también en castellano

Izquierda Asturiana (IAS) pide la retirada de la denuncia contra Cándido y Morala y sofita les movilizaciones de solidariedá colos sindicalistes

Pablo Rodríguez fai un llamáu a la ciudadanía a “responder una vegada más” al xuiciu contra los sindicalistes concentrándose énte los xulgaos

Izquierda Asturiana quier espresar la so solidariedá colos sindicalistes de la CSI (Corriente Sindical d'Izquierda) Cándido González Carnero y Juan Manuel Martínez Morala tres la petición por parte de la Fiscalía de seyes años y mediu de prisión poles protestes, desórdenes y daños causaos como consecuencia de les movilizaciones de Naval Xixón.

El portavoz d’IAS en Xixón, Pablo Rodríguez Alonso, esixó la retirada inmediata de les denuncies contra los dos sindicalistes, afirmando que “l’alcadesa de Xixón, Paz Fernández Felgueroso, tovía ta a tiempu de quitar una denuncia que supón una auténtica agresión a toos aquellos y aquelles qu’entendemos que la defensa de la industria en Xixón nun ye namái padremuñu de los trabayadores d’una determinada empresa, sinon que supón una obligación moral pa tola ciudadanía de Xixón”. Alonso calificó l’atitú del gobiernu de PSOE-IU en Xixón de “necia” y recordó que detrás d’esta cerrazón, escuéndense “escuros porgüeyos inmobiliarios y una descarada sede de venganza contra unes persones que siempre destacaron pola so defensa de la industria local. Les movilizaciones de los trabayadores de Naval Xixón consiguieron que a día de güei seyan 500 persones les que desenvuelven la so actividá llaboral nun espaciu destináu a una urbanización de luxu por voluntá del gobiernu municipal”

El portavoz de l’agrupación xixonesa d’IAS, afirmó que "énte un casu de represión brutal como esti, nuna ciudá que sufrió y sufre continues reconversiones qu’afecten a miles de families, faise imprescindible que la respuesta de la ciudadanía tea al altor de les circunstancies." Alonso aprovechó pa facer un llamáu en nome d’Izquierda Asturiana (IAS), a tolos vecinos y vecines de Xixón pa que “muestren el so sofitu nos xuicios que se van celebrar los próximos díes 30 de xineru y 12 de febreru concentrándose frente a los xulgaos”.

Dende Izquierda Asturiana valórase la petición de la fiscalía como "un pasu más na dinámica represiva de los gobiernos socialistes, que yá demostraron n’otres ocasiones el so verdaderu 'talante', poco avezaos a que la ciudadanía respuenda a les sos nefastes polítiques". Pablo Rodríguez resaltó’l fechu de que "seyan Morala y Cándido los escoyíos pa pagar los 'platos rotos' d’unas movilizaciones que faen que güei sigamos contando na nuestra ciudá col estelleru Naval Xixón. Ellos foron los escoyíos como ‘chivos espiatorios' demostrando l’absoluta falta de vergoña del gobiernu municipal qu’en cuenta de sofitar la llucha de los trabayadores pol caltenimientu de los sos puestos de trabayu anecien en reprimir a aquellos que torguen cola so atitú íntegra y responsable que Xixón se convierta nun auténticu ermu socioeconómicu."

Per último, el portavoz xixonés destacó l’atitú esquizoide" d’IU en toa esta situación. "Nun ye de recibu que’l portavoz d’IU en Xixón (y excompañeru de los dos sindicalistes en Naval Xixón) , Jesús Montes “Churruca”, venga agora a falanos d’un ‘ataque a la clas obrera’ cuando fai parte del mesmu gobiernu municipal que se persona como acusación contra los dos sindicalistes. De toes maneres tamos énte una muestra más del patéticu rol d’IU nos gobiernos xixonés y asturianu cola so política de dir colos de la feria y volver colos del mercáu'. Exemplos abonden como’l casu del panfletu 'Contruyendo Asturias', la nula política llingüística (con represión a los colectivos asturianistes incluída) , les reformes no llaboral, etc.".