Esta carta que tenéis delantre vuestro ye un pasu más de la campaña que l´Asociación Cultural pal Desarrollu "PICU RABICU" ta faciendo pa dar a conocer a la ciudadanía d´Asturies el COMERCIU XUSTU y la esistencia d´una tienda que yá lleva dos años espardiendo esti nuevu mou d´entender les relaciones comerciales ente los productores del SUR (países emprobecíos) y los/es consumidores responsables del NORTE (países enriquecíos).

Dalgunos/es de vosotros/es yá conocéis la tienda, ya que sois veceros/es d´ella, anque tamién ye verdá que´l númberu de xente que merca nella tovía nun ye abondo p´afitar la posibilidá de salir alantre y la continuidá del proyeutu. El que la tienda tea tovía abierta débese, sobremanera, al trabayu voluntariu de les persones que tamos na asociación, y a que, de momentu, danos pa dir pagando, con aforfugos, los pidíos y l´alquiler. Sicasí, esti proyeutu nun tien sentíu si nun ye asumíu pola ciudadanía concienciao como daqué de so y como dalgo qu´hai que defender y afalar. Nun ye un proyeutu lucrativu, nin una forma de buscanos la vida les persones que lu integramos, anque ún de los oxetivos seya crear puestos de trabayu. Asina que, O YE UN PROYEUTU DE TOÓS O NUN YE. Dalgunes de les causes d´esta situación son:

· Pocu espardimientu de la esistencia y el domiciliu de la tienda.

· Desconocimientu de lo que ye´l Comerciu Xustu.

· Vezos y inercies de consumu acríticu (¿pensastis dacuando ónde, cómo y quién fai lo que mercáis?).

Nun ye la nuestra idea que, agora que vais conocer una migayina meyor qué ye´l Comerciu Xustu y la esistencia d´una tienda onde poder practicar un consumu consciente y solidariu, vengais equí a consumir porque sí, lo que seya y como seya. ¿De qué se trata entós? Pues de que si vais mercar daqué que necesitéis y lo tenemos na tienda, vengáis equí como primer opción.

¿O ye que la xente d´izquierdes nun almuerza café, cacao o té? Pues lo qu´hai na tienda, arriendes de ser de gran calidá, tien la característica de tar fecho con dignidá, por campesinos y campesines organizaos en cooperatives, con un proyeutu d´inversión de parte de los beneficios nel desarrollu integral de les comunidaes onde s´alcuentren eses cooperatives, col mesmu sueldu y los mesmos drechos pa homes y muyeres, con xestión democrática y participativa de la empresa, con drechos llaborales y sindicales, con variedá de la producción pa evitar el monocultivu y la dependencia del esterior, dándo-y puxu al mercáu interior (parte de la producción NUN puede esportase), llibre de trabayu/esplotación infantil y respetuoso pa colos procesos tradicionales y artesanales, el mediu ambiente y la cultura indíxena.

Ye dicir, qu´hai ALTERNATIVA equí y agora al consumu que mira poles multinacionales y el Neolliberalismu (que ye como llamen agora al Capitalismu que carecemos anguaño) culpables del paru y la miseria d´allá y d´equí. ¿Nun ye ési ún de los oxetivos d´IAS? ¡Pues vamos ponelo en PRÁUTICA! Nun val pa nada, o pa bien poco, dicir que tamos en contra de la esplotación y de la Globalización económica, si depués el nuestru consumu fai que les coses sigan igual, o lo que ye pior, que cada día seyan más fuertes.

Sedría de lo más falso pidir salarios y condiciones llaborales xustes nes nuestres empreses y nel nuestru país, si depués, por aforrar venti duros o nun caminar cien metros, siguimos mercando a los qu´esclavicen a lµs trabayadores que fabriquen los productos que consumimos davezu. ¿Nun ye l´INTERNACIONALISMU una de les señes d´identidá más importantes de la IZQUIERDA? Pues lo que queramos pa lµs trabayadores d´equí, DESIXÁMOSLO pa lµs d´allá y, na midida en que´l nuestru consumu valga pa esi oxetivu, tengamos una PRÁUTICA COHERENTE.

Otru tema importante qu´hai que mentar ye que mercando productos de Comerciu Xustu NUN tamos "ayudando" al "probe negru" o a la "probe indíxena". Tamos mercándo-yos los productos que faen con dignidá, pagándo-yos por ello un preciu XUSTU, lo qu´arriendes de permitinos esfrutar del sabor d´una taza de buen café, por exemplu, fainos PARTICIPAR d´un mou DIREUTU, RESPONSABLE, y SOLIDARIU nel DESARROLLU de lµs trabayadores de los países emprobecíos.

Tócavos agora a vosotres/os dar dalgún pasu nesti sen. Tais convidaos /es a pasar pela tienda a entrugar, criticar, proponer, participar y cualesquier otru infinitivu que se vos ocurra. En PICU RABICU tamos convencíes/os de que tenéis daqué que dicir alrodiu d´estes coses, yá que l´encontu de l´ALTERNATIVA al Sistema Capitalista tien que se facer dende l´afalagu y la participación n´esperiencies que, dende la PRÁUTICA, ayuden a dir afitando valires que faigan vidable los procesos de tresformación.

Ensin más, recibíi un saludu solidariu.

· Xixón: "PICU RABICU", C/ Numa Guilhou 14 baxu (xunta Tatuajes Pedro).
· Uviéu: "L´ARCU LA VIEYA", C/ Postigo alto 14 baxu (xunta´l chigre "La Deva").