Sobre la situación política abierta pol procesu catalán

Cartel Referemdum Catalunya 1-0Los acontecimientos vienen precipitándose dende la convocatoria per parte del gobiernu catalán d’un referéndum d’autodeterminación pal día 1 d’ochobre. Les amenaces del gobiernu central, yá concretaes en fechos, d’intervenir en Cataluña pa torgar la celebración d’esa consulta suponen un desafíu políticu de primer orde, non solo pal pueblu catalán, sinón tamién pa tolos demás pueblos del estáu. Por ello, dende Izquierda Asturiana (IAS) queremos dexar clara la nuestra posición política:

A) El pueblu catalán tien de poder decidir llibremente’l so futuru, y tien de decidilo ensin inxerencia nenguna. La consulta entamada pol gobiernu catalán dexa a les clares la obsolescencia y les llendes del réxime de la II Restauración. La Constitución de 1978 nunca nun foi una igua pa la cuestión nacional, sinón una nueva fonte d’agravios qu’agora entra en crisis terminal. Los intentos del gobiernu catalán de facer una consulta pautada viéronse imposibles dende’l momentu cuando’l que llegalmente tenía’l poder pa otorgala, el poder central, negóse dafechu a facelo. Polo tanto, les crítiques al calter illegal de la consulta, usándoles como sida pa nun la encontar son una amuesa de pura hipocresía.

B) Les esquierdes del restu del Reinu tienen una inmensa responsabilidá política énte esti procesu, onde ye necesario definise. Nun val ponese de perfil faciendo declaraciones retóriques en favor del derechu a decidir y a un tiempu negase a sofitar l’exerciciu d’esi derechu amparándose na so illegalidá. Llegalidá nun ye llexitimidá. Llegales yeren les lleis peles que se pasó de la dictadura franquista a la II Restauración y eso nun les fai llexítimes. El desafíu políticu que ta faciendo’l pueblu catalán abre una resquiebra nel réxime restauracionista, la más grande en casi cuarenta años, y abre posibilidaes reales de valtalu. El procesu constituyente catalán puede abrir nuevos procesos constituyentes nos demás pueblos del estáu, y los republicanos dignos d’esi nome tenemos que los encontar. El discursu falsamente internacionalista de cierta esquierda que diz defender la unidá forciada d’España pa nun francer la unidá de la clase trabayadora y que critica a les esquierdes catalanes por ponese al llau de la so burguesía nun tien xacíu nengún, yá que, oxetivamente, implica ponese del llau del gobiernu del PP y de la oligarquía española, incluyendo la so parte catalana, abiertamente opuesta a la independencia. Ye decepcionante la puesta n’escena esti domingu 24 en Zaragoza nel “Conceyu de cargos públicos pola llibertá, la fraternidá y la convivencia”, onde en cuenta de llamar a la movilización por un procesu constituyente pídese diálogu ente los gobiernos catalán y español, cuando lo lóxico sería llamar a la desobediencia civil frente a la involución autoritaria del gobiernu central. Lo que ta pasando en Cataluña nun afecta solo a Cataluña, y nun ye serio, dende fuercies qu’aspiren a representar a la mayoría social, pidir a otros que dialoguen quedando de simples espectadores.

C) Si les esquierdes nun tán al altor del desafíu históricu, el resultáu va ser catastróficu, yá qu’implicará un reforciamientu del PP y la so política reaccionaria y recentralizadora, amparada pola retórica españolista que gasta tanto la derecha como la presunta esquierda. Presentándose como los garantes de la “unidá nacional”, alimentando un discursu represivu, podemos venos asistiendo a un recorte nos derechos civiles que torgue la protesta social, censure a la oposición y criminalice la movilización, rozando’l camín a un procesu asemeyáu al que ta viviendo Turquía.

D) El pueblu catalán yá ganó, pase lo que pase’l 1 d’ochobre. La imaxe internacional que ta dando’l gobiernu español, interviniendo l’autonomía catalana, mandando miles de policíes a Cataluña a trancar imprentes y confiscar papeletes, y usando’l poder xudicial p’amenazar a funcionarios y cargos públicos fai rescamplar el so calter antidemocráticu. Amuesa a les clares la inviabilidá del réxime pa dar una respuesta eficaz y durable a la cuestión nacional. Depués del 1 d’ochobre, vote muncha o poca xente en función de la eficacia represiva del estáu, vendrán nueves elecciones al parllamentu catalán y la mayoría independentista va salir reforciada, polo que’l problema va siguir ehí, más encetáu y con igua más revesosa.

E) La posible igua a esi problema abre otros escenarios enforma negativos pal pueblu asturianu. Si lo qu’intenten negociar PSOE y PP cola derecha catalanista ye una reforma constitucional a la carta, vamos ver cómo s’amazcara de federalismu una reedición del actual estáu neoforalista: una pseudofederación con un status especial d’estaos asociaos pa Cataluña y Vasconia y un “caxón de xastre” onde meter a los demás países del reinu, que veríen recortaes y afogaes les sos llexítimes aspiraciones. Too ello col monarca al frente. Too ello inaceptable.

