también en castellano

Izquierda Asturiana (IAS) denuncia como “propaganda electoral” la difusión d’un calendariu editáu pol Conceyu de Piloña

La formación asturianista d’esquierda califica de desvergüenza política y utilización partidista la difusión d’un calendariu oficial con semeyes d’obres municipales

Nuna nota de prensa, el portavoz d’Izquierda Asturiana (IAS) en Piloña, pide esplicaciones publicamente al equipu de gobiernu municipal pola edición d’un calendariu que s’edita col cuñu municipal, inxertando l’escudu del Conceyu y el lema “Piloña verde y natural” y que polo tanto cabe entender que se pue considerar de “calendariu oficial del Conceyu”. Esti calendariu, que se distribúi gratuitamente desde’l propiu Conceyu y s’alcuentra dende va unes selmanes ampliamente repartíu en toa clas d’establecimietos y locales públicos y privaos de toa Piloña, axunta nesta edición una serie de semeyes que muestren obres y meyores feches últimamente en dellos llugares del Conceyu a cargu del Consistoriu. Ye precisamente esti fechu el primeru que sorpriende, según Izquierda Asturiana y pregúntense “cómo ye posible que toles semeyes que figuren nel almanaque síen de “cementu y alquitrán” cuando’l lema ye’l nomáu Piloña Verde y Natural, ideáu pa la promoción turística del Conceyu”.

Dende Izquierda Asturiana (IAS) camiéntase que, lloñe de buscar la promoción o difusión de los valores naturales de Piloña, namás cabe entendelo como propaganda electoral puro y duro, al serviciu partidista d’un equipu de gobiernu que “basa tol so argumentu nes obres públiques, que s’atribúi indiscriminadamente como propies”. Pa esta formación, ”l’equipu de gobiernu municipal del PP sigue trabayando con un modelu que busca descaradamente’l clientelismu, na mesma llinia que fixeren tolos gobiernos municipales anteriores con mayoría absoluta. Pero con ser esto grave y representar un insultu a la intelixencia de los piloñeses, dicen, lo más grave constitúilu’l fechu de que s’empleguen pa ello recursos y medios públicos qu’habríen tar al serviciu de tola ciudadanía en cuenta de los medios partidistes”.

Por too ello esixen que s’aclare publicamente quién y cómo financia la edición y distribución de dicho calendariu al igua que’l costu del mesmu, supuestamente a cargu de les arques municipales.

Per último, Izquierda Asturiana (IAS) llamenta que la oposición municipal guarde silenciu y piden qu’interpele al equipu de gobiernu sobre esti fechu que califiquen de “escandalosu”, y que necesitaría de manera urxente una rectificación pública, al mesmu tiempu qu’esixen la depuración de responsabilidaes polítiques por parte de los autores.