Yá ta entamada la “segunda transición”

El réxime del 78 intenta una operación de “gattopardismo” pa torgar un procesu constituyente.

El réxime del 78 intenta una operación de “gattopardismo” pa torgar un procesu constituyente.

L’abdicación güei, llunes 2 de xunu, del monarca español impuestu por Francisco Franco ye un saltu cualitativu nel intentu de la oligarquía española de caltener el control del timón d’un réxime qu’agoniza. Pese a los intentos de presentar la socesión como daqué natural cuando hasta va díes s’aventuraba como imposible dende los mesmos medios y sectores qu’agora la ven lóxica, ye evidente que ye un pasu meditáu pa intentar reconducir una situación que lleva podreciendo cuantayá y qu’amenaza con llevar per delantre al mesmu réxime de la II Restauración.

Nun sabemos, y tampoco nun ye importante porque nun ye determinante, si l’abdicación de Juan Carlos de Borbón ye consecuencia d’un agravamientu de la so salú. Lo que ye evidente ye que dexar pasu a Felipe de Borbón como nuevu rei val pa intentar rellanzar la imaxe de la institución monárquica, absolutamente desprestixada nestos postreros años. Too ello nel contestu de la crisis del réxime, cuando empecipien a madurar les condiciones polítiques pa la so superación. Les marches de la dignidá del 22M amosaron que’l refugu al réxime ta na so cota más alta dende la so instauración. Les eleiciones al parlamentu européu amosaron que tamién nel terrén electoral la desafección al turnismu yá ye mayoritaria. El réxime intenta recuperar la iniciativa con una nueva figura na xefatura del estáu, menos chiscada polos escándalos de corrupción y d’otru tipu, que se someterá a una operación de márquetin políticu onde se faga por recuperar la épica de la llamada Transición de los años setenta, con llamaos al consensu y con un previsible gobiernu de concentración PSOE-PP pa pilotar esi segundu viaxe al mesmu sitiu. Siguir lleendo

Izquierda Asturiana (IAS) énte les elecciones europees

Elecciones Europees 2014Esti 25 de mayu, fecha histórica na que se conmemora’l llevantamientu del pueblu asturianu en 1808 escontra la potencia que dominaba daquella’l continente européu, l’Imperiu Francés, coincide paradóxicamente coles elecciones al Parllamentu européu. Estes elecciones danse nun contestu d’agravamientu de la crisis de llexitimidá que tienen tanto’l réxime español como la propia UE, en medio de movilizaciones sociales perfuertes tanto n’Asturies como en bona parte d’Europa, y podíen ser una bona ocasión pa dir perfilando un programa realmente alternativu pa los pueblos del continente.

Por desgracia, nestes elecciones nun se ta falando de lo que la UE supunxo y supón p’Asturies. Nun se ta falando de cómo l’ingresu del Reinu d’España na CEE fíxose, ente otres coses, empara d’esmantelar el texíu productivo que yera’l motor de la economía asturiana dende diba más d’un sieglu. Nun se fala de los millones en fondos europeos que llegaron al nuestru país y que s’alministraron de forma ineficaz y corrupta, de cómo nun s’usaron pa rexenerar el texíu productivo sinón pa facer obres faraóniques que teníen como única xustificación el fechu mesmu de faceles, lo mesmo que p’armar una rede clientelar cola qu’articular mayoríes electorales. Nun se fala de la moneda único y de lo que supunxo pa los pueblos del continente, nin de los intentos de centralización d’un proyectu políticu, la UE, que nació como superestructura económica del gran capital francoalemán, como tampoco se fala del inminente Tratáu de Llibre Comerciu ente la UE y los USA, qu’implica una impunidá tovía mayor de les multinacionales y que va tener consecuencies catastrófiques nel ámbitu llaboral, ambiental y de la salú. Siguir lleendo

OFICIALIDÁ (O OFICIALIDÁ: LLINGUA Y ACCIÓN)

Uviéu. Vienres 9 de mayu, a les 19:30 h. Dende La Estación del Norte hasta'l Teatru Campoamor. Con motivu del Día de Les Lletres Asturianes. Convoca la Xunta pola Defensa de la Llingua Asturiana.

Uviéu. Vienres 9 de mayu, a les 19:30 h. Dende La Estación del Norte hasta’l Teatru Campoamor. Con motivu del Día de Les Lletres Asturianes. Convoca la Xunta pola Defensa de la Llingua Asturiana.

Esti vienres 9 de mayu, la reivindicación de la oficialidá y normalización del asturianu vuelve salir a la cai nuna nueva manifestación, convocada pola Xunta pola Defensa de la Llingua Asturiana, na que ciudadanos, colectivos de llealtá llingüística, asociaciones culturales, sindicatos y partíos políticos volveremos andar el centru d’Uviéu reclamando un futuru pal nuestru idioma.

A lo llargo d’estos años, mientres la sociedá foi pasín ente pasu acoyendo’l mensaxe, ensin mieu y meyorando la conciencia y actitúes sociollingüístiques –como lo demuestren les encuestes feches– los grupos políticos mayoritarios dirixíos hasta’l momentu por elites provincianes falsamente cosmopolites intoxicaes polos sos prexuicios y complexos, miren pa otru llau y fainse los sordos énte esta demanda social d’igualdá de derechos civiles.

