también en castellano
Izquierda Asturiana
(IAS) da anuncia de la so presentación
a les elecciones autonómiques de 2007 y
elixe como candidatu a Ignaciu Llope
Izquierda Asturiana (IAS) celebró’l
pasáu sábadu 16 d’avientu
la segunda sesión del so VII Alcuentru
Nacional nel que, ente otres, se tomó’l
determín de que’l partíu se
presente a les elecciones autonómiques
de 2007 pa ufrir al electoráu asturiano
una alternativa d’esquierda, asturianista
y verde a les actuales polítiques del gobiernu
de PSOE y IU de los últimos cuatro años
que llevaren a Asturies a una situación
culturalmente decadente, medioambientalmente desastrosa
y insostenible y económicamente estancada
que condena a la nuesa mocedá a la emigración.
L’Alcuentru Nacional elixó por unanimidá
como candidatu nacional a Ignaciu Llope. Natural
de Cuideiru, onde participa activamente nel movimientu
contra la especulación urbanística
y la destrucción de la costa, Llope ye
médicu especialista en medicina Familiar
y comunitaria y psiquiatra axuntu nel Centru de
Salú de Cangas del Narcea, el so llugar
de residencia anguaño. Ensayista y poeta
ye un históricu y activu militante del
movimientu asturianista, tanto na so vertiente
política como cultural. El so últimu
ensayu “Xogo d'identidades na terra del
Navia-Eo” convirtióse nun referente
indiscutible na defensa de l’asturianidá
de la zona Navia-Eo. Milita n’IAS dende
1995 y en 2004 encabezó la candidatura
d’esti partíu al Senáu.
Pola so especial vinculación col occidente
asturianu, onde ye natural, onde reside, onde
trabaya y al que dedica gran parte del so tiempu,
Ignaciu Llope va encabezar la llista pola circunscripción
occidental reivindicando asina la relevancia de
les ales d’Asturies énte un sistema
electoral que discrimina a los ciudadanos y ciudadanes
que nun viven nel centru del país
Izquierda Asturiana (IAS)
Estaya de Comunicación
Uviéu a 21 d'avientu de 2006
|
