¡NON A LA NUEVA REFORMA LLABORAL!
¡NON A LA REFORMA DE LA SEGURIDÁ SOCIAL!

MÁS BENEFICIOS PAL EMPRESARIÁU Y MÁS PRECARIEDÁ
PA LES Y LOS TRABAYADORES

Depués de cerca dos años de negociaciones cuasi secretes ente’l gobiernu, la patronal y les direcciones sindicales de CCOO y UGT, algamóse’l “Alcuerdu pa la meyora del crecimientu y del emplegu”. Énte lo que mos quieren facer creyer, esta nueva contrarreforma ye otru pasu atrás, qu’afonda nos aspeutos más negativos de les anteriores reformes llaborales y que tampoco nun va menguar el paru y la precariedá. Eso sí, cueye una parte importante de les reivindicaciones patronales y ye un nuevu exemplu del fracasu de la estratexa sindical desendolcada nestos años, que tien a la negociación y al pactu como una fin en sí mesma, independientemente de los resultaos consiguíos. Esta reforma ye un nuevu ataque a les nueses condiciones de vida porque:

1. Nun va menguar la precariedá llaboral. D’un llau, porque van siguir vixentes tol enguedeyu de contratos temporales a la carta.
2. Abarata’l despidu. Ye la midida central d’esta reforma, al traviés de la recuperación y estensión del contratu fixu con despidu baratu (33 díes per añu y un tope de 24 mensualidaes, en cuentes de los 45 díes y 42 mensualidaes del contratu indefiníu ordinariu). La esperiencia demuestra qu’esti contratu, nun lo utiliza la patronal pa convertir en fixos los contratos temporales, sinón que ta sustituyendo a los contratos estables d’anguaño y va quedar como modelu únicu nel futuru. Esta midida yá s’aplicare cola reforma de 1997 y cásique una década depués siguimos teniendo la precariedá más alta d’Europa (un 34% al llau d’un 14%). Tamién espoxiga’l númberu de supuestos nos que’l Fogasa va encargase de les indemnizaciones en vez de les empreses.
3. Tresvasa recursos económicos descomanaos a la patronal. Per dos víes: les bonificaciones y la mengua de cotizaciones. Asina, dende 1998 les bonificaciones en cuotes a la Seguridá Social supunxéron-yos a les empreses 17.453 millones d’euros (¡cuasi trés billones de les pesetes antigües!). Agora la patronal va recibir con esta reforma la xabaz cantidá de 4210 millones d’euros. ¿Cuánto más vas recibir tu na nómina que vien? Ye tan escandalosu’l sistema de regalu de dineru público a la patronal que n’abondos supuestos de contratación van sali-yos de baldre les indemnizaciones por despidu. La mengua de cuotes al desemplegu (0,5%), al Fogasa (0,2%) y a les ETT (1%) son perres que bien pudieron invertise n’ameyorar les prestaciones de les y los trabayadores ¿Cuánto van tardar en recortar inda más la to cobertoria si quedes en paru?
4. Nun va amenorgar la rotación nel emplegu. La contratación temporal abusiva y fraudulenta que carecemos nun va iguar con esta reforma:
   • Nun va afeutar a los actuales 5 millones de contratos temporales, nin tampoco a los contratos formativos de relevu ya interinidá.
   • El tope de dos años que puedes tar contratada o contratáu temporalmente durante 30 meses (d’ehí p’alantre sedríes yá fixa/u) ye mui fácil de burllar pol empresariáu que namás tien que nun t’anovar xusto primero del plazu, cambiándote d’empresa dientro del mesmu grupu o de puestu trabayu na mesma empresa. Y si tovía asina nun-yos queda otro que facete fixa/u, vas selo con un despidu más baratu.
5. Sigue allongándose y favoreciéndose la contratación per aciu les ETT´s. Porque enancha’l so ámbitu d’actuación a sectores onde hasta agora taben escluyíes y rebaxen les sos cotizaciones al desemplegu.

La Reforma de la Seguridá Social, más recortes de derechos

La nueva Reforma, que van tentar d’aprobar en breve, sostiénse na mesma retórica de les anteriores: la viabilidá del nuesu sistema de Seguridá Social. Pero al cau, la solución como siempre ye la d’incrementar los beneficios empresariales y recortar les nueses prestaciones. Ente les midíes más dañibles pa los nuesos intereses tán:

1. Aumentu del númberu d’años pal cálculu de la pensión que van pasar a ser 15, lo que conlleva’l retrasu de la edá de xubilación y que la prestación final mengüe. El so oxetivu ye condenar a les y los trabayadores a soscribir fondos de pensiones, que son otra forma d’esviar dineru de quien trabaya pa favorecer los negocios privaos nel mercáu financieru.
2. Endurecimientu de les condiciones d’accesu a la xubilación anticipada (retrasu a los 61 años) y reforma de los coeficientes reductores, too ello empobinao a forzar l’allargamientu de la vida llaboral.

Estos alcuerdos lleguen amás nun contestu onde los xornales reales siguen menguando, la xornada llaboral ye cada vuelta mayor, la degradación de los derechos llaborales y sindicales crez y la mocedá ve como’l so futuru llaboral ye cada vuelta más murniu. N’Asturies, pola crisis económica y social na que s’alcuentra, (y na que los socesivos gobiernos asturianos nun fueron a exercer la so responsabilidá de tornar esta situación, faciéndose cómplices de lo aprobao nel conxuntu l’estáu), midíes d’esti tipu condenen a la nuesa mocedá a la emigración.

Lo más escandaloso ye qu’una reforma asina roblárase al llombu dafechu de les y los trabayadores, y ensin emplegar la movilización y la presión pa obligar al empresariáu y al gobiernu a ceder nos aspectos fundamentales. Los acontecimientos recientes señalen que ye posible frenar los ataques. L’últimu exemplu foi Francia, onde fueron a, con una postura fita, y basándose en movilizaciones de mases, facer recular al gobiernu de la derecha. Nel estáu español, fuere la Fuelga Xeneral del 20-X y non les negociaciones, lo que fixera al gobiernu retirar parcialmente’l “decretazu” de 2002.

Amás, nun podemos escaecer que la llegada del PSOE al gobiernu xeneró unes esperances de cambiu ente les y los más de trabayadores. Nun derrotemos a la derecha pa que’l gobiernu siga aplicando una política económica en beneficiu del empresariáu. Tamos convencíes/os que la mayoría de les y los trabayadores, diben tar en desalcuerdu con estes contrarreformes, si se-yos diera la oportunidá d’opinar. Ye imprescindible qu’esto se debata n’asamblea nos distintos centros de trabayu pa obligar a les cúpules de CCOO y UGT a rectificar.

Queremos afalar a que toles persones que refuguen esta política sindical independientemente de la so afiliación (comités d’empresa, seiciones sindicales y trabayadores en xeneral) participen na plataforma unitaria que se formó y facemos un llamáu a sofitar les movilizaciones contra esta Reforma Llaboral.

¡POLA UNIDÁ DE LES Y LOS TRABAYADORES!
¡POR UN SINDICALISMU COMBATIVU Y DEMOCRÁTICU!

CGT – CSI – SUATEA – SECTOR CRÍTICO/IZQUIERDA SINDICAL DE CCOO DE ASTURIAS - SINDICATO DE ESTUDIANTES – JCA – PCPE – CJC/CMC – UJCE – ANDECHA ASTUR – MIAS – IAS – EL MILITANTE – FUSOA – DARRÉU