también en castellano

Izquierda Asturiana (IAS) de Mieres alvierte del engañu que supón l’anuncia recién del centru pa la captación de CO2 na central Térmica de La Perea

Faustino Zapico, portavoz d’IAS en Mieres, calificó la nueva anuncia como "ciencia-ficción" abogando pola desestimación d’un proyectu “imposible de facer” cola tecnoloxía actual y denunciando cómo se tenta de xustificar l’ampliación d’una instalación altamente contaminante implicando al Institutu del Carbón INCAR

El portavoz de l’agrupación mierense d’Izquierda Asturiana IAS afirmó que “tamos asistiendo a una maniobra a la desesperada pa xustificar l’inxustificable proyectu de central Térmica en La Perea” y aseguró que “la captación de CO2 namás ye, per agora, una prueba de laboratoriu y nun va ser pa facese cargu del gas emitío en La Perea”. Según Zapico “con esta anuncia quier mazcarase una idea sacada de la chistera un proyectu altamente contaminante que como yá sabe tol mundu namás toma forma pa facer irreversible la llinia d’alta tensión Lada-Velilla, qu’agora quier afitase con un fechu consumáu”

Sobre l’anunciu de la captación de CO2 fechu’l martes Faustino Zapico sublliñó que “nun fai falta captar el gas d’hibernáculu porque nun se precisa enantar la central térmica de La Perea y amás ye imposible cola tecnoloxía actual” y añadió "somos escedentarios n’enerxía eléctrico, somos la comunidá autónoma que más CO2 emite por cuidadanu y ye un escándalu que se quiera engañar a los mierenses con esti timu antroxáu d’ecolóxicu y d’avance tecnolóxicu cuando nun ye más qu’una idea vaga a la que s’aferren por nun contar con argumentos sólidos depués del banzáu de critiques que vienen recibiendo y que piden el desestimientu del proyectu”

Faustino Zapico recordó que “l’ampliación de la central Térmica xustificóse, progresivamente, con delles idees que tenten da-y una imaxe de segura y llimpia énte los güeyos de los asturianos” y sobre esta cuestión afirmó que “asistiemos a una cadena d’ocurrencies de l’alministración qu’en realidá cuenta esta estación enerxética como una pieza clave nos sos planes y que fai lo que faiga falta, inclusive engañar, pa facer a los ciudadanos, nesti casu de les cuenques, y al INCAR, cómplices de lo que va ser una rémora contaminante p’Asturies y, de facto, una concepción enerxética que naide, n’Europa nin nel estáu español, defende nos nuestros díes”

Al respective’l portavoz de IAS en Mieres insistió en que “lo que se quier vender ye una instalación que valga pa investigar estes técniques pero que de manera nenguna va captar CO2 en La Perea” y amestó que “hai que tener bien en cuenta que namás ta anunciándose un proyectu ensin definir, pal que se insinúa la posibilidá de gastar más fondos europeos, demostrando que, una vegada más, los mesmos van emplegase pa condenar el futuru medioambiental d’Asturies de forma irreversible en cuenta d’ayudanos a salir de la crisis.”

El portavoz de l’agrupación mierense d’IAS aseguró amás que "cuando asistimos al debate mundial sobre la emisión de gases d’hibernáculu y sobre l’alarma, compartida por tola comunidá científica al unísonu, del calecimientu global, a los políticos del PSOE y los sos socios de gobiernu métese-yos na cabeza qu’Asturies bata tolos records d’emisiones y dedíquense a xugar públicamente con idees de la ciencia ficción pa xustificase y engañar de manera indecente a los ciudadanos”

Faustino Zapico amestó “yá nun se manda de la idea de la cantidá de puestos de trabayu que va xenerar porque la xente nun ye fato y tol mundu sabe qu’esto ye mentira, agora quieren colanos el proyectu con un marafundiu descomanáu y con una supuesta igua máxica pal CO2 que nun va pasar de ser un conxuntu d’ensayos que tán utilizándose nuna táctica d’aguapecimientu pa derromper el camín de la estratexa enerxética arecista”

“Izquierda Asturiana del Caudal”, finalizó Zapico, “va entamar toles aiciones llegales posibles contra esti proyectu absurdu y pa ello fixo una ronda de contactos colos activos ecoloxistes de la comarca, como tamién coles agrupaciones vecinales que son sensibles a esti proyectu que condena les cuenques mineres y a Asturies a ser un focu de contaminación”.