también en castellano
Izquierda Asturiana
(IAS) de Mieres ve l’ampliación de
la central térmica de La Perea como la
reedición d’una falcatrúa
y la presentación d’un fechu consumáu
rellacionáu cola llinia Lada-Velilla.
Faustino Zapico
denunció la política enerxética
del Principáu, alertó sobre’l
peligru ecolóxicu que cuerre Mieres y anunció
l’entamu d’ aiciones d’oposición
a la mesma
El portavoz de l’agrupación
mierense d’Izquierda Asturiana IAS analizó
ayeri l’anunciu de la construcción
del ciclu combinao de la central térmica
de La Perea y criticó’l proyectu
venceyándolu cola ampliación del
Musel y cola polémica llinia d’alta
tensión Lada-Velilla.
Faustino Zapico señaló que "naide
pue xustificar esta política enerxética
na que s’embarca a los ciudadanos de Mieres
del Camín”. Según el
portavoz de IAS en Mieres “baxo la promesa
de beneficios n’abondo y la promesa de la
creación de puestos de trabayu, que namás
va aportar 55 emplegos a pesar de la xigantesca
inversión que va ser de 200 millones d’euros,
nun hai más que falcatrúa y sometimientu
a los intereses enerxéticos d’unos
pocos en detrimentu del interés común
y a costa de la estroza continuada del entornu
ecolóxicu y paisaxísticu d’Asturies”.
En rellación cola política enerxética
del gobiernu autonómicu, qu’otra
vuelta va toca-yos sufrir a los ciudadanos de
Mieres, Zapico aclaró que “la
central térmica de La Perea podrá
siguir vendiéndose como un llogru arquitectónicu
y, amás, agora va contar col nuevu reclamu
del ridículu 0'5% invertío n’investigación,
pero en realidá ye la reedición
d’una falcatrúa y una instalación
qu’ocupa bona parte del nuestru suelu industrial
a lo qu’hai qu’amestar l’ampliación
proyectada”.
Según Zapico “esti marafundiu,
nun ye más qu’otra coartada na estratexa
enerxética del gobiernu asturianu que tien
na llinia Lada-Velilla (a la que nos oponemos
vehementemente en collaboración estrecha
con agrupaciones ecoloxistes y vecinales de la
comarca) una de les sos pieces clave y constitúi
un entamu más na cadena d’actuaciones
ensin xacíu que van dende l’enantar
el puertu del Musel, los ciclos combinaos y les
llinies d’alta tensión, que van situar
a Asturies nun primer puestu del triste ranking
de los que más combustibles fósiles
quemen y polo tanto nel de los que más
contaminen pa siguir esportando enerxía,
daqué que va en contra de toa lóxica
medioambiental porque Asturies ye claramente escedentaria
en producción d’enerxía.”.
“Que naide se llame a engañu”
afirmó’l portavoz d’Izquierda
Asturiana, “nin va crear puestos de
trabayu, nin va ser un exemplu de llimpieza, nin
amerita la pena que Mieres pague la so parte de
portalgu na política enerxética
del gobiernu autonómicu, que sigue’l
camín tomáucontra’l sacrificiu
total del nuestru entornu n’atención
a unos intereses que nun son los d’Asturies
sinon el por güeyu d’unos pocos. “Polo
tanto, Izquierda Asturiana del Caudal”,
finalizó Zapico, “va entamar
les aiciones llegales posibles contra esti nuevu
proyectu absurdu y pa ello ta nuna ronda de contactos
colos activos ecoloxistes de la comarca, asina
como coles agrupaciones vecinales que son sensibles
a esta inxustificable actuación”.
Izquierda Asturiana (IAS)
de Mieres
Estaya de Comunicación
Mieres a 19 d'avientu de 2006
|
