Izquierda Asturiana refuga la presencia de la Guardia Real n’Asturies

Guardia RealNun hai razón nenguna que xustifique la so presencia nel país

Con motivu de l’anunciada visita a Uviéu de la Guardia Real española nel contestu de les fiestes de San Mateo, y de la presencia de la mesma nel conceyu de Mieres, onde ta previsto que desendolquen una actividá d’exhibición ecuestre, Izquierda Asturiana (IAS) quier facer pública la so postura sobre esti tema:

1º) La decisión de traer la Guardia Real tanto a Uviéu como a Mieres ye de les corporaciones anteriores d’entrambos conceyos. Anque la de Mieres ye del mesmu signu políticu que l’anterior lexislatura, Izquierda Asturiana (IAS) nun taba presente na mesma, polo que nun se siente venceyada a la decisión d’aprovechar la visita a Uviéu de la Guardia y la so pernocta nel conceyu mineru pa facer una demostración ecuestre.

2º) La Guardia Real ye la vieya Guardia de Corps, esto ye, el cuerpu militar asignáu a la protección personal de los representantes de la llamada familia real, esi garapiellu de parásitos sociales que representen la institución cimera del réxime de la II Restauración. Nada xustifica la so presencia n’Asturies.

3º) Han de ser los nuevos gobiernos locales d’Uviéu y Mieres los que garren el determín d’anular esa visita, que nada aporta a entrambos conceyos y al conxuntu d’Asturies. Izquierda Asturiana (IAS), na midida de les sos posibilidaes, ta faciendo estes selmanes porque seya asina.

4º) De nun se revocar la decisión de traer a la Guardia Real a Asturies, Izquierda Asturiana (IAS) encamienta a la ciudadanía a amosar el so refugu a la visita.

Uviéu, 21 d’agostu del 2015

Dirección Nacional d’IAS

Un derechu civil inalienable #ConTolesLletres

Día Lletres Asturianes 2015Dende Izquierda Asturiana (IAS) llamamos a la participación esti vienres 8 de mayu, igual que n’años anteriores y mentanto seya necesario, na manifestación que, entamada pola Xunta pola Defensa de la Llingua Asturiana y coincidente col Día de les Lletres Asturianes, percorrerá les cais d’Uviéu pidiendo la oficialidá del asturianu y del gallego-asturiano.

Ye esti un actu más, necesariu y fundamental, nun día simbólicu y señaláu, dientro de la reivindicación de los derechos civiles de los falantes, actuales y futuros, de la ciudadanía asturiana nel so conxuntu; ún de los munchos que se faen y que sirven pa recordar a los que tienen la responsabilidá política de garantizalos, que siguimos equí añu tres añu y vamos siguir tando mientres ellos nun actúen con xusticia. La manifestación pola oficialidá del idioma asturianu nun ye nin debe ser una procesión ritual: Ye un actu d’afirmación ciudadana, de compromisu cola identidá, de llealtá y que manifiesta voluntá de futuru pa cola llingua. La oficialidá ye una cuestión que nin tien nin ha de sometese a xuegos electorales, o referendums. Esta (co)oficialidá nun pue depender de los votos y les estratexes, de les falses voluntaes y falcatrúes del momentu electoral presente. Los derechos civiles tiénense y deféndense y si l’alministración, si’l poder los ñega, esíxense y conquístense. Tampoco nun puede ser una carta intercambiable nuna baraxa d’intereses ayenos a los asturianos y asturianes, que simplemente piden la ferramienta que-yos valga pa ser los amos del destín de la so llingua. Un derechu civil inalienable. Eso ye lo que tamos pidiendo. Ye bien fácil d’entender y tendría de ser igual de fácil d’esplicar. Siguir lliendo

Somos República, y non solo’l 14 d’abril

1937 Manifestación República XixónUn añu más, cúmplese’l 14 d’abril l’aniversariu de la proclamación de la II República española. Un añu más, Asturies vive delles convocatories republicanes, que van dende la reivindicación de futuru al simple memorialismu historicista. Izquierda Asturiana (IAS), como partíu republicanu que ye dende la so fundación, nun ye indiferente a estes convocatories y encamienta a los sos afiliaos y simpatizantes la participación nes mesmes, pero nun ye convocante de nenguna, non por hostilidá hacia los sos promotores, sinón porque entendemos que la reivindicación republicana nun puede asociase nin única nin preferentemente al 14 d’abril.

Pa nós, el republicanismu ye la defensa d’un modelu basáu na democracia en toles sos vertientes y na visión de la sociedá como comunidá d’iguales. Ye l’apueste pol autogobiernu de los pueblos, tanto a nivel económicu como políticu. Eso esclúi, evidentemente, cualesquier idea monárquica. Reconocemos nes esperiencies históriques de la I y II repúbliques españoles los sos aspectos positivos, pero vemos tamién necesaria la crítica hacia les mesmes nos munchos aspectos negativos que tuvieron pal nuestru pueblu y, fundamentalmente, pensamos que la reivindicación republicana na Asturies del 2015 pasa esencialmente per definir un proyectu pal nuestru país que la materialice. Siguir lliendo

Hola… y adiós Leonor

Nun somos súbditos y súbdites.

Nun somos súbditos y súbdites.

Nun ye namás un anacronismu llingüísticu. Nun ye una cuestión terminolóxica. Anque de la Revolución francesa p’acá, la condición de “ciudadanu” se contraponga dialécticamente a la de “súbditu”: Ciudadanu yera polo tanto la persona con derechos políticos integrada nuna comunidá, por oposición al súbditu que debía sumisión a un monarca. Uno ye l’autoridá del pueblu organizáu y dotáu d’una espresión política y lo otro vivir sometíu a una autoridá que n’última instancia provién d’un poder divinu, sobrenatural y tresmitíu por vía consanguínea. Nel Estáu español -perdón, n’El Reinu d’España, que ye lo que pon nel documentu d’identidá y nos pasaportes- llevamos treinta y picu años sintiendo les mesmes disculpes non pidíes, les mesmes esplicaciones absurdes que nos cuenten la vieya película. A saber “En realidá, anque nun lo ponga, somos ciudadanos; el rei reina pero nun gobierna; esto ye una monarquía republicana; lo importante ye que tamos nun Estáu de derechu, etc. etc. Quixeron facenos vivir creyendo na cuadratura del círculu y baxo la llei del silenciu amazcaráu de “consensu”. Pues mirái, non. Esta película tien un guión escritu polos protagonistes de la Dictadura franquista, dictáu polos mesmos poderes económicos qu’engordaron al calor d’ella pa poder siguir chupando’l sangre de la xente que vivimos del nuestru trabayu. Siguir lleendo