F) Izquierda Asturiana (IAS) apuesta pola rotura democrática. Sofitamos el referéndum del día 1 d’ochobre entamáu pol gobiernu catalán y apostamos pola movilización social nel conxuntu del reinu pol derechu a decidir, non solo de los catalanes sinón de tolos pueblos del estáu. Pola defensa de les llibertaes democrátiques y los derechos civiles, defendemos una estratexa de movilización y desobediencia civil que provoque la convocatoria a elecciones constituyentes, tanto a nivel estatal como en toles comunidaes, col envís d’entamar los procesos que nos lleven a la república d’iguales: iguales en derechos, iguales en soberanía.

G) Enantes y depués del referéndum, IAS amuesa la so disposición a participar en toles iniciatives unitaries que defendan el derechu a decidir tanto del pueblu catalán como de tolos demás pueblos del estáu, y qu’apuesten pola salida republicana y democrática al statu quo. Güei ye más posible qu’ayeri. La resquiebra catalana puede ser l’argayu democráticu qu’Asturies necesita.

Pola República d’iguales

Pola República Asturiana

Pola soberanía de los pueblos

24 setiembre del 2017

Dirección Nacional d’Izquierda Asturiana (IAS)

El PP amuesa la cara retrógrada alegando a les Ordenances del asturianu en Mieres

 

Logo-Conceyu-MieresEl xueves 25 de mayu, fecha d’especial significación histórica p’Asturies, celebrábase plenu ordinariu de la corporación mierense. Nél, ente otros puntos, taba’l debate y aprobación inicial de les Ordenances d’Usu de la Llingua Asturiana nel Conceyu de Mieres, ellaboraes, a iniciativa del gobiernu local presidíu por Aníbal Vázquez, pol conceyal delegáu de Política Llingüística y militante d’Izquierda Asturiana (IAS) Faustino Zapico. Les ordenances salieron alantre col votu favorable de los grupos municipales d’Izquierda Xunida, nel que ta integráu el nuestru compañeru, PSOE y Somos Mieres y l’únicu contrariu de los 3 representantes del PP.

Sigue leyendo

Oficialidá: Simplemente iguales

 

Dende Izquierda Asturiana facemos un llamáu a la participación esti vienres 5 de mayu –coincidiendo cola celebración del Día de les Lletres Asturianesna manifestación pola oficialidá del asturianu y del gallego-asturiano convocada pola Xunta pola Defensa de la Llingua Asturiana como actu d’afirmación colectiva, de compromisu, de llealtá y de voluntá d’un futuru pa la nuesa llingua.genaro-alonso

Otru añu más tenemos, por desgracia, que volver a repetir per escrito lo que venimos diciendo y reivindicando dende cuantayá. Nun podemos dicir otro que pa la llingua asturiana namás hai promeses incumplíes una y otra vegada –l’aprobación de la especialidá docente–, retrocesos claros nel enseñu –la optatividá de l’asignatura enfrentada a Cultura Asturiana, perdiendo d’esti mou la voluntariedá reflexada na Llei d’Usu– y fueos artificiales como la “vehicularidá” del asturianu –más bien la impartición “esperimental” de dalguna asignatura n’asturianu, nunos pocos de centros– o la incorporación del asturianu a la Educación Infantil, que yá veremos cómo se fai. A esto amestamos los incumplimientos na toponimia, los problemes col estatus llegal de l’ALLA –el so financiamientu y vinculación col Principáu-, xunto con una programación probetaya na RTPA y dalgo de xuegos florales nesta selmana y tenemos un resume completu del añu. Sigue leyendo

Izquierda Asturiana (IAS) y la Unidá Popular

Con motivu de la nueva convocatoria electoral a les Cortes españoles el nuestru partíu, Izquierda Asturiana (IAS), quier amosar la so posición política nesti momentu clave de la nuestra Historia:papela

1º) Les elecciones del 20 d’avientu de 2015 fueron un pasu más na crisis del réxime. El turnismu ente’l PP y el PSOE, les dos pates de la II Restauración, quedó mui feríu y, igual que na crisis de la I, ábrese un impasse ente esi momentu en que les vieyes fuercies nun pueden gobernar como siempre, pero les fuercies del cambiu, con tolos matices que se querian, nun son a imponese. La pata más feble del réxime ye’l PSOE, que nun taba tovía maduru pa da-y el preste a un gobiernu col PP, pero foi presu de les sos dinámiques internes p’articular una mayoría nueva qu’implicara francer el pautu de la Transición, como se vio cola cuestión nacional, ente otres. Nesi sentíu, la nueva convocatoria electoral va servir pa esclariar si la qu’hasta agora siguía siendo la fuercia mayoritaria de la presunta esquierda va doblar definitivamente énte’l PP, cola pantasma del PASOK griegu esnalando per ende, o si va aceptar conformar una mayoría alternativa, esta vez yá non como fuercia hexemónica. Sigue leyendo