EL
PLAN CUERNOS POR ASPES 2
EL VAQUINSERSO
Dalgo
diba pasar nel aeropuertu. Los emplegaos abeyaben
d’un llau pa otru, glayábense, facíense
esparabanes y, sobre too, nun paraben de mirar
pa los sos reloxes. Los guardies xixilaben especialmente
a tolo que se moviere, dende xente a formigues
que se colaben de los praos de la rodiada.Y la
pista más importante, nes cocines taben
preparándose pinchos a fartar. Nun hai
dulda dala, dalgún políticu al usu
diba inagurar dalgo nel llugar.
De sópitu, una carrapotada d’autobuses,
tresportando vaques, paren na entrada y suelten
a les sos viaxeres especiales. Diben con gorros
enllenos de lletres, d’esos que se lleven
nes excursiones barates. Les maletes yeren toes
iguales, como mercaes nuna ufierta de saldu. Y
muxíen como si tuvieren una megafonía
na boca. Al minutu apaeció una azafata
con un cartelu que dicía: “Viaxeres
del Vaquinsersu”. Les vaques arrexuntáronse
a ella, dexándola inmovilizada. Depués
de delles instruciones, ficiéron-y un pasiellu
pel que pasó p’hacia ún de
los mostradores pa preparar l’embarque.
Tratábase del primer viaxe de vaques del
oucidente asturianu a tierres soleyeres pa que
vivieren ellí la so xubilación.
El plan cuernos por aspes veía asina´l
so primer pasu populista. Los medios de comunicación
nun tardaron en llegar. El so llabor propagandísticu
axustábase a los intereses de los sos xefes
los empresarios desllocalizaos. Anestesiar a la
opinión pública y dirixir los sos
pensamientos p’hacia los intereses de la
globalización yera’l so únicu
deber. Saldría en toles primeres páxines,
espeyando esi momentu de felicidá pa cientos
de vaques que diben tener el so merecíu
descansu depués d’años dando
llechi. A la vegada, n’otru requexu de la
portada, falaríen del gran avance teunolóxicu
pal oucidente, la enerxía eólica
daría perres asgaya pa una sociedá
camín d’un despegue económicu,
sabe dios a que paraísu fiscal.
Una filera cochazos aportaron a Ranón.
Homes y muyeres de cuerpos trabayaos entamaron
a surdir de les sos puertes y a facer cordones
de seguridá al rodiu de delles persones.
Llegaben les autoridaes. Les cámares entamaron
a disparar y grabar. Los periodistes desfáense
en sorrises a los mandamases, pol aquello del
ascensu. Les fuerces vives de la política
saluden a la xente que s’atopa nel edificiu,
non por educación, sinon porque queda mui
afayadizu nes semeyes y nes filmaciones. En cuantes
finen col ritu de la popularidá, empobínense
pal únicu llugar d’interés
pa ellos, onde ta preparada la llacuada. Na política
lo importante ye fartase de comida o de perres
y, eso, n’Asturies, saben facelo meyor que
nadie.
Acabantes de zampar tolo preparao, empobínense
pa la pista onde ta asitiáu l’avión.
Ellí, corten la teluca d’inauguración,
cola yá tradicional sorrisa zorramplia
del políticu astur que ve como fae caxa
cola obra. Pero nesi intre, una borrina atapa
tol aeropuertu. El Nuberu llanza un xarazu con
piedros del tamañu d’un pinchu tortiella
y la comitiva cuerre p´hacia l’edificiu.
Mialma que recularon. Nes puertes taben les vaques
enraxonaes. Pela megafonía anunciáren-yos
la suspensión del vuelu por mor del tiempu.
Otra cosa non, pero n’Asturies, hasta los
bichos tán fartos de les mentires de los
políticos que gobiernen. Si nun había
vuelu, aquellos papanates diben quedase al aire
llibre mientres durare’l xarazu. Y depués,
tovía los diben escorrer hasta la Xunta,
de la que glayaben Oficialidá. Taben fartuques
y nun yera pola comida, yá que a elles
nun-yos dieren nin les sobres. Aquellos politicastros
que despreciaben tolo que sonare a Asturies diben
conocer el país a pie. Diben acabar lleendo
a Osoro n’asturianu.
16/10/05
Ediciones anteriores
d'ATERRIZA COMO SEYA
El
plan cuernos por aspes
Enantes
muertu qu'asturianu
Aterriza como
seya
|
