Pelo que se ve, el gran motivu d’escándalu pa bona parte de la opinión pública norteamericano nun ye que rescamplen les mentires que dio’l so gobiernu pa entamar la guerra de los lladrones n’Iraq, sinón que nel espectáculu de la superbowl Justin Timberlake dexara albentestate una teta de Janet Jackson, y too ello n’horariu de másima audiencia. Escandalízase l’América puritana y reaccionaria, y desixe moralidá y decencia –esto ye, nada de tetes- na televisión y demás mass media. Pa ellos, ye más grave que rescample la teta que les mentires de Bush&Co.

A esti llau del Atlánticu, paez que nun escandaliza nin lo uno nin lo otro. Que la Jackson enseñe pectoral escandaliza tan poco como qu’Aznar y el gobiernu español se fagan los llocos y nieguen que dixeren qu’Iraq tenía armes de destrucción masivo. Sigún ellos, nunca dixeron cosa tala –ehí tán les videoteques y le hemeroteques pa desmentilo- y polo tanto nun tienen por qué dar explicaciones nel parlamentu. Del clan de les Açores, Bush y Blair yá tán compareciendo, bien que mal, pa tapar les sos mentires, básicamente porque bona parte de la opinión pública británico y norteamericano creyóles. Nel Reinu d’España, nun les creyó naide, nin siquiera los pocos que xustificaron la guerra, y por eso'l PP nun se ve obligáu a xustificase. Por eso esti ye un país de comedia, onde los primeros en nun respetar les instituciones son los mesmos que tán tol día empapizaos de tanto falar d’elles. Y sabémoslo. Pero nun mos importa. Porque tamos tan avezaos a les mentires qu’una más nun se nota. Escepto cuando empiecen a llegar más muertos en bolses de plásticu. Y llegará l’escándalu y el facese los indignaos. Los mesmos que van votar el 14 de marzu pol PP fadránse cruces y desixirán responsabilidaes a tol mundu, que ye como nun les desixir a naide. Mientres, podemos facer como nos USA y escandalizanos por una teta, que ye como tar na lluna.