también en castellano

Izquierda Asturiana (IAS) critica l’inmovilismu del Gobiernu Asturianu nes polítiques de vivienda frente a les iniciatives d’otres comunidaes autónomes

Ignaciu Llope ve nes declaraciones de Laura González una muestra más de “derechización de la coalición de gobiernu y psoeización d’IU”

Nel día d’ayeri, la Conseyería de Vivienda facía pública la so postura frente a les polítiques que se vienen anunciando estos díes nes comunidaes autónomes de Cataluña y el País Vasco, col fin de dar soluciones al acuciante problema de la vivienda. Nes sos declaraciones la responsable de vivienda del gobiernu asturianu afirmaba que “El Principáu va adoptar «midíes sancionadores» contra los propietarios de viviendes vacies, si la batería d’ayudes destinaes a fomentar el mercáu d’alloguer na comunidá nun da los frutos esperaos”.

Pa Izquierda Asturiana estes declaraciones son sorprendentes porque ye más qu’evidente pa tol mundu, menos pa la conseyera Laura González, que la política de vivienda de gobiernu autonómicu ye un fracasu, y que en realidá vive a remolque y sin soluciones pal problema de les viviendes vacies. Viviendes que nel casu d’Asturies son más de 76.000 (el 14%), too ello nun contestu onde’l so preciu aumentó de manera descomanada (el 115% ente 1996 y 2005, según datos publicaos pol sindicatu CC.OO.) y onde la construcción de vivienda nuevo nun parez disminuir el so preciu y sí les inxusticies contemplaes en dellos planes xenerales d’ordenación urbana, con expropiaciones humillantes pa los habitantes de la zona rural, como nel casu de Xixón, tamién gobernáu pola autodenominada esquierda plural (PSOE-IU-BPA).

En palabres del candidatu d’Izquierda Asturiana (IAS) a les elecciones autonómiques de 2007, Ignaciu Llope, “les polítiques desenvueltes pol gobiernu asturianu de coalición tán demostrando una vegada más que nun difieren de les qu’exercía’l PSOE en solitariu. Mentres n’otres comunidaes autónomes como Cataluña o’l País Vasco ta apostándose por polítiques que movilicen el parque de viviendes desocupaes, equí nos afayamos ente un Plan Asturianu de Vivienda 2006-2008 que sigue apostando pol modelu tradicional d’incentivar con ayudes a los que, en bien d’ocasiones, nun precisen de incentivos talos pudiendo con ello siguir subíos a la fola especulativa”. Llope afirmó que la muestra d’esta realidá ta en “los probes resultaos llograos hasta la fecha. De fechu tán vendiéndonos como un trunfu l’aumentu del 9% nel preciu de la vivienda en 2006, cuando ye sabío que los salarios aumentaron de media un 3,3%, colo qu’una llectura más realista al respective diba refugar l’optimismu de los nuesos gobernantes”.

D’igual manera, el candidatu d’IAS sublliñó’l fechu de que “seyan otros gobiernos onde participa Izquierda Unida n’otres partes del Estáu onde se tean tomando más en serio l’aplicación de polítiques alternatives destinaes non a penalizar, sinon a favorecer y presionar a los propietarios de viviendes vacies pa qu’éstes dexen de talo.” Llope renembró que “la busca d’igües a los verdaderos problemes de la ciudadanía tendría que ser la prioridá de los gobernantes, cosa qu’abulta que nun asumió’l gobiernu asturianu, anclao en polítiques conservadores que nun s’enfrenten frontalmente a la especulación, y que suponen un problema cada día más acuciante pa les families asturianes y sobremanera pa la mocedá”. Llopé afirmo que “el pronunciamientu d’ayeri del gobiernu asturianu abonda en cobardía política, y demuestra una vegada más un fechu que dende IAS venimos denunciado: la implacable PSOEización d’Izquierda Unida y la consiguiente derechización de la coalición d’esquierdes”.

Pa cabu, el candidatu nacional d’Izquierda Asturiana fixo un llamáu al gobiernu autonómicu y afalólo a que “dea un pasu alantre, como tán faciendo n’otres partes del Estáu”, y que nun “echen balones fuera” nun contestu de “replanteamientu d’unes polítiques que llograren convertir un derechu como ye’l de la vivienda nuna triba de luxu asiático”. Too ello nun contestu internacional onde son continuos los “tirones d’oreyes” al estáu español per parte d’organismos internaciones polo descomanao del preciu de la vivienda y pola brutal especulación inmobiliaria de la que tamos careciendo. Frente a ello Llope destacó exemplos como’l de Francia onde “el gobiernu vien de dar la razón al movimientu popular “Los Fíos de Don Quijote”, lo que permite esixir énte un xuez el derechu a la vivienda.”