La hora del movimientu

elecciones20DLA HORA DEL MOVIMIENTU
IAS énte’l resultáu electoral del 20A

I. AFONDA LA CRISIS DEL RÉXIME
Les eleiciones del otru domingu 20 d’avientu suponen un pasu más na fundición del réxime de la II Restauración na so propia llamarga. Anque los resultaos dieron una victoria pírrica de les fuercies de la conservación (PSOE-PP) frente a les del posible cambiu (o recambiu, Podemos y Ciudadanos) con ventaya del primer bloque, la propia crisis de llexitimidá del marcu políticu del 78 non solo nun s’igua, sinón que se fai más grave.

Estes eleiciones vienen a ser la espresión en votos del cambiu sociolóxicu que se vien dando y empezó a vese dende’l 15M del 2011, y que tuvo’l so puntu d’inflexón coles Marches de la Dignidá del 22 de marzu del 2014, qu’amuesen la crisis del réxime.

Sicasí, nun podemos falar d’un desplazamientu bultable de la población, asturiano o español, pa la esquierda. Medró enforma la intolerancia pa cola corrupción o’l númberu de persones dispuestes a movilizase, idees de la esquierda hasta va poco ridiculizaes volvieron a garrar fuercia, como la necesidá d’una banca pública, l’abdicación del rei supunxo un repunte del discursu republicanu… pero’l centru de gravedá de la sociedá sigue ensin salise del consensu de 1978, por más que les resquiebres seyan visibles. Si bien el resultáu electoral de les fuercies d’esquierda ye mayor que nunca, ye más por mor de la moderación del so actor principal (Podemos) qu d’una radicalización curiosa de la población que ponga seriamente en cuestión el modelu políticu de la II Restauración.
Siguir lliendo

Izquierda Asturiana con Unidá Popular

Alberto Garzón, Por un nuevu país. Unidá PopularEsti domingu 20 d’avientu celébrense unes elecciones a les Cortes españoles de gran importancia pal pueblu asturianu. El nuestru país, que lleva trenta años asistiendo como convidáu de piedra al esmantelamientu del so sistema productivu, ve agora que, como consecuencia del resultáu electoral nel Reinu d’España, en plena crisis del modelu turnista de la II Restauración, ye mui posible que s’abra una nueva operación gattopardesca, un cambialo too pa que too siga igual, onde les consecuencies podian ser tovía más negatives pal nuestru pueblu.

La nueva operación de maquillaxe del réxime paez que pasa per una reforma constitucional que tenga como resultáu final que, igual qu’en 1978, Asturies volvia a quedar arrequexada. Los cuatro partíos a los que los grandes grupos de comunicación dieron el preste pa ser potenciales vencedores de les elecciones (PSOE, PP, Podemos y Ciudadanos), esto ye, el vieyu turnismu y los sos recambios, representen n’Asturies la submisión y el sucursalismu más porcaz. Nengún d’ellos tien un programa de rotura cola oligarquía nin colos marcos de dominación qu’emanen d’ella: el réxime del 78, la OTAN, la UE. Nengún d’ellos plantega n’Asturies un marcu d’autogobiernu superior a la ruina autonomía del Estatutu de 1981. Siguir lliendo

Izquierda Asturiana refuga la presencia de la Guardia Real n’Asturies

Guardia RealNun hai razón nenguna que xustifique la so presencia nel país

Con motivu de l’anunciada visita a Uviéu de la Guardia Real española nel contestu de les fiestes de San Mateo, y de la presencia de la mesma nel conceyu de Mieres, onde ta previsto que desendolquen una actividá d’exhibición ecuestre, Izquierda Asturiana (IAS) quier facer pública la so postura sobre esti tema:

1º) La decisión de traer la Guardia Real tanto a Uviéu como a Mieres ye de les corporaciones anteriores d’entrambos conceyos. Anque la de Mieres ye del mesmu signu políticu que l’anterior lexislatura, Izquierda Asturiana (IAS) nun taba presente na mesma, polo que nun se siente venceyada a la decisión d’aprovechar la visita a Uviéu de la Guardia y la so pernocta nel conceyu mineru pa facer una demostración ecuestre.

2º) La Guardia Real ye la vieya Guardia de Corps, esto ye, el cuerpu militar asignáu a la protección personal de los representantes de la llamada familia real, esi garapiellu de parásitos sociales que representen la institución cimera del réxime de la II Restauración. Nada xustifica la so presencia n’Asturies.

3º) Han de ser los nuevos gobiernos locales d’Uviéu y Mieres los que garren el determín d’anular esa visita, que nada aporta a entrambos conceyos y al conxuntu d’Asturies. Izquierda Asturiana (IAS), na midida de les sos posibilidaes, ta faciendo estes selmanes porque seya asina.

4º) De nun se revocar la decisión de traer a la Guardia Real a Asturies, Izquierda Asturiana (IAS) encamienta a la ciudadanía a amosar el so refugu a la visita.

Uviéu, 21 d’agostu del 2015

Dirección Nacional d’IAS

Un derechu civil inalienable #ConTolesLletres

Día Lletres Asturianes 2015Dende Izquierda Asturiana (IAS) llamamos a la participación esti vienres 8 de mayu, igual que n’años anteriores y mentanto seya necesario, na manifestación que, entamada pola Xunta pola Defensa de la Llingua Asturiana y coincidente col Día de les Lletres Asturianes, percorrerá les cais d’Uviéu pidiendo la oficialidá del asturianu y del gallego-asturiano.

Ye esti un actu más, necesariu y fundamental, nun día simbólicu y señaláu, dientro de la reivindicación de los derechos civiles de los falantes, actuales y futuros, de la ciudadanía asturiana nel so conxuntu; ún de los munchos que se faen y que sirven pa recordar a los que tienen la responsabilidá política de garantizalos, que siguimos equí añu tres añu y vamos siguir tando mientres ellos nun actúen con xusticia. La manifestación pola oficialidá del idioma asturianu nun ye nin debe ser una procesión ritual: Ye un actu d’afirmación ciudadana, de compromisu cola identidá, de llealtá y que manifiesta voluntá de futuru pa cola llingua. La oficialidá ye una cuestión que nin tien nin ha de sometese a xuegos electorales, o referendums. Esta (co)oficialidá nun pue depender de los votos y les estratexes, de les falses voluntaes y falcatrúes del momentu electoral presente. Los derechos civiles tiénense y deféndense y si l’alministración, si’l poder los ñega, esíxense y conquístense. Tampoco nun puede ser una carta intercambiable nuna baraxa d’intereses ayenos a los asturianos y asturianes, que simplemente piden la ferramienta que-yos valga pa ser los amos del destín de la so llingua. Un derechu civil inalienable. Eso ye lo que tamos pidiendo. Ye bien fácil d’entender y tendría de ser igual de fácil d’esplicar. Siguir lliendo