también en castellano
Izquierda Asturiana
(IAS) solidarízase colos trabayadores d’Autotex,
califica de timu el pieslle patronal y solicita
que se recuperen los fondos que s’invirtieren
pa convertir la planta nuna cooperativa que siga
cola producción
Faustino Zapico,
depués d’axuntase en Mieres con representantes
de los trabayadores, criticó la política
económica del gobiernu autonómicu
y pidió tol sofitu sindical y social pal
colectivu afectáu
El miembru de la Dirección
nacional d’Izquierda Asturiana (IAS) depués
de la xunta que tuviere en Mieres con representantes
de les y los trabayadores d’Autotex aseguró
que “asistimos con congoxa a la descripción
que de la problemática d’esta empresa
nos fixeren representantes de la plantiya y por
ello reclamamos, más allá de la
solidariedá xestual básica y necesaria,
tola atención y tola capacidá de
xestión y presión per parte de los
sindicatos y partíos políticos pa
tornar l’actual estáu de coses".
Zapico amestó que "esti pieslle
patronal inxustificáu cayó como
xarru d’agua frío sobre les ilusiones
d’unos trabayadores que ven cómo
la so empresa, con cuota de mercáu abondo,
se sume énte los sos güeyos ensin
que naide dea una esplicación convincente”.
El miembru de la Dirección nacional d’IAS
y candidatu a l’alcaldía de Mieres
comentó que ”esti ye un exemplu
de cómo s’alministren los fondos
mineros, de los que 3 millones d’euros se
derivaren pa la creación d’esta planta,
y agora son pasto d’una multinacional que
s’aprovechó de la situación
de crisis pola que traviesa Asturies y que ensin
escrúpulu nengún fixo so agostu
cazando les ayudes, cobrando les subvenciones
y aumentando la cota de mercáu que tenía
proyectada pal texíu de les bolses d’airbag
de la que ye propietaria de la patente”.
A continuación afirmó “ye
un casu palmariu de timu a l’alministración
pública asturiana que nun foi quien a identificar
el problema a mediu plazu y que dexa ensin espectatives
a los 207 trabayadores d’una fábrica
que se vendiere nel so momentu como un llogru
más por tratase d’una empresa que
manda de tecnoloxía llimpio y con un claru
futuru mercantil.”
Pa Faustino Zapico “la única
solución visible ye que’l gobiernu
autonómicu considere esta problemática
como consecuencia directa de l’aplicación
de la so política, faciéndose consciente
de la so parte de responsabilidá nel conflictu
y darréu d’ello faciendo por buscar
igua que garantice la recuperación de los
fondos que s’invirtieren amás de
les subvenciones de formación facilitando
la creación d’una cooperativa que
la plantiya de la empresa pue asumir por tar sobradamente
capacitada pa tener poles esixencies de calidá,
producción y competitividá necesaries”.
|
