Anguaño estímase que más del 70% de la población mundial que vive na miseria más estrema son neñes o muyeres. Y la rellación ente "el segundu sexu" y la probitú ye cada día más estrencha. Esta manifestación de desigualdá conocida como feminización de la probitú nun ye, n'absoluto, una característica propia de los llamaos países del Tercer Mundu, y según la so acepción más amplia, tien d'entendese qu'efectivamente la proporción de muyeres probes nel planeta ye mayor que la de los homes, pero tamién que les muyeres tán más aprobetayaes como consecuencia del so inda escasu accesu a los espacios públicos.

La revolución feminista que se dio acabante colar el sieglu XX tuvo grandes llogros, pero lloñe de ser un proyectu peracabáu tien güei actualidá dafechu, desque la mundialización de la economía alcontró ún de los sos meyores aliaos nel sistema patriarcal. Estes son delles de les consecuencies de tan funesta xuntanza.

Abondu trabayu, pocu emplegu y condiciones más precaries.
El capitalismu del sieglu XXI caracterízase pola globalización de los mercaos (sobre manera los financieros), causa y al empar consecuencia de la internacionalización de les empreses. Una internalización que xeneró, al empar, un desasitiamientu de los capitales, de manera que les grandes multinacionales tienen el camín abiertu pa llevar les sos fábriques au la esplotación de los trabayadores xenere mayores ganancies con un mínimu de conflictos. Nes llamaes Zones Franques, la población trabayador ye nun altu porcentaxe femenino y les sos condiciones llaborales foron enforma veces denunciaes por dellos organismos internacionales: xornaes intensives de 12 o más hores, prohibición dafechu de sindicación, sueldos perbaxos y despíos nel intre en casu d'embarazu. Multinacionales como la General Electric, Panasonic o General Motors niéguense a contratales cuando tán en períodu de xestación. Davezu han pasar tests d'embarazu y entrugues sobre la so vida.

Pero la situación de les muyeres énte'l trabayu nun se caracteriza namás pola so precariedá sinon tamién bien veces por un escesu de trabayu y una falta d'emplegu. El primeru traduzse nel desarrollu d'un ampliu conxuntu d'actividaes na esfera reproductiva como'l caltenimientu de la economía doméstica y el curiáu de la población infantil ya tamién de los parientes enfermos y/o vieyos. Desposeíes d'una valorización afayadiza social y económica, les actividaes que foron tradicionalmente feches poles muyeres nun tienen presencia nel cálculu del PIB de los países. Acordies col Informe sobre Desarrollu Humanu del Programa de les Naciones Uníe pal Desarrollo (PNUD 1995), la contribución non monetarizada ya invisible de les muyeres a la economía mundial en 1995 algamó cuasi un 50% del PIB mundial.

El segundu aspectu que caracteriza la situación de les muyeres nel mundu del trabayu ye'l pocu emplegu: na Europa rica, les femes aguanten más índiz de paru (un 56% énte un 32,9%) y les sos condiciones salariales en trabayos d'igual altor que los de los sos collacios varones son piores. Aguanten tamién un índiz más altu de trabayu a tiempu parcial, lo que-yos dexa tener la doble xornada llaboral: nel mundu reproductivu y nel mundu productivu.

Salú, alimentación y violencia escontra les muyeres.
Según la Organización Mundial de la Salú (OMS), nos países en víes de desarrollu muerren cada añu más de mediu millón de muyeres por causes rellacionaes cola maternidá por nun tener l'asistencia médica afayadiza. Calcúlase que'l 14% de les neñes del Tercer Mundu sufren malnutrición grave, énte'l 5% de los neños. N'Africa, Asia y dellos países de Llatinoamérica destetase davezu a les neñas primero que'a los neños, de la mesma manera que les muyeres y neñas son les caberes en comer de la casa (nel casu de la India). Esta situación agrávase cola participación nestos países de multinacionales de la alimentación como Nestlé, Abott-Ross, Heinz, Sandoz etc. Les sos práctiques comerciales abusives dan en (directa o indirectamente) la muerte d'un millón y mediu de lactantes al añu, masque en 1981 los Estaos miembros de la OMS adoptaren un códigu destináu a contrarrestar estes práctiques empobinaes a que las madres camuden la lactancia materno pola lleche en polvu.

L'apertura de nuevos mercaos fai xorrecer abondo l'índiz de mortalidá infantil, pero tamién el de muyeres adultes. Organismos como'l Bancu Mundial o el Fondu Monetariu Internacional subvencionaron los implantes del Norplant (un productu hormonal que se llanta embaxo'l pelleyu), métodu anticonceptivu que provoca graves consecuencies pa la salú. Los cuerpos de les muyeres son una fonte inescosable d'esperimentación no que toca a métodos anticonceptivos y nel so estremu alcuéntrense les campañes d'esterilización. El Movimientu Negru Unificáu de Brasil lleva denunciando esti fechu dende 1960: la tasa de natalidá de les muyeres negres ye más pequeñu que la de les muyeres blanques, y aquelles son superiores en númberu... Con too, podemos afitar qu'esto nun ye otro qu'una ximuestra de los tratos vexatorios a los que tán sometíes les muyeres, sobre manera si nos decatamos que tanto la violencia física como la sicolóxica, exercíes en dellos ámbitos como'l llaboral, familiar o social, cuayen n'abusos sesuales, violaciones, malos tratos, mutilaciones xenitales o prostitución forzada. Nos EEUU, una muyer ye golpeada cada 12 segundos y otra ye violada cada minutu y mediu. El 49% de les muyeres de Guatemala quéxase de ser blancu de la violencia doméstica.

Menos participación nos ámbitos públicos.
De manera xeneral, les muyeres siguen estremaes de los principales puestos directivos y de poder de la sociedá. Anque'l 50% del electoráu ye femenín, na toma de decisiones na política de les naciones, les muyeres son minoría. En 1995, na IV Conferencia de la Muyer fecha en Pekín, púnxose enriba la mesa que namás nueve muyeres en funciones ocupaben cargos de representación estatal como Xefes de Gobiernu. Malapenes un 11% de los escaños parllamentarios del mundu tán ocupaos por muyeres, pero amás, la lexislación p'algamar la paridá nun se respeta: grupos feministes de Bolivia denuncien que nel so país nun se respeta la Llei de Cuotes que diz que'l 30% de les llistes de candidatos a les alcaldíes han ser muyeres.

En xeneral, nes árees d'alministración y xestión hai poques muyeres y les qu'hai suelen arrequexase n'emplegos de servicios y oficines. Nel Informe sobre Desarrollu Humanu de 1995 l'índiz de participación femenina n'emplegos alministrativos y executivos foi del 18,8% pa too América Llatina y el Caribe. Según un estudiu d'UNICEF (La Situation des enfants dans le monde, 1999) de los 900 millones d'adultos analfabetos que se supón que'hai nel mundu, dos tercios son muyeres.

Como nos amuesen les cifres d'enriba, y acordies con organizaciones feministes de tol mundu, son abondos los cambeos que faen faltar. Poro, reivindicaciones y actuaciones como les de Las Dignas nel Salvador, les del Círculo de Abogadas de Paraguay, les de Mujeres en Lucha por la Democracia de México o les Mujeres de Negro de Kosovo tienen anguaño vixencia dafechu, y ensin dulda, van contribuyir a escribir la Hestoria de les Muyeres nel sieglu XXI.

Contactu: uov01655@correo.uniovi.es