La chispa de la vida

Coca-Cola zarra la embotelladora de Cualloto (Siero) y despide a 144 trabayadores.

Coca-Cola zarra la embotelladora de Cualloto (Siero) y despide a 144 trabayadores.

L’anunciu del ERE de Coca Cola non por esperáu ye menos dolorosu que tola riestra de deslocalización y piesllu d’empreses que llevaben munchos años dando trabayu n’Asturies. Nesti casu concretu por munches películes que nos cuenten de que si les decisiones del accionariáu nun tienen que ver cola marca matriz o de qu’esto ye’l resultáu d’un procesu de converxencia y concentración de capital que quier “optimizar” los beneficios pesllando les embotelladores que presenten resultaos negativos, lo cierto ye que presentar esti ERE nuna empresa que da beneficios SOLO ye posible como resultáu  de la reforma llaboral (aquella que diba crear tantu trabayu col cuentu de la flexibilidá).

Siguir Lleendo

Asturies gota a gota

AguaVariantePayaresLes noticies que tán saliendo estes hores sobre la fuga de cientos de miles de litros d’agua nos túneles de Payares son una alegoría perfeuta de lo que vien ocurriendo n’Asturies cuantayá. Como pasó tantes veces coles obres faraóniques paradigma del “progresu” que cacarexaron per décades los sucesivos gobiernos asturianos, esta obra estrada de sobrecostos, que yá tripliquen el presupuestu inicial, sirvió p’alimentar la rede clientelar y la maquinaria propagandística qu’apurrieron les mayories electorales que fexeron bona la conseña del “tira que llibres”.

Güei la trampa rescampló en forma de filtraciones, como primero rescamplaron otres trampes como la del superpuertu de Xixón, El Muselón. Millones de litros d’agua que teníen que tar alimentando los regatos de Llión tán agora, gracies a errores de planificación descomanaos, inundando los túneles y arroyando pelos montes. Cada gota d’esi agua ye como’l sangre qu’esti país vien perdiendo dende hai décades. Sangre que se perdió coles eternes reconversiones minera y industrial que dexaron na cai a decenes de miles de trabayadores. Sangre que se perdió col esmantelamientu del campu asturianu hasta esgonciar el mundu rural. Sangre que se perdió cola estroza del mediu ambiente en forma de mines a cielu abiertu o plantaciones d’ocalitos. Sangre que se perdió cola emigración masiva dende va venti años de la mocedá asturiana. Sangre que se perdió cola muerte adulces de la nuestra llingua, del nuestru padremuñu, de la nuestra identidá como pueblu. Siguir Lleendo

Declaración de sofitu al derechu a decidir de Cataluña

El pueblu catalán da un pasu mas na so xusta reclamación sobre’l derechu democráticu a decidir el futuru de so. Y, darréu, la España reaccionaria que nun entiende de derechos nin de democracia, sal en barrena pa dexar claro que nun va permitir daqué tan elemental como la celebración d’una consulta democrática. Los qu’argumenten que la “soberanía reside nel Pueblu español”, son los mesmos que se doblen delantre los mandatos del gran capital financiero y de la Troika, los mesmos que mos roben, mos faen probes, mos reprimen, los que mos arrampuñen derechos sociales y civiles conquistaos con munchos años de llucha, sufrimientu y sangre.

Pero esti exerciciu de soberanía qu’anicia nel pueblu de Cataluña nun pue sirvir a la derecha que representa Artur Mas p’afondar nes polítiques de recortes y d’expropiaciones sobre los bienes comunes. La soberanía ye un derechu que los pueblos tienen qu’exercer sobre TOLES decisiones polítiques, sobre’l propiu cuerpu, sobre les polítiques sociales y económiques, sobre la sostenibilidá ecolóxica del modelu productivu y de consumu, etc. Esto ye, el derechu a decidir de los pueblos tien que se realizar dende una radicalización de la democracia y, poro, tien que se llevar a cabu como oposición a les imposiciones del gran capital sobre los derechos y conquistes sociales.

Siguir Lleendo

¡Nin súbditos nin alteces: Somos República!

Manifiestu Somos RepúblicaXuan Carlos I d’España y daqué d’Alemaña (por Corinna, Julia Steinbush y la Merkel) cai. Y esta vegada nun ye un tropezón por fuxir de llechu impropiu colos calzones d’armiñu al costazu, nin por cazar elefantes en Botsuana, nin osos borrachos nos Cárpatos. Xuan Carlos I ta cayendo de podre y la oligarquía española castiza y casposa cuenta col so recambiu en Felipe VI. La operación empecipió: trátase de sustituyir al vieyu y escadriláu Borbón, que s’azotó a pola corona saltando perriba’l cadabre del so hermanu y el derechu dinásticu del padre, por un rei nuevu que pase la ITV (Inspección Técnica de Vagos) con un recauchutáu que tape la corrupción y el trinque de la familia real al completo. Vuelve a tratase de dexalo too “atao y bien atao” como bien dixera -y meyor fixera- el so mentor: el dictador Francisco Franco. Resulta chocante qu’a esti proyectu lu llamen “Segunda Transición”, idega llanzá hai meses que ta siendo “trendingtopics” y que ta prestando pola vida a les clases dominantes y sobre la que caún fai la so quiniela.

Sabemos que los rexímenes políticos tán al serviciu de los sistemes económicos. La restauración de la monarquía borbónica del 78 foi la forma d’Estáu de la que se dotó’l gran capital pa defender los sos intereses y planes d’acumulación. Agora la so continuidá en Felipe VI rubricaría l’Estáu nuevu de l’Austeridá y la Probeza que foi imponiéndonos los distintos gobiernos del réximen (asina del PP como del PSOE, como de CIU o el PNV, etc…), al dictáu de la Troika y del gran capital financieru trasnacional que ta esmantelando toles conquistes históriques del movimientu obreru, el feminismu, l’ecoloxismu y los movimientos civiles democráticos.

A los sectores populares nun nos queda otra que contraponer a los sos planes, la ROTURA col Réxime del 78 y los sos continuadores, exerciendo la SOBERANÍA POPULAR y col exerciciu efectivu del derechu a l’autodeterminación de los Pueblos del Estáu español, p’abrir el procesu o procesos constituyentes necesarios que conviertan en realidá les aspiraciones republicanes de los y les trabayadores.