también en castellano
Izquierda Asturiana
(IAS) pide esplicaciones a la conceyala Carmen
Rúa tres la dimisión del Conseyu
Asesor de la Llingua
El portavoz d’Izquierda
Asturiana (IAS) en Xixón, Pablo Rodríguez
Alonso, sofita los miembros del Conseyu Asesor
de la Oficina de la Llingua nel so determín
de dimitir en bloque, amás de criticar
l’actitú y incapacidá de la
conceyala de promoción del asturianu Carmen
Rúa
Pablo Rodríguez Alonso
declaró que “dende IAS damos
un sofitu total al determín de dimisión
tomada por unanimidá por parte del Conseyu
Asesor de la Oficina de Llingua”, depués
de qu’esti organismu constatare la nula
intención del gobiernu municipal de desenvolver
una política llingüística digna,
amás de recibir un tratu de despreciu y
indiferencia per parte de les instituciones municipales
que tendríen que s’encargar en Xixón,
ente otres coses, d’asegurar el respetu
de los derechos llingüísticos de los
xixoneses, amás d’ocupase de la promoción
del asturianu nel conceyu.
Nesti sen Pablo Rodríguez
apuntó que “dende Izquierda Asturiana
en Xixón venimos denunciando dende cuantayá
la comedia que ye la política llingüísitica
en conceyu de Xixón, porque ésta
nun pasa de campañes puntuales que nun
son más que restallones d’autopromoción
que nun tienen otru oxetivu que facer creer a
los xixoneses que ta faciéndose daqué
pol asturianu na so ciudá.”
El portavoz d’IAS señaló que
“el gobiernu municipal de PSOE y IU-BA
escaez conscientemente cuestiones como la presencia
cuasi inexistente del asturianu na Gaceta de Xixón,
situación tantes veces denunciada por esta
formación política, o l’emplegu
nulu de la nueva toponimia oficial del conceyu.”
De toes maneres pa Rodríguez Alonso el
casu más grave ye “l’incesante
llabor que fixo esti gobiernu municipal pa evitar
que s’aprobaren unes Ordenances Municipales
d’Usu de la Llingua en Xixón, una
garantía llegal que diba afitar los derechos
llingüísticos de los xixoneses”.
Amás, pa Pablo Rodriguez, “en
tou esti desprecio pa la llingua asturiana dende’l
gobiernu municipal tien especial responsabilidá
Carmen Rúa, qu’ente otres coses,
ye conceyala de promoción del asturianu,
y que como se vien demostrando, nada más
sabe llevar el títulu nel nome porque nun
foi, supo nin quixo defender los derechos y la
dignidá llingüística de los
xixoneses, polo que n’Izquierda Asturiana
camentámonos que Xixón nun se merez
una conceyala que nun sabe facer, nin por asomu,
el so llabor.”
Pablo Rodríguez Alonso
solidarizóse tamién colos trabayadores
de la Oficina de la Llingua de Xixón “porque
nos consta que son los primeros que cadecen de
la incapacidá y pasotismu en materia de
política llingüística del gobiernu
de PSOE Y IU-BA”. El portavoz d’Izquierda
Asturiana en Xixón remató diciendo
que la so organización política
va siguir denunciando, como fixo hasta agora,
“la comedia en que se convirtió
la política llingüística en
Xixón y n’Asturies, na que’l
PSOE y IU-BA nun faen otro qu’escenificar
n’actos y anuncies públiques unos
avances en política llingüística
que nunca lleguen a ver los asturianos porque
simplemente nun los hai.”
Izquierda Asturiana (IAS)
Estaya de Comunicación
Uviéu a 23 d'avientu de 2006
|
