también en castellano

Izquierda Asturiana (IAS) de Xixón pide suspender la edición de la Gaceta municipal pola cercanía del periodu electoral

Pablo Rodríguez Alonso, portavoz en Xixón d’IAS, tachó la publicación de claramente electoralista y recordó al Conceyu que yá hai una sentencia del Tribunal Superior de Xusticia d’Asturies qu’impide la edición de la Gaceta en periodu electoral

Izquierda Asturiana esixó ayeri al Conceyu de Xixón que suspenda la publicación de la “Gaceta de Gijón”, porque según el portavoz de la formación en Xixón Pablo Rodríguez Alonso “los conteníos de la Gaceta son cada vegada más parciales, convirtiéndose nuna ferramienta propagandista del gobiernu PSOE-IU que pagamos tolos xixoneses”. Pa Rodríguez Alonso “la cercanía de les eleiciones municipales fai que’l Conceyu pierda la poca vergoña que-yos quedaba, y usen descaradamente, más tovía si ye posible, la Gaceta pa dar una información parcial de la so xestión y vendenos un Xixón idílicu que los xixoneses namás atopen nes páxines de la Gaceta”. Pal portavoz d’Izquierda Asturiana en Xixón ye escandalosu’l puntu al que se llegó, “como por exemplu facer noticies na Gaceta radiofónica sobre la presión fiscal que reciben los xixoneses, y facer comparances cola presión fiscal d’otros municipios onde gobiernen partíos de la oposición”.

Teniendo en cuenta esta llamentable situación Pablo Rodríguez esixó al municipiu “que suspenda la edición de la Gaceta, si de verdá apuesten por unes eleiciones llimpies nes que los xixoneses puean decidir el so votu con una información verdá, y nun se los confunda con campañes electorales del POSE mazcaraes n’niciatives municipales”. Nesti sen Pablo Rodríguez recordó al Conceyu de Xixón que yá hai una sentencia de 31 de xineru de 2006 del Tribunal Superior de Xusticia d’Asturies qu’obliga al Conceyu a suspender la edición de la Gaceta en periodos electorales, y de qu’en casu de que’l consistoriu nun acate esta sentencia “Izquierda Asturiana va ser la primera en pidir a la Xunta Electoral Provincial qu’obligue al municipiu xixonés a nun publicar esti vergonzosu panfletu que pagamos tolos xixoneses”.

Finalmente Pablo Rodríguez tamién apuntó que ”dende Izquierda Asturiana en Xixón llevamos tiempu protestando polos conteníos y tendenciosidá d’esta Gaceta, amás de la prácticamente nula presencia de la llingua asturiana nes sos páxines”. Asina dende IAS-Xixón yá se reclamare va tiempu un refileru de “cambeos sustanciales” na “Gaceta de Gijón” col aquel de que se convierta nun verdaderu mediu d’espresión ciudadana y reflexe los distintos puntos de vista que los ciudadanos y colectivos de la nuestra ciudá tienen sobre’l presente y el futuru de Xixón, situándose “lloñe de lo que ye agora, un mediu d’autobombu del gobiernu municipal pago por toos pa publicitar los supuestos llogros del PSOE y el so subordináu, Izquierda Unida”.

El portavoz en Xixón d’Izquierda Asturiana, Pablo Rodríguez, finalmente detalló les modificaciones que propón la formación asturianista. Per un llau “trátase d’abrir les páxines de la Gaceta a la participación de colectivos políticos, sindicales, sociales, culturales o de cualquier otra clas que puean aportar los sos puntos de vista y dalo a conocer a la ciudadanía. Pa ello tien que s’atrocar un espaciu col oxetivu de que puean aparecer tribunes d’estos colectivos”. D’igual manera esta tamién “tien que s’abrir a la collaboración ciudadana, cola creación d’una Tribuna Ciudadana onde tengan cabida les quexes y suxerencies de les y los xixoneses”.