también en castellano
Izquierda Asturiana
(IAS) muestra’l so sofitu al miembru de
la so dirección, Faustino Zapico, depués
de refugar el TSXA la posibilidá de lleer
la so tesis
La Dirección
Nacional d’IAS mostró na so última
reunión el so sofitu incondicional al miembru
de la mesma, Faustino Zapico, calificando de “pantomima”
l’ actual protección del asturianu
Énte la sentencia del
Tribunal Superior de Xusticia d’Asturies
(TSXA) na que se desestima’l recursu de
Faustino Zapico pola negativa de la Universidá
d’Uviéu a aceptar la inscripción
de la so tesis por mor, únicamente, de
que se fixere en llingua asturiana, la Dirección
Nacional d’Izquierda Asturiana (IAS) aprobó’l
vienres pasáu na so xunta ordinaria emitir
la declaración que vien darréu:
1. La Dirección Nacional
d’IAS quier mostrar la so solidariedá
y suporte incondicional al nuesu compañeru
de partíu y de dirección al que-y
tocó padecer en piel propio la discriminación
y postergación de la que carez la llingua
asturiana n’Asturies. A esti fechu, que
non por común dexa de ser habitual nesti
país, amiéstase’l agravante
de que ye una institución pública
que se supón qu’ha d’erixise
en promotora de la cultura la que se convierte
nun axente activu de discriminación,
colo que se rebaxa a sigo mesma, degrada la
función que-y correspuende y incumple
los sos propios estatutos nos que se fala esplícitamente
de que naide puede ser discrimináu por
mor de mandar del asturianu.
2. El determín tomáu
pol TSXA ye una muestra más de cómo
n’Asturies la llingua asturiana ye un
idioma proscritu, y los supuestos pasos de protección
de la mesma, que se dieren nos últimos
años y que dalgunos tienen la desvergüenza
de llamar “normalización”
son una comedia que nun ye pa tornar situaciones
como esta, porque nun se dieren nel sen afayadizu;
el de la reconocencia de los derechos de los
y les falantes a mandar de la so llingua en
tolos ámbitos sociales, ello ye, la normalización
real y la igualdá de derechos col castellano.
3. Fechos tan graves como’l
sufríu por Faustino Zapico muestren con
especial crudeza lo inaplazable que resulta
la oficialidá y la necesidá inescusable
de la so inxerción na próxima
reforma del estatutu, porque de perder esta
oportunidá díbemos dar nuna situación
d’auténticu cataclismu cultural,
cola desapaición a mediu plazude la llingua
per aciu d’un procesu nel que se diben
repetir y perpetuar les situaciones de discriminación.
4. Los principales culpables
d’esta situación, amás del
rector Juan Vázquez y los miembros del
TSXA que faen una interpretación inxusta
y restrictiva de la llei, son los miembros del
gobiernu asturianu PSOE y IU-BA, executores
y cómplices necesarios respectivamente
d’una política planificadamente
etnocida que tien secuestraos llegalmente los
derechos de les y los falantes d’asturianu.
Izquierda Asturiana (IAS)
Estaya de Comunicación
Uviéu a 26 d'avientu de 2006
|
