también en castellano

Izquierda Asturiana (IAS) presenta alegaciones al Estudiu d’Impactu Ambiental de la llinia Soto-Penagos

La formación Izquierda Asturiana presentó esta mesma mañana en Rexistru Xeneral del Conceyu de Siero les sos alegaciones al Estudiu d'Impactu Ambiental

Izquierda Asturiana (IAS) reitera nel escritu d’alegaciones presentáu la postura que vien teniendo dende va cuantayá no que diz con esta llinia d’alta tensión, a la que s’opón abiertamente, y una vegada más pon en dulda “la utilidá “ de la mesma que “nun ye xustificable en términos d’eficacia enerxética y más, contradiz tanto la nueva política ministerial como la lexislación europea en materia de medioambiente, amestando nueves dificultaes a lo yá malo de cumplir de los oxetivos del Protocolu de Kyoto”

Dende Izquierda Asturiana cuestiónase d’igual miente’l fechu de que l’Estudiu d’Impactu Ambiental se faiga pola propia REE y non por una entidá o organismu imparcial que podia adoptar los determinos correspondientes con total oxetividá o imparcialidá.

En cuantes al Estudiu d’Impactu que se somete a información público, Izquierda Asturiana (IAS) pon de manifiestu nes alegaciones q’hai aspectos qu’al so paecer son insuficientemente estudiaos y evaluaos, por nun dicir prácticamente inexistentes. Ún d’ellos ye ensin dulda especialmente relevante, l’impactu que la llinia pue tener sobre la salú d’aquellos que resulten afectaos pol trazáu finalmente escoyíu. A xuiciu d’Izquierda Asturiana “el Conceyu de Siero habrá de velar pola non afectación y polos intereses de tolos alministraos, ensin establecer diferencies de protección pa unos o otros en función de que los núcleos poblaos seyan mayores”, y espera que mire pola salú de tolos sos ciudadanos por igual, ensin estremar ente ciudadanos de primera y de segunda, porque en definitiva, y como de manera atinada reconoz el saber popular “nun se pue vistir un santu pa desvistir a otru”.

IAS tamién constata nes sos alegaciones que “en toles variantes reconozse espresamente l’afectación a viviendes, y por más que REE argumenta nel so estudiu d’impactu que l’afectación sobre la salú tien que se minimizar, failo invocando namás determinaos estudios favorables a la so argumentación”. Ello ye, pa Izquierda Asturiana faise referencia a Recomendaciones de la UE sobre la incidencia na salú de les persones reconociendo’l so cumplimientu en “la mayoría de los casos”, lo que supón una reconocencia implícita de que n’otros casos nun se cumple con eses recomendaciones.

Otros aspectos que, a xuiciu d’esta formación son insuficientemente trataos respuenden a cuestiones tales como l’afectación al padremuñu o a la posible contaminación que podia producise sobre’l mediu.

En resume Izquierda Asturiana plantea nes sos alegaciones que l’estudiu d’impactu ambiental de REE ye claramente insuficiente, parcial, y tien como únicu oxetivu xustificar la llinia d’alta tensión per riba del bienestar y del padremuñu de los ciudadanos y ciudadanes de Siero.