también en castellano

Izquierda Asturiana (IAS) cuida que ye indignante y un atropiellu a les llibertaes l’ingresu en prisión de Cándido y Morala

Pablo Rodríguez Alonso, portavoz d’Izquierda Asturiana (IAS) en Xixón, mostró ayeri la so congoxa y indignación pol ingresu en prisión de los dos sindicalistes de la CSI (Corriente Sindical d'Izquierda) Cándido González Carnero y Juan Manuel Martínez Morala. Rodríguez Alonso criticó tamién al Conceyu de Xixón pola “so implicación nun procesu que namás busca ser exemplarizante y intimidatoriu pa toos aquellos que lluchen pol so puestu de trabayu”.

L’agrupación d’Izquierda Asturiana en Xixón mostró, al traviés del so portavoz Pablo Rodríguez Alonso, la so fonda congoxa y indignación pol ingresu na prisión de Villabona de los sindicalistes Cándido González Carnero y Juan Manuel Martínez Morala. “Ye una mala noticia pa les y los defensores de les llibertaes que se persiga y condene a dos persones nun xuiciu nel que nun se dexó presentar pruebes a la defensa y nel qu’hai una denuncia por falsu testemuñu d’un policía, que pa enriba ta acusáu de tar infiltráu nel sindicatu CSI nel añu 2001”, declaró Pablo Rodríguez, añediendo que l’actuación del Delegáu del Gobiernu, Antonio Trevín, “ta algamando unes cotes represives increyibles.”

Pal portavoz d’IAS en Xixón “encarcélase la llucha sindical en sí, aquello a lo que cuando nun-y queda otru remediu lleva a la cai les sos reivindicaciones en defensa de non solo unos puestos de trabayu, sinón tamién d’un futuru industrial pa la ciudá de Xixón”. Por ello dende IAS camiéntase que tol procesu contra los sindicalistes “ye’l resultáu d’una zuna persecutoria del Conceyu de Xixón que quier intimidar a toos aquellos que querian lluchar polos sos derechos per aciu d’una sentencia exemplarizante”.

Nesti sen Pablo Rodríguez foi percríticu cola implicación del Conceyu de Xixón nesti procesu xudicial, “que naide tenga dulda de qu’esti equipu de gobiernu ye cómpliz d’esta sentencia, y que’l gobiernu municipal xunto cola delegación de gobiernu dio lexitimidá y suporte a esti xuiciu que busca meter mieu a toos aquellos que nun se dobleguen énte les polítiques y los escuros porgüeyos del gobiernu nos terrenos qu’agora ocupen los estelleros”. Amás Pablo Rodríguez destacó tamién “lo sangrino y especialmente insultante que ye l’actitú d’Izquierda Unida, que va colos de la feria y vuelve colos del mercáu, y a la que nun se cai la cara de vergoña al facer parte d’un gobiernu municipal que por aición consciente ye tamién responsable d’esti encarcelamientu y al empar facer declaraciones de solidariedá colos encarcelaos per boca del so portavoz Jesús Montes “Churruca”, un auténticu chaqueteru político”.

Per último, el portavoz d’Izquierda Asturiana (IAS) en Xixón animó a les y los xixoneses a participar en toles muestres d’encontu y solidariedá con Cándido y Morala y a sofitar de manera activa la Plataforma poles Llibertaes y Contra la Represión.