Podrán refugar la existencia de la cuestión llingüística, podrán dicir qu’equí ye too paz y harmonía, onde too guarda un orde natural, nesti repartu desigual de papeles y funciones y que dir un pasu más allá supón abrir les puertes a nun se sabe qué plagues y llaceries, invocando al diañu de la obligación y la imposición, al costu económicu –y más nesta época de crisis (d’estafa) económica omnipresente– y otres falcatrúes. Podrán dicir que nun hai demanda social, cuantificada pa ellos como votos nunes urnes, demostrando’l so despreciu pa la sociedá civil dexando la democracia como un exerciciu ximnásticu electoral cada daqué tiempu y dando’l llombu’l restu del tiempu a cualquier demanda social que nun diga colos sos intereses particulares, produza réditos o venga de determinaos “lobbys” y grupos de presión.

Frente a esto, frente a esta negación de la realidá per parte de la castra política autóctona sucursalista, l’únicu camín posible ye siguir alantre col llabor continuu y constante de defensa de los nuesos derechos llingüísticos y esixir la oficialidá de la llingua asturiana –y del gallego-asturiano- pasu necesariu na normalización social de la mesma.

Ye daqué tan simple como la reconocencia d’un derechu civil de tola ciudadanía. El derechu de la población asturfalante a emplegar la llingua propia y el derechu de tolos asturianos y asturianes a acceder a la mesma, a deprendela, usala y querela Derechu de tolos ciudadanos asturianos y asturianes: los que falen, los que yá nun lo falen o los que tán acabantes de llegar a Asturies.

Un derechu tien que tener un refrendu llegal que garantice la tresmisión xeneracional. Coses tan cencielles como l’emplegu del asturianu nos medios de comunicación con una TPA n’asturianu, col enseñu garantizáu del asturianu y n’asturianu na educación y con un usu real y non simbólicu na alministración o na toponimia…

En definitiva, facer normal lo que va yá años que tendría que lo ser.

Pola llucha y la propuesta

Manifiestu d’Izquierda Asturiana énte’l 1u mayu

Un añu más, llega’l 1u de mayu, día internacional de celebración de la identidá colectiva de la clas trabayadora. Un añu más, salimos a la cai a reivindicar les conquistes de los que nos precedieron y que nos tán quitando cola sida de la crisis: acabu de la negociación colectiva, reducciones de xornal, precarización absoluta o recortes nos servicios públicos.

Les agresiones nun son el simple resultáu de tener un gobiernu del PP. Recorta’l PP creando’l marcu llegal de tales agresiones, pero tamién el PSOE aplicando eses ferramientes llegales n’Asturies. Nun hai recortes “progresistes” o recortes “conservadores”, hai agresiones a la clase trabayadora, vengan d’onde vengan.

Y tienen un orixe claru, que ye la voluntá de disciplinar a la clase trabayadora del escenariu post-crisis: una clas ensin derechos reconocíos, ensin ferramientes de llucha y cola precariedá como horizonte vital. Ye l’escenariu de l’austeridá perpetua, de la submisión permanente nel marcu de la UE y el réxime del 78.

L’europeísmu ye’l discursu ideolóxicu que s’impunxo a derecha y esquierda dende los años 80. Ye la xustificación permanente de la naturaleza, polítiques y actuaciones de la Unión Europea. Tolo que viniera d’Europa yera bono. Y d’Europa, p’Asturies, vieno la reconversión brutal del campu y la industria. D’Europa vinieron los pieslles de cientos d’empreses que xeneraron decenes de miles de paraos, y con ello emigración y precariedá. D’Europa vinieron tamién carraos de perres,
xestionaos de forma catastrófica pola casta político-sindical-empresarial autóctona yá que nun valieron pa rexenerar el texíu productivu, sinón pa financiar la rede clientelar cola que fabricar mayoríes electorales, y obres faraóniques fonte de corrupción descomanada, col casu más escandalosu, pero non únicu, del puertu d’El Musel.

La respuesta ye la llucha, y ye la propuesta. De poco val movilizase si nun hai un proyectu alternativu pol que lo facer. Y el proyectu ye’l romper colos marcos de dominación, la UE y el réxime del 78, col envís d’armar un proyectu constituyente onde’l pueblu asturianu seya l’únicu amu del so futuru. Y el métodu ye’l combate unitariu de tolos sectores en llucha, de tolos que pierden cola crisis global del sistema y del réxime. Vímoslo na manifestación de va mes y mediu de les empreses en llucha equí en Xixón, y vímoslo tamién nes marches de la Dignidá del 22M. Nel añu del 80 aniversariu de la revolución asturiana, tenemos un exemplu claru de lo que ye quien a facer esti pueblu cuando ta uníu y consciente de la so fuercia.

El 1u mayu y el restu del añu, Fuercia y Unidá hasta la victoria.

Izquierda Asturiana (IAS)