Entamó too anantes, muncho anantes d'un 8 de marzu, les muyeres siempre y en toles dómines de la hestoria, fueron quien a reivindicar los sos derechos, a mostra-y al mundu la desigualdá na que taben ensertes, a intentar tresformar un sistema que resultaba opresor y hasta feroz coles sos vides.

Pero nun foi hasta'l sieglu XIX cuando les muyeres pudieron facese más visibles ¿qué podía resultar más incoherente pa un sistema de criación de valores humanos que'l fechu de que más de la mitá de la población mundial nun pudiera escoyer a los sos representantes na vida pública?, Pues bien, les sufraguistes siguiendo los patrones del pensamiento ilustráu cuestionaron un sistema androcéntricu y desigual poniendo en tela de xuiciu les xerarquíes establecíes hasta entós.

Nun foi esta una llucha fácil, pa quien crea que namás que fueron delles lloques intelectuales les que glayaben delantre'l parlamentu británicu solicitando'l derechu al votu, habrá que recorda-y que munches d'elles fueron xulgaes y encarcelaes y que nes sos famoses fuelgues de fame yeren alimentaes a la fuercia con embudos (como gansos pa facer el paté) lo que-yos producía dolencies mayores y hasta la muerte.

O aquelles muyeres que depués de la II guerra mundial negáronse a volver pa casa con una palmadina en llombu y ensin nenguna indemnización o reconocimientu depués de tar teniendo pola economía de los sos países, trabayando en fábriques (daquella nun se cuestionó si les muyeres yeren o non a rializar los mesmos trabayos que los homes) o criando estructures sindicales que tovía güei perduren.

A estes silencióseles adulces, ensin que naide supiera nunca les manifestaciones, acciones o protestes qu'entamaron pa nun perder los sos puestos de trabayu.

Bono, exemplos de la implicación política y social de les muyeres hai munchos dende les que criaron los sindicatos (SOLIDARIDÁ en Polonia) partíos políticos, movimientos sociales, escueles d'arte o teatru, etc. que representen el silenciu más estridente nos llibros d'hestoria, diccionarios, recopilaciones académiques y demás, y que tovía güei siguen siendo les grandes desconocíes pa cásique tola población.

Con Simone de Beauvoir y el "Segundu Sexu", la hestoria del pensamientu feminista dio un xiru, tresformóse en daqué muncho más intelectual y analítico que hasta entó, buscando nes relaciones ente los dos xéneros los motivos de la desigualdá, relaciones estes que'empezaben na infancia (madre -fíu-a, padre -fía-u) y estendínse hasta'l el restu de la trayectoria vital, y que dexaben sigún la filósofa y escritora pistes abondo clares del porqué de la denominación de les muyeres como segundu sexu
.
Con esta Biblia del feminismu, decididamente dexamos de ser pensadores de segunda pa convertinos selemente en protagonistes del nuestru presente y futuru, y avanzar de sópitu ente les llendes de la teoría, criando corrientes, opiniones varies y sensibilidaes hasta contrapuestes, eso sí toes con un finxu común, la busca de la independencia y de la llibertá, güei podríemos dicir que pa nós y pa ellos. Pero claro, esto sucedía en Francia, EE.UU., Suecia y demás "planetas" porque aquí nel Estáu, papá Franco devolvíanos depués d'una dómina imposible y impensable de República y de reconocimientu institucional de derechos pa les muyeres (titularidá de propiedaes, divorciu, derechu a la educación, al empleu, etc,) al dulce calor y serenidá del llar y el confesionariu.
Equí corrín tiempos distintos y la mutilación intelectual y social llegó a llendes d'aberración moral. Simplemente nun esistíemos, ensin derechos los seres nun son. Y esto foi una torga perrevesosa de superar, porque la democracia "prometíaseles mui felices" (parafraseando a mio güela) pero tovía güei y depués de diez años de dictadura socialista siguimos ensin una llei de derechu al albuertu LLIBRE Y DE BALDRE, y si falamos del empleu entós el panorama resulta desolador, más del 60% de los contratos temporales siguen faciéndose-yos a muyeres, les baxes por maternidá puen constituyir motivu de despidu, namás el 1% de los homes que trabayen na alministración soliciten la baxa por paternidá (que yá ye triste), nesti Estáu les muyeres puen llegar a cobrar hasta un 50% menos de sueldu qu'un home pol desempeñu de la mesma función llaboral, les muyeres namás tenemos el 1% de la propiedá a nivel mundial mientres que facemos hasta un 69% del trabayu, y asina podríemos la recatafila de lo "políticamente incorrecho" hasta que nos cansáremos de oyir situaciones riales y inxustes.

Nuria Rodríguez trabaya nel grupu feminista Andecha Moces Da-y al Dengue.