturiana y el conocimientu y reconocimientu de los escritores na nuestra llingua, pero estes iniciatives han englobase nuna planificación llingüística real con voluntá normalizadora que dignifique a los escritores y a los falantes d’asturianu nel so conxuntu”.