también en castellano

Izquierda Asturiana (IAS) de Mieres alerta sobre la situación precaria de los locales d’ensayu de La Rebaldana y de l’ausencia de política municipal al respective y responsabiliza de los robos a la dexación de los responsables del gobiernu local del PSOE y IU nes últimes lexislatures

Faustino Zapico denunció los últimos allanamientos y robos en dellos locales d’ensayu amás de facer un llamáu a la movilización moza contra la política cultural municipal.

El portavoz de l’agrupación mierense d’Izquierda Asturiana IAS afirmó que “estos lladronicios son una consecuencia del abandonu nel que s’afayen los músicos en Mieres”. Tal como señaló Zapico “la situación de los locales de La Rebaldana nun pue seguir asina; falta protección énte los continuos asaltos; son urxentes obres d’igua y ye preciso una meyora na xestión” amás amestó que “se precisa otra instalación nel cascu urbanu de Mieres, por mor de la demanda creciente y a la realidá incontestable de los robos producíos n’otros locales particulares, lloñe de La Rebaldana, como’l casu del padecíu pol grupu Boghura Khan, que tienen el local en Vegadotos”.

Sobre la relación que tienen estos fechos cola política municipal y cultural del consistoriu aseguró: “esta ye la respuesta que dio l’equipu de gobiernu a los xóvenes artistes: unos locales con goteres a los que cualquiera pue entrar y llevar lo que-y dea pola gana” añediendo que “esta ye la promesa tan cacarexada pol PSOE y IU énte les demandes del colectivu “La Belonga”; la nada más absoluta. Ente esto los políticos locales nun dexen marxe d’escoyeta: o se conforma la xente mozo con esto o de lo contrario va volvese a la criminalización impune de la so cultura, como asocedió cola triste salida propagandística, digna d’aprendices de Goebbles, na que se tachó a los miembros del colectivu de puercos y drogadizos y na que participaron activamente conceyales d’Izquierda Unida”.

Según el portavoz d’IAS en Mieres ”agora yá non solo s’emigra de Mieres pa buscar trabayu, tamién lo faen muchos mozos p’atopar local d’ensayu. Lo llamativo ye que los atopen con facilidá n’Uviéu y en Xixón, locales, toos ellos de propiedá municipal, lo qu’enanta ún de los problemes más doliosos que vivimos anguaño nel Caudal : non solo marcha d’equí sinón qu’amás se fai con resquemor, cola sensación de que naide fixo nada por tornalo; nin una ayuda, nin tan siquiera una demostración de conocencia de lo qu’asocede; namás demagoxa, promeses, o lo que ye pior, dique de contención a la inquietú y al movimientu cultural”

“La mocedá de Mieres”, amestó Faustino Zapico, “tien que canalizar tola so frustración per una vía racional y unitaria que cobre de la única manera posible lo que los partíos tradicionales adeuden a les cuenques: con una renuncia al apoyu electoral dau n’otres ocasiones y basáu en promeses caducaes va muncho y cola movilización, como vien faciendo magníficamente nes dos últimes décades”. Zapico acabó comentando que “el PSOE y Izquierda Unida demostraron n’abondo nun comprender no más mínimo a la mocedá, y lo que ye pior, nun fixeron una política que lo tuviere como oxetu principal d’atención, lo que cada día se pue constatar nos comentarios fechos al respective polos implicaos, na desesperación producida por una situación llamentable y nel resquemor colos políticos que nun se comprometen col apoyu a la cultura o directamente lo desprecien”.